கூடங்குளம் 5,6 அணு உலைகள்: ரூ.1,600 கோடி மதிப்பு பணிகளைப் பெற்ற இந்திய நிறுவனங்கள்

 

கூடங்குளம் அணுமின் வளாகத்தில் ரஷ்ய வடிவமைப்பிலான 1,000 மெகாவாட் திறன் கொண்ட வி.வி.இ.ஆர் (VVER) அணு உலைகள் உள்ளன. Photograph: (Express Archive)

கூடங்குளம் அணுமின் வளாகத்தில் ரஷ்ய வடிவமைப்பிலான 1,000 மெகாவாட் திறன் கொண்ட வி.வி.இ.ஆர் (VVER) அணு உலைகள் உள்ளன. தற்போது கட்டுமானத்தில் உள்ள கூடங்குளம் 5 மற்றும் 6-வது அணு உலைகளில் 'கட்டுப்பாடு மற்றும் கருவிமயமாக்கல்' தொகுப்பை நிறுவி நிர்வகிப்பதற்கான ஒப்பந்தத்தை இரண்டு இந்திய நிறுவனங்களின் கூட்டமைப்பு வென்றுள்ளது. இது இந்தியாவின் அணுசக்தித் துறையில் உள்நாட்டுமயமாக்கலை நோக்கிய ஒரு முக்கிய மைல்கல்லாகும்.

கட்டுப்பாடு மற்றும் கருவிமயமாக்கல் என்றால் என்ன? 

இந்தத் தொகுப்பு என்பது அணுமின் நிலையத்தின் செயல்பாட்டைக் கண்காணிக்கும் அனைத்து உபகரணங்கள், சென்சார்கள், லாஜிக் மென்பொருள்கள் மற்றும் பிற அமைப்புகளை உள்ளடக்கியது. இது ஆலை திறமையாகவும் பாதுகாப்பாகவும் இயங்குவதை உறுதி செய்வதோடு, முடிவெடுக்கும் செயல்முறையையும் எளிதாக்குகிறது.

அணுசக்தித் துறையின் கீழ் இயங்கும் இ.டி.ஐ.எல் நிறுவனம், பொதுவாக இந்தியாவிலேயே தயாரிக்கப்படும் அணு உலைகளில் (PHWR) இப்பணிகளை மேற்கொண்டு வந்துள்ளது. ஆனால், வெளிநாட்டு வடிவமைப்பிலான அணு உலையில் இந்தத் தொகுப்பை அமைப்பதற்காக ஒரு தனியார் நிறுவனத்துடன் (டீமா) இ.சி.ஐ.எல் கைகோர்ப்பது இதுவே முதல்முறை.

உள்நாட்டுமயமாக்கலில் முன்னேற்றம்: கூடங்குளத்தில் உள்ள முதல் இரண்டு அணு உலைகளின் கட்டுப்பாடு மற்றும் கருவிமயமாக்கல் பணிகளை முழுமையாக ரஷ்ய நிறுவனங்களே மேற்கொண்டன. 3 மற்றும் 4-வது அணு உலைகளில், பி.ஜி.ஆர் சிஸ்டம்ஸ் (BGR Systems) என்ற இந்திய நிறுவனம் சில உபகரணங்களை வழங்கியது. ஆனால், தற்போது 5 மற்றும் 6-வது அணு உலைகளுக்கு, பொறியியல், ஒருங்கிணைப்பு, சோதனை மற்றும் செயலாக்கம் என தொடக்கம் முதல் இறுதி வரையிலான முழுப் பொறுப்பும் இ.சி.ஐ.எல் மற்றும் டீமா (TEMA) கூட்டமைப்பிடம் ஒப்படைக்கப்பட்டுள்ளது.

சமீபத்தில் அணுசக்திச் சட்டத்தில் கொண்டு வரப்பட்ட மாற்றங்களின்படி, தனியார் நிறுவனங்கள் அணுமின் நிலையங்களை நிறுவவும் இயக்கவும் வழிவகை செய்யப்பட்டுள்ளது. அதற்கு ஏற்ப இந்திய நிறுவனங்களின் பங்களிப்பை ஊக்குவிக்கும் வகையில் இந்த நடவடிக்கை எடுக்கப்பட்டுள்ளது.

டீமா நிறுவனத்தின் தலைமைச் செயல்பாட்டு அதிகாரி நரேந்திர ராவ் கூறுகையில், “அணுசக்தித் துறையில் எங்களின் சிறந்த செயல்பாடுகளுக்குச் சான்றாக இது அமைந்துள்ளது. மிக உயர்ந்த பாதுகாப்புத் தரங்களுடன் தரமான பணிகளைத் தனியார் நிறுவனங்களால் வழங்க முடியும் என்பதற்கான அங்கீகாரம் இது” என்றார்.

source https://tamil.indianexpress.com/india/indian-firms-control-and-instrumentation-russian-designed-kudankulam-5-and-6-reactors-10999303