source https://tamil.indianexpress.com/tamilnadu/ragupathi-slams-tvk-govt-60-mlas-dissatisfied-dmk-to-support-no-confidence-motion-12780665
/indian-express-tamil/media/media_files/2026/11/03/ragupathy-2026-11-03-21-44-25.jpg)
புதுக்கோட்டையில் செய்தியாளர்களைச் சந்தித்த தி.மு.க மூத்த தலைவரும் முன்னாள் அமைச்சருமான ரகுபதி, ஆளும் த.வெ.க அரசைக் கடுமையாக விமர்சித்துப் பேசியுள்ளார். Photograph: (File Photo)
புதுக்கோட்டையில் செய்தியாளர்களைச் சந்தித்த தி.மு.க மூத்த தலைவரும் முன்னாள் அமைச்சருமான ரகுபதி, ஆளும் த.வெ.க அரசைக் கடுமையாக விமர்சித்துப் பேசியுள்ளார். த.வெ.க சட்டமன்ற உறுப்பினர்களில் 60 முதல் 70 பேர் வரை தற்போதைய ஆட்சி நிர்வாகத்தின் மீது அதிருப்தியில் இருப்பதாகவும், அவர்கள் அரசுக்கு எதிராக நம்பிக்கையில்லா தீர்மானம் கொண்டு வந்தால் அதற்கு தி.மு.க முழு ஆதரவு அளிக்கும் என்றும் அவர் தெரிவித்தார்.
புதுக்கோட்டையில் செவ்வாய்க்கிழமை செய்தியாளர்களைச் சந்தித்த தி.மு.க முன்னாள் அமைச்சர் ரகுபதி பேசியதாவது:
புதுக்கோட்டையில் புதிதாகத் திறக்கப்பட்ட பேருந்து நிலையம் மற்றும் உள் விளையாட்டு அரங்கம் ஆகிய இரண்டுமே முந்தைய தி.மு.க ஆட்சிக் காலத்தில் திட்டமிடப்பட்டு கட்டப்பட்டவை. ஆனால், ஆட்சி மாறியதும் தி.மு.க-வின் சாதனைகளுக்குத் தங்களது ஸ்டிக்கர் ஒட்டி த.வெ.க அரசு விழா நடத்தியுள்ளது. எப்போதும் போல் இந்த விழாவிலும் முதலமைச்சர் விஜய் எதுவுமே பேசாமல் சென்றுவிட்டார்.
தி.மு.க ஆட்சியில் கொண்டுவரப்பட்ட திட்டப் பணிகளின் திறப்பு விழாவை முன்னிட்டு, புதுக்கோட்டையில் தி.மு.க-வினர் மக்களுக்கு இனிப்பு வழங்க முயன்றபோது காவல்துறையினர் அதைத் தடுத்து நிறுத்தியுள்ளனர். மாநிலத்தில் சட்டம்-ஒழுங்கை முறைப்படுத்துவதற்குப் பதிலாக, பாதுகாப்புப் பணிகளுக்கும் இனிப்பு வழங்குவதைத் தடுப்பதற்கும் காவல்துறையைப் பயன்படுத்தினால் குற்றச் சம்பவங்கள் அதிகரிக்காமல் என்ன செய்யும்?
தி.மு.க-வும் அ.தி.மு.க-வும் இணைந்து த.வெ.க அரசுக்கு எதிராகச் செயல்பட வாய்ப்புள்ளதா என்ற கேள்விக்கு, அது த.வெ.க-வினர் பரப்பி வரும் திட்டமிட்ட வதந்தி என்று ரகுபதி மறுத்தார். 1980-ம் ஆண்டிலேயே எம்.ஜி.ஆர் - கருணாநிதி காலத்தில் பிஜு பட்நாயக் இரு கட்சிகளையும் இணைக்க முயன்றபோதும், இரண்டாம் கட்டத் தலைவர்கள் அதை ஏற்கவில்லை. எனவே அ.தி.மு.க - தி.மு.க இணைப்பு என்பது சாத்தியமற்றது.
அதேவேளையில், வரும் நவம்பர் 13-க்குப் பிறகு த.வெ.கவைச் சேர்ந்த அதிருப்தி எம்.எல்.ஏ-க்கள் 60-க்கும் மேற்பட்டோர் ஒன்றுசேர்ந்து தங்களது சொந்த அரசுக்கு எதிராகவே நம்பிக்கையில்லா தீர்மானம் கொண்டு வந்தால், அதை எதிர்கட்சியாக இருந்து தி.மு.க கண்டிப்பாக ஆதரிக்கும்.
சிறையிலிருந்து கைதிகள் தப்பிச் செல்வதைக் சாக்காக வைத்து, சிறைத்துறையைத் தனியார்மயமாக்க அமைச்சர் நிர்மல் குமார் முயல்வதாக ரகுபதி குற்றம் சாட்டினார். சட்டத்துறையில் தகுதியற்றவர்களுக்குப் பதவி வழங்கிவிட்டு, மின்சாரத் துறையில் ஒரு யூனிட் மின்சாரத்தை ரூ.41-க்குக் கொள்முதல் செய்து, சிறைத்துறையிலும் தனியாருடன் இணைந்து முறைகேடுகளில் ஈடுபடுகிறார்களா என்ற கேள்வி பொதுமக்கள் மத்தியில் எழுந்துள்ளது.
அரசு நிர்வாகத்தை கவனிப்பதை விட்டுவிட்டு, சமூக வலைதளங்களில் 'ரீல்ஸ்' பதிவிடுவதன் மூலமும் பொய்யான தகவல்களைப் பரப்புவதன் மூலமுமே ஐந்தாண்டு ஆட்சிக் காலத்தைக் கடந்துவிடலாம் எனத் த.வெ.க நினைக்கிறது. நடைபெறவுள்ள 5 தொகுதிகளுக்கான இடைத்தேர்தலில் இந்த 'ரீல்ஸ்' அரசுக்குத் தமிழக மக்கள் தகுந்த பாடம் கற்பிப்பார்கள் என்றும் ரகுபதி எச்சரித்தார்.
