பி.எம்.கிசான், ஓய்வூதியத் திட்ட நிதியைத் திருடிய மெகா சைபர் கும்பல் கைது

 

Government Scheme Fraud| Operation Shutterdown| Rajasthan Cyber Crime

மத்திய மற்றும் மாநில அரசின் நலத்திட்டப் பயனாளிகளிடமிருந்து நிதியைத் திருடி வந்த மிகப் பெரிய மாநிலங்களுக்கு இடையேயான சைபர் கிரைம் கும்பலை ஜலாவார் (Jhalawar) காவல்துறை 'ஆபரேஷன் ஷட்டர் டவுன்' (Operation Shutterdown) மூலம் வெற்றிகரமாக முறியடித்துள்ளது

போலி உரிமங்கள் மூலம் நிதி மோசடி: 

பிரதம மந்திரி கிசான் சம்மான் நிதி, சமூகப் பாதுகாப்பு ஓய்வூதியங்கள் மற்றும் பல்வேறு இழப்பீட்டுத் திட்டங்களின் கீழ் விவசாயிகள், ஓய்வூதியதாரர்கள் மற்றும் குறைந்த வருமானம் கொண்ட பயனாளிகளுக்குச் சேர வேண்டிய நிதியை இந்தக் கும்பல் போலி உரிமங்கள் மூலம் கையாடல் செய்துள்ளது. ஜலாவாரில் இருந்து பெறப்பட்ட தனிப்பட்ட தரவுகளைப் பயன்படுத்தி, ஜோத்பூர், கோட்டா, பூந்தி மற்றும் தௌசா ஆகிய இடங்களில் பரவியுள்ள போலி அடையாளங்கள் மற்றும் வங்கிக் கணக்குகள் மூலம் பணம் எடுக்கப்பட்டுள்ளது.

தலைவன் உட்பட 30 பேர் கைது: 

இந்த மோசடியின் முக்கிய மூளையான, தௌசாவின் பந்திகுயைச் (Bandikui in Dausa) சேர்ந்த ராமவதார் சைனி (Ramavatar Saini) உட்பட 30 குற்றவாளிகளைப் போலிசார் கைது செய்துள்ளனர். மேலும், அவர்களிடம் இருந்து ₹52 லட்சம் ரொக்கம், சொகுசு வாகனங்கள், 35 கணினிகள், பயோமெட்ரிக் சாதனங்கள், நூற்றுக்கணக்கான சிம் கார்டுகள் மற்றும் 11,000க்கும் மேற்பட்ட வங்கிக் கணக்குகளுடன் தொடர்புடைய ஆவணங்கள் ஆகியவை பறிமுதல் செய்யப்பட்டுள்ளன. மொத்தமாக பறிமுதல் செய்யப்பட்ட பொருட்களின் மதிப்பு ₹3 கோடிக்கும் அதிகமாகும்.

காவல்துறை நடவடிக்கையின் பின்னணி: 

மாவட்ட காவல் கண்காணிப்பாளர் அமித் குமார் புடானியா (Amit Kumar Budaniya) கூறுகையில், பொது மக்கள் ரகசியமாகத் தகவல் தெரிவிக்கத் தொடங்கப்பட்ட கட்டணமில்லா தொலைபேசி எண், இந்த வழக்கின் திருப்புமுனைக்கு முக்கிய காரணமாக அமைந்தது. 2025, ஆகஸ்ட் 8 அன்று கிடைத்த ஒரு இரகசியத் தகவலைத் தொடர்ந்து சைபர் மோசடி வழக்கு பதிவு செய்யப்பட்டது.

காவலர் ரவி சென் மேற்கொண்ட முதற்கட்ட விசாரணையில், பல வங்கிக் கணக்குகள் ஒரே ஒரு மொபைல் எண்ணுடன் இணைக்கப்பட்டிருப்பதும், அவற்றில் அரசுப் பணப் பரிவர்த்தனைகள் நடந்து, உடனடியாக ரொக்கமாக எடுக்கப்பட்டிருப்பதும் தெரியவந்தது. இதைத் தொடர்ந்து, கான்ஸ்டபிள் சுமித் குமார் (Sumit Kumar) குழுவுடன் இணைக்கப்பட்டார்.

மோசடியின் முறை: 

இந்தக் கும்பலின் தலைவன் ராமவதார் சைனிக்கு, பி.எம். கிசான் சம்மான் நிதி (PM Kisan Samman Nidhi), பேரிடர் மேலாண்மை தகவல் அமைப்பு (DMIS) போன்ற பல்வேறு அரசு நலத்திட்ட இணையதளங்களைப் பற்றிய முழுமையான அறிவு இருந்தது. கிராம மக்களிடமிருந்து வங்கிக் கணக்கு விவரங்கள் மற்றும் அடையாள ஆவணங்களைப் பெற்றுக் கொண்டு, அவர்களுக்கு அரசுப் பலன்கள் பெற்றுத் தருவதாக வாக்குறுதி அளித்துள்ளார். ஆனால், தகுதியற்றவர்களைத் தகுதியான பயனாளிகளாக ஆவணங்களில் மாற்றி, அரசு கருவூலத்திலிருந்து பெரும் தொகையை அவர்களது வங்கிக் கணக்குகளுக்கு மாற்றியுள்ளார். இவ்வாறு மாற்றப்பட்ட தொகையில் 50 முதல் 75% வரை கமிஷனாகப் பெற்றுக் கொண்டு, மக்களின் நலத்திட்ட நிதியைத் திருப்பிவிட்டுள்ளனர்.

70 குழுக்கள் மூலம் ஒரே நேரத்தில் அதிரடி வேட்டை: 

வாரக்கணக்கான ரகசிய கண்காணிப்புக்குப் பிறகு, 70 காவல்துறைக் குழுக்கள் ராஜஸ்தான் மற்றும் மத்தியப் பிரதேசம் முழுவதும் 30 இடங்களில், 700 கிலோமீட்டருக்கும் அதிகமான பரப்பளவில் ஒரே நேரத்தில் அதிரடிச் சோதனை நடத்தின. ஜலாவார் காவல் தலைமையகத்தில் அமைக்கப்பட்ட ஒரு சைபர் கட்டுப்பாட்டு அறை, சோதனைகளை நிகழ் நேரத்தில் கண்காணித்து, ஒருங்கிணைப்பை உறுதி செய்ததுடன், ஆதாரங்களை அழிப்பதைத் தடுத்தது.

மோசடியின் அளவைக் கருத்தில் கொண்டு, துணைக் காவல் கண்காணிப்பாளர்கள் (DySPs) பிரேம் குமார், ஹர்ஷ்ராஜ் சிங் கரேடா மற்றும் மனோஜ் சோனி தலைமையில் ஒரு சிறப்புப் புலனாய்வுக் குழு (SIT) அமைக்கப்பட்டுள்ளது. பணப் பரிவர்த்தனைப் பாதையைக் கண்டறிய ஸ்டேட் பேங்க் ஆஃப் இந்தியாவிலிருந்தும் ஒரு நான்கு பேர் கொண்ட நிபுணர் குழு உதவிக்கு வரவழைக்கப்பட்டுள்ளது.

குடிமக்களின் ஒத்துழைப்பால் "ஆபரேஷன் ஷட்டர் டவுன்" வெற்றிகரமாக அமைந்ததாகக் காவல் கண்காணிப்பாளர் அமித் குமார் தெரிவித்தார். தகவல் அளித்தவரின் ரகசியம் பாதுகாக்கப்படும் என்றும், நடவடிக்கையில் ஈடுபட்ட அதிகாரிகளின் அர்ப்பணிப்பு பாராட்டுக்குரியது என்றும் அவர் குறிப்பிட்டார்.

source https://tamil.indianexpress.com/india/government-scheme-fraud-operation-shutterdown-pm-kisan-samman-nidhi-scam-rajasthan-cyber-crime-10588704