எப்படி வளர்கிறது? புத்தக வெளியீட்டில் எழுந்த விவாதம்

 

எழுதியவர்: திருஷ்டி ஜெயின்

ஆர்.எஸ். எஸ் உள்ளே இருக்கும் நபர்கள் மற்றும் அமைப்பிற்கு வெளியில் உள்ளவர்களின் கருத்துகளை ஒன்றாக இணைத்து, எழுத்தாளர் லெஹர் சேதி எழுதிய “சாஃப்ரான் ஷேடோஸ்: தி ஆர்.எஸ்.எஸ், ஏ சென்சுரி ஆஃப் இன்ஃபுளூயன்ஸ்” (Saffron Shadows: The RSS, A Century of Influence) என்ற புத்தகம் ஞாயிற்றுக்கிழமையன்று டெல்லியில் வெளியிடப்பட்டது.

ஆர்.எஸ்.எஸ் அமைப்பின் சிந்தனையாளர்கள் மற்றும் அதன் கொள்கைகளை விமர்சிப்பவர்களின் கட்டுரைகளின் தொகுப்பாக இப்புத்தகம் உருவாக்கப்பட்டுள்ளது. சமூக ஆர்வலரான சேதியால் தொகுத்து திருத்தப்பட்ட இப்புத்தகம், ஆர்.எஸ்.எஸ் அமைப்பு தொடங்கப்பட்டு 100 ஆண்டுகள் நிறைவடையும் ஆண்டிலேயே வெளியாகியுள்ளது. இந்த வெளியீட்டு விழாவில் ஆர்.எஸ்.எஸ் அமைப்பில் 80 ஆண்டுகள் வரை பணியாற்றியவர்களும், மாநிலங்களவை உறுப்பினரும் ஆம் ஆத்மி கட்சியின் தலைவருமான சஞ்சய் சிங் உட்பட அதன் கருத்தியலை எதிர்க்கும் நபர்களும் பேச்சாளர்களாகக் கலந்து கொண்டனர்.

புத்தகத்தின் பின்னணியைப் பற்றி விவரிக்கும் போது, ஓம் புக்ஸ் இன்டர்நேஷனல் பதிப்பகத்தின் அஜய் மகோ கூறுகையில், "ஆர்.எஸ்.எஸ் தனது 100-வது ஆண்டைக் கொண்டாடும் வேளையில் இப்புத்தகம் வெளிவருவது மிகவும் முக்கியத்துவம் வாய்ந்தது. சிலருக்கு, ஆர்.எஸ்.எஸ் என்பது கலாச்சார அடையாளம், ஒழுக்கம், சேவை மற்றும் ஒரு அசாதாரண அமைப்பின் பாரம்பரியத்தைக் குறிக்கிறது. மற்றவர்களுக்கோ, இது சமூகம், அரசியல் மற்றும் நிறுவனங்களின் மீதான கருத்தியல் செல்வாக்கைப் பிரதிபலிப்பதோடு, இந்திய ஜனநாயகம் குறித்த தீவிரமான கேள்விகளையும் எழுப்புகிறது" என்று அவர் கூறினார்.

புத்தக வெளியீட்டு விழாவில் பேசிய பத்திரிகையாளரும், 'மணி கண்ட்ரோல்' (Moneycontrol) பொருளாதார கொள்கைப் பிரிவின் ஆசிரியருமான ஸ்வேதா புஞ்ச், ”தற்காலத்தில் மிகவும் தவறாகப் புரிந்து கொள்ளப்பட்ட அமைப்புகளில் ஆர்.எஸ்.எஸ்-ம் ஒன்று. இந்தியாவில் இதே காலகட்டத்தில் தொடங்கிய கம்யூனிசம் போன்ற பிற இயக்கங்கள் தப்பிப் பிழைக்கப் போராடி வரும் நிலையிலும் கூட, இன்றைய உலகில் ஆர்.எஸ்.எஸ் தொடர்ந்து ஒருங்கிணைந்த ஒன்றாக இருந்து வருகிறது" என்றார்.

அமைப்பின் உள்ளடக்கம் மற்றும் பிரதிநிதித்துவம் குறித்து சஞ்சய் சிங் கேள்விகளை எழுப்பினார். வந்தே மாதரம் தொடர்பான சமீபத்திய சர்ச்சையைச் சுட்டிக்காட்டிய சிங், தேசியவாதம் குறித்த குறுகிய வரையறையையும் கேள்விக்குட்படுத்தினார். ஆர்.எஸ்.எஸ்-ஐ குறுகிய மனப்பான்மை கொண்ட ஒரு சிறிய குழுவின் அமைப்பாக தான் பார்ப்பதாகவும், அவர்கள் தங்கள் சித்தாந்தத்தை எல்லார் மீதும் திணிக்க முயல்வதாகவும் தெரிவித்தார்.

27 09 2026 

source https://tamil.indianexpress.com/india/anthology-of-essays-for-and-against-rss-ideology-launched-12583252