மின் இணைப்பு பெயர் மாற்றம்: புதிய நடைமுறை அமல் - மின்சார வாரியம் அறிவிப்பு

 

பெயர் மாற்றத்திற்குப் பல ஆவணங்கள் கேட்கப்பட்டதால் தேவையற்ற காலதாமதம் ஏற்பட்டது. இதைத் தவிர்க்கவும், பணிகளை விரைவுபடுத்தவும் இந்த நடவடிக்கை எடுக்கப்பட்டுள்ளது.

வீட்டு மின் இணைப்பு பெயர் மாற்றம் செய்வதற்கான நடைமுறைகளை எளிதாக்கி, தமிழ்நாடு மின்சார வாரியம் புதிய அறிவிப்பை வெளியிட்டுள்ளது. இனிமேல், பெயர் மாற்றம் செய்ய வரும் விண்ணப்பதாரர்கள் முந்தைய உரிமையாளரின் ஒப்புதல் படிவம் 2-ஐ சமர்ப்பிக்கத் தேவையில்லை.

முன்னர், பெயர் மாற்றத்திற்குப் பல ஆவணங்கள் கேட்கப்பட்டதால் தேவையற்ற காலதாமதம் ஏற்பட்டது. இதைத் தவிர்க்கவும், பணிகளை விரைவுபடுத்தவும் இந்த நடவடிக்கை எடுக்கப்பட்டுள்ளது. இதுதொடர்பாக, தமிழ்நாடு மின் உற்பத்தி மற்றும் பகிர்மான கழகத்தின் வணிகப் பிரிவு, அனைத்து தலைமைப் பொறியாளர்களுக்கும் சுற்றறிக்கை அனுப்பியுள்ளது.

முக்கிய அம்சங்கள்:

முந்தைய உரிமையாளர் ஒப்புதல் தேவையில்லை: இனி, வீட்டு மின் இணைப்பு பெயர் மாற்றம் செய்ய, முந்தைய உரிமையாளரின் ஒப்புதல் படிவமான 'படிவம் 2' கேட்கப்படாது.

சொத்து பரிமாற்றங்கள்: சொத்து விற்பனை, பாகப்பிரிவினை, அல்லது அன்பளிப்பு போன்ற காரணங்களுக்காகப் பெயர் மாற்றம் செய்யும்போது, விற்பனைப் பத்திரம், சொத்து வரி ரசீது அல்லது நீதிமன்ற தீர்ப்பு ஆகியவற்றில் ஏதேனும் ஒன்றைச் சமர்ப்பிக்க வேண்டும்.

குடும்ப உறுப்பினரின் மறைவு: குடும்பத்தின் மூத்த உறுப்பினர் இறந்துவிட்டால், வாரிசு சான்றிதழ் அல்லது சமீபத்திய சொத்து வரி ரசீதுடன், இழப்பீட்டுப் பத்திரத்தைச் சமர்ப்பித்து பெயர் மாற்றம் செய்யலாம்.

இந்த புதிய நடைமுறைகள் குறித்து பொதுமக்களிடம் விழிப்புணர்வு ஏற்படுத்த வேண்டும் என்றும் அந்த சுற்றறிக்கையில் அறிவுறுத்தப்பட்டுள்ளது.

source https://tamil.indianexpress.com/tamilnadu/tneb-announce-electricity-connection-name-change-new-procedure-implemented-10058753