கிரேட் நிக்கோபார் தீவு சுரங்க திட்டம்; 2 கடலோர கனிமத் தொகுதிகளுக்கு உரிமம் வழங்க அரசு அறிவிப்பு

 

எழுதியவர்: பிரத்யுஷ் தீப்

அந்தமான் கடலில் உள்ள கிரேட் நிக்கோபார் தீவுக்கு அருகே, 1,632 சதுர கிலோமீட்டர் பரப்பளவைக் கொண்ட மேலும் இரண்டு கடலோர கனிமத் தொகுதிகளுக்கு பல உலோகக் கட்டிகள் மற்றும் படிவுகளுக்கான கூட்டு உரிமங்கள் வழங்குவதற்காக மத்திய சுரங்க அமைச்சகம் அறிவித்துள்ளது. கூட்டு உரிமம் என்பது, ஏலத்தில் வெற்றி பெறும் நிறுவனம் சுரங்கப் பணிகளைத் தொடங்குவதற்கு முன், அந்தப் பகுதியில் மேலும் ஆய்வு செய்து கனிமங்களின் இருப்பை உறுதி செய்ய வேண்டும் என்பதாகும்.

• கிரேட் நிக்கோபார் தீவுக்கு அருகே 1,000 சதுர கிலோமீட்டர் பரப்பளவைக் கொண்ட வெஸ்ட் செவெல் ரிட்ஜ்-01 (West Sewell Ridge-01).
• கிரேட் நிக்கோபார் தீவுக்கு அருகில் உள்ள செவெல் ரைஸின் தெற்குப் பகுதியில் 632 சதுர கிலோமீட்டர் பரப்பளவைக் கொண்ட செவெல் ரைஸ்-01 (Sewell Rise-01).

பல உலோகக் கட்டிகள் மற்றும் படிவுகள் என்பது நிக்கல், கோபால்ட், மாங்கனீசு, தாமிரம் மற்றும் அரிதான புவி கூறுகள் போன்ற உலோகங்களைக் கொண்ட கடலடி கனிமப் படிவுகளாகும். நாட்டின் முதல் கடல்சார் கனிமத் தொகுதி ஏலத்தின்போது, ​​ஒரே பகுதியில் ஒரே கனிமங்களைக் கொண்ட ஏழு கடல்சார் கனிமத் தொகுதிகளை ஏலம் விட அமைச்சகம் தவறியதைத் தொடர்ந்து இந்த சமீபத்திய அறிவிப்பு வந்துள்ளது.

கடந்த நவம்பர் 2024-ல், கிரேட் நிக்கோபார் தீவுக்கு அருகிலுள்ள ஏழு தொகுதிகள் உட்பட 13 கடல்சார் கனிமத் தொகுதிகளை கூட்டு உரிமங்கள் வழங்குவதற்காக அமைச்சகம் ஏலத்தில் விட்டது. நாட்டின் கடல்சார் கனிம வளங்களை வெளிக்கொணர்வதில் ஒரு முக்கிய கட்டமாக, இந்த ஏழு தொகுதிகளுடன் கூடுதலாக, சுண்ணாம்பு சேறு கொண்ட குஜராத் கடற்கரையின் 3 தொகுதிகள் மற்றும் கட்டுமான மணல் கொண்ட கேரளக் கடற்கரையின் 3 தொகுதிகளும் அப்போது ஏலத்திற்கு வந்தது.

இருப்பினும், ஏலதாரர்கள் யாரும் முன்வராததால், டிசம்பர் 2025-ல் இந்த 13 தொகுதிகளுக்கான ஏலத்தையும் அமைச்சகம் ரத்து செய்தது. கிரேட் நிக்கோபார் தீவுக்கு அருகிலுள்ள ஏழு தொகுதிகளில், நான்கு தொகுதிகளுக்கு ஏல விண்ணப்பங்களே வரவில்லை; மீதமுள்ள மூன்று தொகுதிகளுக்குத் தொழில்நுட்ப ரீதியாகத் தகுதியான ஏலதாரர்கள் யாரும் இல்லை. இதனால் அந்த ஏழு தொகுதிகளுக்கான ஏலமும் ரத்து செய்யப்பட்டது.

வங்காள விரிகுடாவில் உள்ள அந்தமான் நிக்கோபார் தீவுக்கூட்டத்தின் தெற்கு முனையில் அமைந்துள்ள கிரேட் நிக்கோபார் தீவு, மத்திய அரசின் ரூ.72,000 கோடி மதிப்பிலான பிரம்மாண்ட உள்கட்டமைப்புத் திட்டத்தின் மையமாகவும் உள்ளது. இதில் சரக்கு பரிமாற்றத் துறைமுகம், விமான நிலையம், எரிவாயு மற்றும் சூரியமின் உற்பத்தி நிலையங்கள் மற்றும் இரண்டு புதிய கடலோர நகரங்கள் ஆகியவை அடங்கும்.

பவளப்பாறைகள், தோல்முதுகு ஆமைகள் முட்டையிடும் இடங்கள், நிக்கோபார் மெகாபோட் பறவைகளின் கூடு கூம்புகள் மற்றும் பழங்குடியினரான 'கிரேட் நிக்கோபரீஸ்' மக்களின் பூர்வீக நிலங்களுக்கு ஏற்படக்கூடிய சாத்தியமான பாதிப்புகள் உட்பட, சுற்றுச்சூழலில் ஏற்படுத்தக்கூடிய தாக்கங்கள் காரணமாக இத்திட்டம் எதிர்ப்புகளைச் சந்தித்துள்ளது.

கடல்சார் சுரங்கத் திட்டங்கள் நாட்டின் பிற பகுதிகளிலும், குறிப்பாக கேரளாவில் கடல்சார் பல்லுயிர் பெருக்கம் மற்றும் மீனவ சமூகங்களின் வாழ்வாதாரத்தின் மீதான  பாதிப்புகள் குறித்த கவலைகள் காரணமாக எதிர்ப்பை பெற்றுள்ளன.
இருப்பினும், கடல்சார் சுரங்கத்தைக் கட்டுப்படுத்தும் 'கடல்சார் பகுதிகள் கனிம (மேம்பாடு மற்றும் ஒழுங்குமுறை) சட்டம் 2002', சுற்றுச்சூழல் சமநிலை, பல்லுயிர்ப் பெருக்கம் மற்றும் மீனவர்களின் நலன்களைப் பாதுகாக்கப் போதுமான பாதுகாப்பு வழிமுறைகளைக் கொண்டுள்ளது என்று அரசு கூறி வருகிறது.

"கடல்சார் பகுதிகள் கனிம பாதுகாப்பு மற்றும் மேம்பாட்டு விதிகள், 2024-ன் படி, அங்கீகரிக்கப்பட்ட உற்பத்தித் திட்டத்தை தவிர்த்து எந்தவொரு உற்பத்தி நடவடிக்கைகளும் மேற்கொள்ளப்படாது. ஒவ்வொரு உரிமைதாரரும் ஆய்வு அல்லது உற்பத்தி நடவடிக்கைகளைத் தொடங்குவதற்கு முன் சமர்ப்பிக்க வேண்டிய உற்பத்தித் திட்டம் மற்றும் சுற்றுச்சூழல் மேலாண்மைத் திட்டத்தை தயாரிக்கும் போது, மீனவர்கள் மற்றும் உள்ளூர் சமூகங்களின் கவலைகள் குறிப்பிட்டு கவனிக்கப்படும்" என்று அரசு முன்னதாக நாடாளுமன்றத்தில் தெரிவித்திருந்தது குறிப்பிடத்தக்கது.

source https://tamil.indianexpress.com/india/government-notifies-2-more-offshore-mineral-blocks-for-licensing-near-great-nicobar-island-12580858