1965-ம் ஆண்டு போர் ஹீரோ’ அப்துல் ஹமீத் புத்தகம்; போரில் அவரது பங்கு என்ன?

 

பரம் யோதா ஸ்தலத்தில் (பரம் வீர் சக்ரா பெறுபவர்களுக்கான பிரிவு) அப்துல் ஹமீத் சிலை, தேசிய போர் நினைவகம், புது டெல்லி. (Photo: Wikimedia Commons)

ஜூலை 1, 1933-ல் பிறந்த, கம்பெனி குவார்ட்டர் மாஸ்டர் ஹவில்தார் (CQMH) அப்துல் ஹமீத், 1965 இந்தியா - பாகிஸ்தான் போரின் போது நடந்த மிகப்பெரிய டாங்கி போர்களில் ஒன்றான அசால் உத்தர் போரில் பாகிஸ்தான் ராணுவத்தின் பாட்டன் டாங்கிகளை எதிர்த்துப் போராடும் போது தனது உயிரைக் கொடுத்தார். அப்துல் ஹமீதுக்கு மரணத்திற்குப் பின் இந்தியாவின் உயரிய வீர விருதான பரம் வீர் சக்ரா விருது வழங்கப்பட்டது.

ராஷ்ட்ரிய ஸ்வயம்சேவக் சங்கத் தலைவர் மோகன் பகவத், அப்துல் ஹமீத்தின் சொந்த கிராமமான தாமுபூருக்கு திங்கள்கிழமை சென்றார், அங்கே அவர் ஹமீத் பற்றிய ‘மேரே பாப்பா பரம்வீர்’ என்ற புத்தகத்தையும், ‘பாரத் கா முசல்மான்’ என்ற மற்றொரு புத்தகத்தையும் வெளியிட்டார்.

அப்துல் ஹமீத் பங்களிப்பை இங்கே பார்க்கலாம்.

முதலில் அசால் உத்தரப் போர் என்றால் என்ன?

பஞ்சாபில் அமைந்துள்ள அசால் உத்தர் இந்தியா - பாகிஸ்தான் எல்லைக்கு மிக அருகில் உள்ளது, கேம் கரன் நகரத்திலிருந்து ஏழு கிலோமீட்டர் தொலைவில் உள்ளது.

செப்டம்பர் 1965-ல் - போர் மூண்டு கிட்டத்தட்ட ஒரு மாதத்திற்குப் பிறகு - பாகிஸ்தான் ராணுவத்தின் 1 கவசப் பிரிவு எல்லையைக் கடந்து கெம் கரனின் பல பகுதிகளைக் கைப்பற்றுவதன் மூலம் தாக்குதலைத் தொடங்கியது. அவர்கள் பியாஸ் ஆற்றின் மீதுள்ள பாலத்தை அடைவதை நோக்கமாகக் கொண்டு, அமிர்தசரஸ் உட்பட பஞ்சாபின் பெரிய பகுதிகளை இந்தியாவின் பிற பகுதிகளிலிருந்து துண்டித்தனர்.

இந்த தாக்குதல் இந்தியாவின் 4வது மவுண்டன் டிவிஷனைப் பிடித்து, கெம் கரனுக்கு அருகில் நிறுத்தப்பட்டது. மேலும், பின்வாங்க வேண்டிய கட்டாயம் ஏற்பட்டது. இருப்பினும், மேற்கு ராணுவத் தளபதி லெப்டினன்ட் ஜெனரல் ஹர்பக்ஷ் சிங் 4வது மலைப் படைப் பிரிவு தலைமையகத்திற்குச் சென்ற பிறகு நிலைமை விரைவாக மாறியது. அசால் உத்தர் சாலை சந்திப்பின் உறுதியான பாதுகாப்பிற்கு அவர் அறிவுறுத்தினார். மேலும், எந்தவொரு பாகிஸ்தானிய கவசத் தாக்குதலையும் தடுக்க 2வது கவசப் படையை அந்தப் பகுதிக்கு மாற்றினார்.

செப்டம்பர் 8 மற்றும் செப்டம்பர் 10 க்கு இடையில் நடந்த போர், பாகிஸ்தானின் நடவடிக்கையை தடுத்து அழித்தொழித்தது. போரின் போது பாகிஸ்தான் ராணுவம் 97 பாட்டன் டாங்கிகளை இழந்தது. மேலும், பாகிஸ்தானின் ஒரு முழு கவசப் படைப்பிரிவும் அதன் கம்மாண்டர் அதிகாரியும் இந்திய ராணுவத்திடம் சரணடைந்தனர்.

ஆனால் போர் நிறுத்தம் அறிவிக்கப்படும் வரை கெம் கரன் நகரம் பாகிஸ்தானின் ஆக்கிரமிப்பில் இருந்தது. பாகிஸ்தானில் இந்திய ஆக்கிரமிப்பு பகுதிகளுக்கு ஈடாக கெம் கரன் இந்தியாவுக்கு திரும்ப வந்தது.

அப்துல் ஹமீது பங்களிப்பு என்ன?

அந்த நேரத்தில், அப்துல் ஹமீத் இந்திய ராணுவத்தின் 4-வது கிரெனேடியர்ஸ் பட்டாலியனில் பணியாற்றினார். அவர் அமிர்தசரஸ் - கேம் கரண் சாலையில் அமைந்துள்ள சிமா கிராமத்தின் புறநகர்ப் பகுதியில் நிறுத்தப்பட்டார். அசால் உத்தரைச் சுற்றியுள்ள கிராமங்களின் வயல்களில் எதிரிகளின் டாங்கிகளை வேட்டையாடிய பின்வாங்காத துப்பாக்கிகளின் ஒரு பிரிவிற்கு அவர் தலைமை தாங்கினார்.

செப்டம்பர் 10-ம் தேதி, ஹமீத் நான்கு பாக்கிஸ்தானிய பாட்டன் டாங்கிகளைக் கண்டுபிடித்து, அவற்றை நோக்கிச் சுட்டார். 3 டாங்கிகள் அழிக்கப்பட்டது, ​​ஒன்று முடக்கப்பட்டது. அப்படி செய்யும்போது, ​​ஹமீத் மற்றொரு பாக்கிஸ்தானிய டாங்கியின் துப்பாக்கிச் சூட்டுக்கு இலக்காகி தனது உயிரை இழந்தார்.

அவரது துணிச்சலுக்காக, அப்துல் ஹமீதுக்கு பின்னர் பரம் வீர் சக்ரா வழங்கப்பட்டது. அவர் இறந்த இடம் இப்போது போர் நினைவுச்சின்னத்தின் ஒரு பகுதியாக உள்ளது. கைப்பற்றப்பட்ட பாக்கிஸ்தானிய பாட்டன் டாங்கி கட்டிடத்தின் நுழைவாயிலில் காவலில் நிற்கிறது. அதன் கோபுரத்துடன், போரில் போராடி இறந்த இந்திய வீரர்களுக்கு அஞ்சலி செலுத்துகிறது.

source https://tamil.indianexpress.com/explained/rss-chief-mohan-bhagwat-1965-war-hero-abdul-hamid-what-was-his-role-in-the-battle-4791699