ரூ.3811 கோடி அள்ளிய அரசியல் கட்சிகள் எவை? சுப்ரீம் கோர்ட் தீர்ப்புக்கு பிறகு டிரஸ்ட் வழியாக பாயும் பண மழை

 

தேர்தல் பத்திரங்கள் மூலம் அரசியல் கட்சிகளுக்கு ரகசியமாக நிதி வழங்கும் முறை அரசியலமைப்புச் சட்டத்திற்கு எதிரானது என உச்சநீதிமன்றம் கடந்த ஆண்டு ரத்து செய்தது. இந்த அதிரடித் தீர்ப்புக்குப் பிந்தைய முதல் நிதியாண்டில் (2024-2025), அரசியல் கட்சிகளுக்கான நிதிப் பங்களிப்பு புதிய பாதையில் பயணிக்கத் தொடங்கியுள்ளது. பத்திரங்களுக்குப் பதிலாக, இப்போது 'தேர்தல் அறக்கட்டளைகள்' (Electoral Trusts) மூலம் கோடிக்கணக்கான ரூபாய் கட்சிகளுக்குப் பாய்ந்து வருகிறது.

இந்தியத் தேர்தல் ஆணையத்தில் தாக்கல் செய்யப்பட்டுள்ள புதிய அறிக்கைகளின்படி, 2024-25 நிதியாண்டில் ஒன்பது தேர்தல் அறக்கட்டளைகள் மட்டும் மொத்தம் ரூ. 3,811 கோடியை பல்வேறு அரசியல் கட்சிகளுக்கு நன்கொடையாக வழங்கியுள்ளன. இந்த பிரம்மாண்டமான நிதியில் பெரும் பகுதி ஆளுங்கட்சியான பாரதிய ஜனதா கட்சிக்குச் சென்றுள்ளது. பா.ஜ.க (BJP) மொத்த நிதியில் 82 சதவீதத்திற்கும் மேல், அதாவது ரூ. 3,112 கோடியை பாஜக பெற்றுள்ளது. காங்கிரஸ் (Congress) சுமார் 8 சதவீதம், அதாவது ரூ. 299 கோடியை மட்டும் பெற்றுள்ளது. இதர கட்சிகள் மீதமுள்ள 10 சதவீத நிதி (ரூ. 400 கோடி) இதர அரசியல் கட்சிகளுக்குப் பிரித்து வழங்கப்பட்டுள்ளது.

கடந்த 2023-2024 நிதியாண்டில் அறக்கட்டளைகள் மூலம் பெறப்பட்ட நிதி ரூ. 1,218 கோடியாக இருந்தது. ஆனால் இந்த ஆண்டு அது 200% அதிகரித்து ரூ. 3,811 கோடியாக உயர்ந்துள்ளது குறிப்பிடத்தக்கது.

புருடென்ட் எலக்டோரல் டிரஸ்ட் (Prudent Electoral Trust): இதுவே பா.ஜ.கவுக்கு அதிக நிதி வழங்கிய அறக்கட்டளையாக உருவெடுத்துள்ளது. இதிலிருந்து மட்டும் பாஜகவுக்கு ரூ. 2,180.07 கோடி கிடைத்துள்ளது. இந்த அறக்கட்டளைக்கு பாரதி ஏர்டெல், ஜிண்டால் ஸ்டீல், மேகா இன்ஜினியரிங், டொரண்ட் பார்மா போன்ற முன்னணி நிறுவனங்கள் நிதி வழங்கியுள்ளன.

புரோகிரசிவ் எலக்டோரல் டிரஸ்ட் (Progressive Electoral Trust): டாடா குழும நிறுவனங்களால் நிர்வகிக்கப்படும் இந்த அறக்கட்டளை, வசூலித்த ரூ. 917 கோடியில் 80.82 சதவீதத்தை (ரூ. 739 கோடிக்கும் மேல்) பாஜகவுக்கு வழங்கியுள்ளது.

நியூ டெமாக்ரடிக் எலக்டோரல் டிரஸ்ட்: மகிந்திரா குழும நிறுவனங்களிடமிருந்து பெற்ற ரூ. 160 கோடியில், ரூ. 150 கோடியை பாஜகவுக்கு வழங்கியுள்ளது.

தேர்தல் பத்திரங்கள் முறையில் யார் பணம் கொடுத்தார்கள் என்பது ரகசியமாக இருந்தது. ஆனால், தற்போதுள்ள 'தேர்தல் அறக்கட்டளை' முறையில் எந்த நிறுவனம் டிரஸ்ட்டிற்குப் பணம் கொடுத்தது, அந்த டிரஸ்ட் எந்தக் கட்சிக்கு எவ்வளவு கொடுத்தது போன்ற விவரங்கள் தேர்தல் ஆணையத்தில் சமர்ப்பிக்கப்பட வேண்டும். இதனால் நிதிப் பரிமாற்றத்தில் ஓரளவு வெளிப்படைத்தன்மை ஏற்பட்டுள்ளது.

தற்போது கார்ப்பரேட் நிறுவனங்கள் காசோலை (Cheque), டிடி (DD) அல்லது யூபிஐ (UPI) வங்கிப் பரிமாற்றங்கள் மூலமே கட்சிகளுக்கு நேரடியாக நிதி வழங்கி வருகின்றன. மேற்கண்ட ரூ. 3,811 கோடி என்பது தேர்தல் அறக்கட்டளைகள் மூலமாக வந்த நிதி மட்டுமே. இது தவிர கட்சிகள் நேரடியாகவும், பிற வழிகளிலும் பெறும் நிதி இதைக் காட்டிலும் அதிகமாக இருக்கும்.

source https://tamil.indianexpress.com/india/money-rain-through-trusts-after-supreme-court-verdict-which-political-parties-bagged-rs-3811-crore-10927997