source https://tamil.indianexpress.com/india/uniform-civil-code-key-allies-tdp-sena-back-amit-shah-call-but-jdu-says-not-in-bihar-12533378
2029ஆம் ஆண்டு நடைபெறவுள்ள மக்களவைத் தேர்தலுக்கு முன்பாக, தேசிய ஜனநாயகக் கூட்டணி (NDA) ஆட்சி நடைபெறும் 21 மாநிலங்களிலும் பொது சிவில் சட்டம் (UCC) அமல்படுத்தப்படும் என்று மத்திய உள்துறை அமைச்சர் அமித் ஷா, அறிவித்ததற்கு மறுநாளே, கூட்டணியில் இடம்பெற்றுள்ள பெரும்பாலான கட்சிகள் இந்த நடவடிக்கைக்கு ஆதரவு தெரிவித்தன. எனினும், சில கூட்டணிக் கட்சிகள் இந்த விவகாரத்தில் எச்சரிக்கையான அணுகுமுறையை கடைப்பிடித்த நிலையில், பீகாரில் இதுபோன்ற எந்த நடவடிக்கையையும் அனுமதிக்க மாட்டோம் என்று ஐக்கிய ஜனதா தளம் (JD(U)) திட்டவட்டமாகத் தெரிவித்துள்ளது.
நாடாளுமன்றத்தில் பெரும்பான்மையைத் தக்கவைக்க பாஜக தலைமையிலான தேசிய ஜனநாயகக் கூட்டணி நம்பியிருக்கும் தெலுங்கு தேசம் கட்சி (TDP), ஆந்திரப் பிரதேசத்தில் கணிசமான முஸ்லிம் வாக்கு வங்கியைக் கொண்டிருந்தபோதிலும், பொது சிவில் சட்டத்தை ஆதரிப்பதாகத் தெரிவித்துள்ளது. சிவசேனா மற்றும் ஹிந்துஸ்தானி அவாம் மோர்ச்சா (மதச்சார்பற்ற) (HAM-S) ஆகிய கட்சிகளும் இதற்கு ஆதரவு தெரிவித்துள்ளன.
இது குறித்து தெலுங்கு தேசம் கட்சியின் தலைவரான லாவு கிருஷ்ண தேவராயலு கூறுகையில், “நாங்கள் இதை ஆதரிப்போம். தற்போதைக்கு இதுகுறித்து எந்த விவாதமும் நடைபெறவில்லை. ஆனால், இதற்கான தேவை ஏற்படும் போது, அதுகுறித்து பரிசீலிப்போம். சட்டத்தை அமல்படுத்துவதற்கு முன்பு பல்வேறு தரப்பினரையும் நிச்சயமாகக் கலந்தாலோசிப்போம்” என்று மக்களவையில் தெரிவித்தார்.
பீகாரில் கணிசமான முஸ்லிம் வாக்கு வங்கியைக் கொண்டுள்ள ஐக்கிய ஜனதா தளம் மற்றும் தெலுங்கு தேசம் ஆகிய கட்சிகள், முன்பு போதிய ஆலோசனைகள் இல்லாமல் எந்தவொரு சட்டத்தையும் கொண்டுவருவதற்கு எதிர்ப்பு தெரிவித்திருந்தன. ஆனால், தற்போது பொது சிவில் சட்டம் தொடர்பான விவகாரத்தில் தெலுங்கு தேசம் தனது நிலைப்பாட்டை ஓரளவு மாற்றியிருப்பதாகத் தெரிகிறது. பல்வேறு மதங்களும் கலாச்சாரங்களும் கொண்ட இந்தியா போன்ற ஒரு நாட்டில் பொது சிவில் சட்டம் மிகவும் அவசியமானது” என்று தெலுங்கு தேசம் கட்சியின் தலைவர் ஒருவர் தெரிவித்தார்.
2024 மக்களவைத் தேர்தலுக்குப் பிறகு தெலுங்கு தேசம் தேசிய ஜனநாயகக் கூட்டணியில் இணைவதற்கு முன்பு, அக்கட்சியின் தலைவரும் ஆந்திரப் பிரதேச முதல்வருமான என்.சந்திரபாபு நாயுடு, “பொது சிவில் சட்டம் தொடர்பான விவகாரம் வரும்போது, தெலுங்கு தேசம் முஸ்லிம் சமூகத்துடன் நிற்கும்” என்று தெரிவித்திருந்தார். 2011ஆம் ஆண்டு மக்கள்தொகைக் கணக்கெடுப்பின்படி, ஆந்திரப் பிரதேசத்தின் மொத்த மக்கள்தொகையான 8,45,80,777 பேரில், 7,48,24,149 பேர், அதாவது 88 சதவீதத்துக்கும் அதிகமானோர் இந்துக்கள். முஸ்லிம்களின் எண்ணிக்கை 80,82,412 ஆகவும், மொத்த மக்கள்தொகையில் கிட்டத்தட்ட 10 சதவீதமாகவும் இருந்தது.
பாட்னாவில், ஐக்கிய ஜனதா தளத்தின் மூத்த தலைவரும் முன்னாள் மாநில அமைச்சருமான ஷ்யாம் ரஜக், தேசிய அளவில் பொது சிவில் சட்ட மசோதாவை தங்கள் கட்சி ஆதரிப்பதாகவும், ஆனால் பீகாரில் அதை அமல்படுத்துவதை ஆதரிக்கவில்லை என்றும் திங்கள்கிழமை மீண்டும் தெரிவித்தார். ஐக்கிய ஜனதா தளத்தின் தலைவரும் முன்னாள் முதல்வருமான நிதிஷ் குமார், பொது சிவில் சட்டத்தை அமல்படுத்துவதற்கு முன்பு இந்த விவகாரத்தில் நாடு முழுவதும் பரந்த அளவிலான ஒருமித்த கருத்து ஏற்பட வேண்டும் என்று ஏற்கனவே வலியுறுத்தியிருந்தார்.
இதுகுறித்து செய்தியாளர்களிடம் ஷ்யாம் ரஜக் கூறுகையில், “இந்த மசோதா நாடாளுமன்றத்துக்கு வந்தபோது, எங்கள் தலைவர் நிதிஷ் குமார் தெளிவாகக் கூறினார். நாங்கள் இதை ஆதரிக்கிறோம். ஆனால், எங்கள் மாநிலமான பீகாரில் இதை அமல்படுத்த அனுமதிக்க மாட்டோம். இந்த நிலைப்பாட்டில் நாங்கள் உறுதியாக இருக்கிறோம்” என்றார். கட்சியின் நிலைப்பாடு குறித்து கேள்வி எழுப்பப்பட்டபோது, மூத்த தலைவரும் மாநிலங்களவை உறுப்பினருமான சஞ்சய் ஜா, இந்த விவகாரம் தொடர்பாக பாஜகவின் தேசியத் தலைமையுடன் தங்கள் கட்சி ஆலோசனை நடத்தும் என்று தெரிவித்தார்.
இது தொடர்பாக மத்திய உள்துறை அமைச்சருடன் விவாதிப்போம்” என்று கட்சியின் தேசிய செயல் தலைவராகவும் உள்ள சஞ்சய் ஜா, தி இந்தியன் எக்ஸ்பிரஸ் நாளிதழிடம் தெரிவித்தார். பீகாரில் தேசிய ஜனநாயகக் கூட்டணியின் மற்றொரு கூட்டணிக் கட்சியான லோக் ஜனசக்தி கட்சி (ராம் விலாஸ்), பொது சிவில் சட்டம் தொடர்பான வரைவு அல்லது மசோதா தங்களிடம் சமர்ப்பிக்கப்பட்ட பின்னர், அதன் சாத்தியமான தாக்கம் மற்றும் சட்டக் கட்டமைப்பு குறித்து ஆய்வு செய்வோம் என்ற நிலைப்பாட்டை தொடர்ந்து கடைப்பிடித்து வருகிறது.
மேற்கு வங்கத்தில் பாஜக சட்டப்பேரவைத் தேர்தலில் வெற்றி பெற்ற மூன்று மாதங்களுக்குப் பிறகு அமித் ஷா இந்த சமீபத்திய அறிவிப்பை வெளியிட்டுள்ளார். முந்தைய திரிணமூல் காங்கிரஸ் அரசு பொது சிவில் சட்டத்தை கடுமையாக எதிர்த்து வந்தது. திங்கள்கிழமை, மேற்கு வங்க பாஜக தலைவர் ஷாமிக் பட்டாச்சார்யா, மாநிலத்தில் பொது சிவில் சட்டத்தை நிறைவேற்றி அமல்படுத்துவதற்கான நடவடிக்கைகளை தங்கள் கட்சி விரைவில் தொடங்கும் என்று தெரிவித்தார்.
நாங்கள் பொது சிவில் சட்டத்தை அறிமுகப்படுத்தப் போகிறோம். இது எங்களுக்கான மறைமுகமான திட்டம் அல்ல. பாஜக தொடங்கப்பட்ட காலத்திலிருந்தே இதை தனது முக்கிய முன்னுரிமைகளில் ஒன்றாகக் கொண்டுள்ளது. எனவே, இதை நிறைவேற்றுவது எங்களுடைய தார்மிகக் கடமையாகும். மாநிலத்தில் பொது சிவில் சட்டம் அமல்படுத்தப்பட வேண்டும் என்று மக்கள்தொகையில் பெரும் பகுதியினரும் விரும்புகின்றனர்” என்று ஷாமிக் பட்டாச்சார்யா தி இந்தியன் எக்ஸ்பிரஸ் நாளிதழிடம் தெரிவித்தார்.
எனினும், பாஜகவின் புதிய மேற்கு வங்கக் கூட்டணிக் கட்சியான நேஷனலிஸ்ட் சிட்டிசன்ஸ் பார்ட்டி ஆஃப் இந்தியா (NCPI), இந்த விவகாரம் குறித்து தங்கள் கட்சி விரிவாக ஆலோசனை நடத்த வேண்டியிருக்கும் என்று தெரிவித்துள்ளது. திரிணமூல் காங்கிரஸில் இருந்து விலகிய நாடாளுமன்ற உறுப்பினர்களால் உருவாக்கப்பட்ட இந்தக் கட்சி, மக்களவையில் 20 உறுப்பினர்களைக் கொண்டுள்ளது.
தேசிய ஜனநாயகக் கூட்டணி ஆட்சி நடைபெறும் மாநிலங்களில் பொது சிவில் சட்டம் அமல்படுத்தப்பட உள்ளதாக நாங்கள் கேள்விப்பட்டோம். இது மிகவும் முக்கியமான விவகாரம். எனவே, இதுகுறித்து தீவிரமாக ஆலோசித்து முடிவெடுக்க வேண்டும். ஒரு முன்மொழிவு எங்களிடம் சமர்ப்பிக்கப்பட்டவுடன் இதுகுறித்து விவாதிப்போம். பின்னர் எங்கள் நிலைப்பாட்டைத் தீர்மானிப்போம்” என்று அக்கட்சியின் தலைவரும் மூத்த நாடாளுமன்ற உறுப்பினருமான ககோலி கோஷ் தஸ்திதார் தெரிவித்தார்.
2011ஆம் ஆண்டு மக்கள்தொகைக் கணக்கெடுப்பின்படி, மேற்கு வங்கத்தின் மொத்த மக்கள்தொகை 9,12,76,115 ஆகும். இதில் 6,43,85,546 பேர், அதாவது 70 சதவீதத்துக்கும் அதிகமானோர் இந்துக்கள். முஸ்லிம்களின் எண்ணிக்கை 2,46,54,825 ஆகும். இது மாநிலத்தின் மொத்த மக்கள்தொகையில் 27 சதவீதத்துக்கும் சற்று அதிகமாகும். மற்ற கூட்டணிக் கட்சிகளான சிவசேனா மற்றும் ஹிந்துஸ்தானி அவாம் மோர்ச்சா (மதச்சார்பற்ற) ஆகியவையும் பொது சிவில் சட்டத்திற்கு தங்களது ஆதரவை மீண்டும் உறுதிப்படுத்தியுள்ளன.
சிவசேனா தலைவர் ஸ்ரீகாந்த் ஷிண்டே கூறுகையில், “பொது சிவில் சட்டமும் சமத்துவம், நீதி மற்றும் தேசிய ஒற்றுமை ஆகிய கொள்கைகளின் அடிப்படையிலேயே அமைந்துள்ளது. இது எங்கள் நிறுவனர் ‘இந்து ஹிருதய சம்ராட்’ பாலாசாகேப் தாக்கரேவின் நீண்டகால கொள்கை நிலைப்பாடாகவும் இருந்து வருகிறது. ஒரு கொள்கை ரீதியான கூட்டணிக் கட்சியாக, இந்திய மக்களுக்கு அளித்துள்ள வாக்குறுதிகளை நிறைவேற்றுவதில் அரசுக்கு உறுதுணையாக நிற்பது எங்களுடைய கடமையாகும்.
வலிமையான, ஒற்றுமையான மற்றும் முன்னேற்றமடைந்த இந்தியாவை உருவாக்கும் நோக்கில் பொது சிவில் சட்டத்தை அமல்படுத்துவதில் எங்கள் தலைவர் ஏக்நாத் ஷிண்டே ஆழ்ந்த உறுதிப்பாட்டுடன் உள்ளார்” என்றார். மேலும் ஹிந்துஸ்தானி அவாம் மோர்ச்சா கட்சியின் தேசியத் தலைவர் சந்தோஷ் குமார் சுமன், அமித் ஷாவின் பொது சிவில் சட்டம் தொடர்பான அறிவிப்பை “முழு மனதுடன்” வரவேற்றதுடன், அதற்கு தனது கட்சியின் ஆதரவையும் தெரிவித்தார்.
மக்களவையில் தெலுங்கு தேசம் கட்சிக்கு 16 உறுப்பினர்கள் உள்ளனர். அதைத் தொடர்ந்து சிவசேனாவுக்கு 13 உறுப்பினர்களும், ஐக்கிய ஜனதா தளத்துக்கு 12 உறுப்பினர்களும், லோக் ஜனசக்தி கட்சி (ராம் விலாஸ்)க்கு 5 உறுப்பினர்களும், ஹிந்துஸ்தானி அவாம் மோர்ச்சா (மதச்சார்பற்ற) கட்சிக்கு ஒரு உறுப்பினரும் உள்ளனர். மாநிலங்களவையில் தெலுங்கு தேசம் மற்றும் ஐக்கிய ஜனதா தளம் ஆகிய கட்சிகளுக்கு தலா 4 உறுப்பினர்களும், சிவசேனாவுக்கு 2 உறுப்பினர்களும் உள்ளனர்.
