மம்தா பானர்ஜி செய்த மரபு மீறல்:

 

Droupadi Murmu West Bengal visit | Mamata Banerjee protocol controversy | Blue Book protocol for President

இந்திய ஜனாதிபதி, துணை ஜனாதிபதி அல்லது பிரதமர் ஒரு மாநிலத்திற்கு வருகை தரும்போது, அந்த மாநிலத்தின் ஆளுநரும் முதலமைச்சரும் நேரில் சென்று வரவேற்பது நீண்டகால மரபாக இருந்து வருகிறது. ஆனால், மேற்கு வங்கத்திற்கு வருகை தந்துள்ள ஜனாதிபதி திரௌபதி முர்முவை வரவேற்க முதலமைச்சர் மம்தா பானர்ஜி நேரில் செல்லாதது மட்டுமின்றி, ஒரு அமைச்சரைக்கூட நியமிக்காதது தற்போது பெரும் விவாதத்தை ஏற்படுத்தியுள்ளது.

அரசு நெறிமுறை என்ன சொல்கிறது?

மத்திய உள்துறை அமைச்சகத்தால் பராமரிக்கப்படும் 'புளூ புக்' (Blue Book) எனும் வழிகாட்டு நெறிமுறை புத்தகத்தில், நாட்டின் உயரிய பதவியில் இருப்பவர்கள் ஒரு மாநிலத்திற்கு வரும்போது செய்யப்பட வேண்டிய ஏற்பாடுகள் தெளிவாகக் குறிப்பிடப்பட்டுள்ளன. இதன்படி, ஜனாதிபதி வரும்போது முதலமைச்சர் நேரில் இருக்க வேண்டும் என்பது கட்டாயமில்லை என்றாலும், ஒருவேளை முதலமைச்சர் வர இயலாத சூழலில் அவருக்குப் பதிலாக ஒரு மூத்த அமைச்சரை நியமித்து ஜனாதிபதியை வரவேற்கச் செய்வது மரபு மற்றும் நாகரிகமாகக் கருதப்படுகிறது.

மேற்கு வங்க வரலாற்றில் இதுவரை பிரதமர் அல்லது ஜனாதிபதி வருகையின் போது முதலமைச்சரோ அல்லது அவரால் நியமிக்கப்பட்ட அமைச்சரோ இல்லாமல் இருந்ததில்லை. கடந்த 2021-ம் ஆண்டு பிரதமர் மோடி யாஸ் புயல் பாதிப்புகளை ஆய்வு செய்ய வந்தபோது, மம்தா பானர்ஜி ஆய்வுக்கூட்டத்தைத் தவிர்த்தாலும், விமான நிலையத்திற்குச் சென்று பிரதமரை வரவேற்கத் தவறவில்லை. ஆனால், தற்போது ஜனாதிபதி முர்முவின் வருகையின் போது ஒரு அமைச்சரைக்கூட நியமிக்காதது "அசாதாரணமானது" என்று அரசியல் நோக்கர்கள் கருதுகின்றனர்.

பிற மாநில முன்னுதாரணங்கள்

சமீபத்தில் உத்தரப் பிரதேசத்தின் மதுராவுக்கு ஜனாதிபதி வருகை தந்தபோது, முதலமைச்சர் யோகி ஆதித்யநாத் மற்றும் ஆளுநர் ஆனந்திபென் படேல் ஆகிய இருவருமே நேரில் இருக்கவில்லை. இருப்பினும், முதலமைச்சர் யோகி தனது சார்பாக அமைச்சர் லக்ஷ்மி நாராயண் சௌதரியை ஜனாதிபதியை வரவேற்க முறைப்படி நியமித்திருந்தார். அதேபோல், கடந்த காலங்களில் அகிலேஷ் யாதவ் முதலமைச்சராக இருந்தபோதும், பிரதமர் அல்லது ஜனாதிபதி வருகையின் போது தான் வர முடியாவிட்டால் அமைச்சர்களை அனுப்பி வைப்பதை வழக்கமாகக் கொண்டிருந்தார்.

இந்த அரசு நெறிமுறைகள் மிகவும் கடுமையானவை. ஜனாதிபதி அல்லது பிரதமரை வரவேற்கப் போகும் நபர்களின் பட்டியல் முன்கூட்டியே ஜனாதிபதி மாளிகை அல்லது பிரதமர் அலுவலகத்திற்கு அனுப்பப்பட்டு ஒப்புதல் பெறப்பட வேண்டும். இந்த நடைமுறைகளில் சிறு தவறு நேர்ந்தால் கூட அது குறித்து பல்வேறு நிலைகளில் விசாரணை நடத்தப்படும் என்பது குறிப்பிடத்தக்கது.

தற்போது மம்தா பானர்ஜி எவ்வித அமைச்சரையும் நியமிக்காமல் தவிர்த்திருப்பது, மேற்கு வங்க அரசுக்கும் மத்திய அரசுக்கும் இடையே ஏற்கனவே நிலவி வரும் அரசியல் மோதலின் மற்றொரு வெளிப்பாடாகவே பார்க்கப்படுகிறது.

source https://tamil.indianexpress.com/explained/droupadi-murmu-west-bengal-visit-mamata-banerjee-protocol-controversy-blue-book-protocol-for-president-11185313