அமெரிக்காவுடன் இந்தியாவின் வர்த்தகம் 'ஒருதலைப்பட்சமான பேரிடர்' - டிரம்ப் குற்றச்சாட்டு

 

அமெரிக்க அதிபர் டொனால்ட் டிரம்ப் Photograph: (AP)

டெல்லியில் பிரதமர் மோடி சீன அதிபர் ஷி ஜின்பிங் மற்றும் ரஷ்ய அதிபர் விளாடிமிர் புதின் ஆகியோரைச் சந்தித்த சில மணிநேரங்களுக்குப் பிறகு, அமெரிக்காவுடனான இந்தியாவின் வர்த்தகம் ஒருதலைப்பட்சமானது என்றும் அது ஒரு "பேரிடர்" என்றும் முன்னாள் அமெரிக்க அதிபர் டொனால்டு டிரம்ப் கடுமையாக விமர்சித்துள்ளார். இந்தியா விதித்துள்ள அதிகப்படியான வரிகள், அமெரிக்க நிறுவனங்கள் தங்கள் பொருட்களை அங்கே விற்பதைத் தடுக்கின்றன என்றும் அவர் குற்றம்சாட்டினார்.

ட்ரூத் சோஷியல் தளத்தில் டிரம்ப் பதிவிட்டதாவது:

சிலருக்குப் புரியாத விஷயம் என்னவென்றால், நாங்கள் இந்தியாவுடன் மிகக் குறைவான வர்த்தகத்தையே செய்கிறோம். ஆனால், அவர்கள் எங்களுடன் மிகப்பெரிய அளவில் வர்த்தகம் செய்கிறார்கள். வேறு வார்த்தைகளில் சொல்ல வேண்டும் என்றால், அவர்கள் எங்களுக்கு அதிக அளவில் பொருட்களை விற்கிறார்கள். அமெரிக்கா அவர்களின் மிகப்பெரிய 'வாடிக்கையாளர்'. ஆனால், நாங்கள் அவர்களுக்கு மிகக் குறைவாகவே பொருட்களை விற்கிறோம். பல தசாப்தங்களாக இது ஒரு முற்றிலும் ஒருதலைப்பட்சமான உறவாக இருந்து வருகிறது” என்று டிரம்ப் குறிப்பிட்டுள்ளார்.

மேலும் அவர்,  “இதற்கு முக்கியக் காரணம், வேறு எந்த நாட்டையும் விட இந்தியா எங்களுக்கு அதிக வரிகளை விதித்து வருகிறது. இதனால், எங்கள் வணிகங்களால் இந்தியாவில் பொருட்களை விற்க முடியவில்லை. இது ஒரு முழுமையான ஒருதலைப்பட்சமான பேரிடர். மேலும், இந்தியா தனது கச்சா எண்ணெய் மற்றும் ராணுவத் தளவாடங்களில் பெரும்பாலானவற்றை ரஷ்யாவிடம் இருந்து வாங்குகிறது. அமெரிக்காவிடம் இருந்து மிகக் குறைவாகவே வாங்குகிறது. இப்போது தங்கள் வரிகளை பூஜ்ஜியமாகக் குறைக்க முன்வந்திருக்கிறார்கள். ஆனால், அது தாமதமாகிவிட்டது. அவர்கள் பல ஆண்டுகளுக்கு முன்பே இதைச் செய்திருக்க வேண்டும்” என்றும் கூறினார்.

டிரம்ப் மீது ஜனநாயகக் கட்சியினர் தாக்குதல்

டிரம்பின் இந்தக் கருத்துக்கள், அமெரிக்காவின் உத்தி பங்காளியாகவும், பிராந்தியத்தில் சீனாவின் செல்வாக்கைக் கட்டுப்படுத்தும் ஒரு முக்கிய நட்பு நாடாகவும் கருதப்படும் இந்தியாவுடனான உறவுகளைச் சீர்குலைப்பதாக பல்வேறு தரப்பினரிடம் இருந்து விமர்சனங்களைச் சந்தித்துள்ளன. கடந்த மாதம், அமெரிக்கப் பிரதிநிதிகள் சபையின் வெளியுறவுக் குழுவில் உள்ள ஜனநாயகக் கட்சியினர், “இந்தியாவைக் குறிவைத்து டிரம்ப் வரிகளை விதிப்பது, அமெரிக்கர்களுக்கு பாதிப்பை ஏற்படுத்தி, இரு நாடுகளின் உறவையும் நாசப்படுத்துகிறது” என்று கண்டனம் தெரிவித்தனர்.

ரஷ்ய எண்ணெயை அதிகம் இறக்குமதி செய்யும் நாடுகளில் ஒன்றான சீனாவுக்கு எந்தவிதமான தடைகளும் விதிக்கப்படாததையும் அவர்கள் சுட்டிக்காட்டினர். “இது உக்ரைனைப் பற்றியது அல்ல” என்றும் அவர்கள் குறிப்பிட்டனர். ஜனநாயகக் கட்சியினர் தங்கள் எக்ஸ் சமூக வலைத்தளத்தில்,  “ரஷ்ய எண்ணெயை அதிக அளவில் வாங்கும் சீனா அல்லது பிற நாடுகள் மீது பொருளாதாரத் தடை விதிக்காமல், டிரம்ப் இந்தியாவைத் தனிமைப்படுத்தி வரிகளை விதிக்கிறார். இது அமெரிக்கர்களுக்குப் பாதிப்பை ஏற்படுத்துவதுடன், இந்தியா-அமெரிக்கா உறவையும் நாசப்படுத்துகிறது” என்று தெரிவித்தனர்.

அமெரிக்காவுடன் வர்த்தக ஒப்பந்தத்திற்கு சிவில் சமூகம் எதிர்ப்பு

உலக வர்த்தகம் தொடர்பாகப் பணியாற்றும் விவசாயச் சங்கங்கள், தொழிற்சங்கங்கள், வர்த்தகக் குழுக்கள், சுகாதார அமைப்புகள், சுற்றுச்சூழல் குழுக்கள் மற்றும் ஆர்வலர்களின் கூட்டமைப்பான "ஃபாரம் ஃபார் டிரேட் ஜஸ்டிஸ்" (Forum for Trade Justice), முன்மொழியப்பட்ட இந்தியா - அமெரிக்க இருதரப்பு ஒப்பந்தம் என்பது 'நியாயமான வர்த்தகத்தை'ப் பற்றியது அல்ல, மாறாக இந்தியாவின் வெளியுறவு மற்றும் உள்நாட்டுக் கொள்கைகளை அமெரிக்காவின் பொருளாதார மற்றும் புவிசார் நலன்களுக்கு ஏற்றவாறு மாற்றுவதற்கான ஒரு முயற்சி என்று தெரிவித்துள்ளது.

“தற்போதைய பேச்சுவார்த்தைகளில், இந்தியா தனது நலன்களை விட்டுக்கொடுப்பதன் மூலம் பாதுகாக்க முடியாது. மாறாக, உறுதியாகவும், நமது நீண்டகாலப் பொருளாதார வாய்ப்புகள், வளர்ச்சி இலக்குகள் மற்றும் சுற்றுச்சூழலைப் பாதுகாப்பதை மனதில் வைத்தும் செயல்படுவதன் மூலமே நமது நலன்கள் பாதுகாக்கப்படும். நம் பேச்சுவார்த்தையாளர்கள் பிரதமர் மோடிக்கு முக்கியப் பிரச்சினைகள் குறித்துத் தெளிவாக எடுத்துரைக்க வேண்டும். இதன் மூலம் அதிகார மற்றும் அமைச்சர்கள் மட்டத்தில் முடிவாகும் இந்த ஒப்பந்தம் இந்தியாவின் நலன்களுக்கு எதிராக அமையாமல் பார்த்துக்கொள்ள முடியும்” என்றும் அந்த அமைப்பு தெரிவித்தது.

இந்தக் கூட்டமைப்பு மேலும் கூறுகையில், “சீனா இந்தியாவை விட அதிக ரஷ்ய எண்ணெயை இறக்குமதி செய்கிறது. ஆனால், அதற்கு எந்தவிதமான அபராதமும் விதிக்கப்படவில்லை. இது இந்தியா எப்படி நடந்துகொள்ள வேண்டும் என்பதற்கான ஒரு பாடமாக இருக்கலாம்” என்றும் கூறியுள்ளது. இந்த அச்சுறுத்தல் மற்றும் இரட்டை வேடத்தால் நாடு கோபமடைந்துள்ள நிலையில், மக்கள் மற்றும் அரசு இணைந்து இந்தியாவின் இறையாண்மையை நிலைநிறுத்த வேண்டும் என்றும், அமெரிக்காவிற்கு தேவையற்ற சலுகைகளை வழங்கக் கூடாது என்றும் அந்த அமைப்பு வலியுறுத்தியுள்ளது.

source https://tamil.indianexpress.com/business/trump-slams-us-india-trade-a-one-sided-disaster-9776378