ஏனாமில் 'அர்னாப்' புயல் தாண்டவம்: 100% நெற்பயிர்கள் சேதம், மின் கம்பங்கள் சரிவு - கலெக்டருக்கு மண்டல நிர்வாகி அறிக்கை

 sourcehttps://tamil.indianexpress.com/puducherry/yanam-arnab-cyclone-damage-report-puducherry-collector-12762286

புதுச்சேரி பிராந்தியமான ஏனாமில் அர்னாப் புயல் பாதிப்பால் ஏற்பட்ட முதற்கட்ட சேத மதிப்பு குறித்து ஏனாம் மண்டல நிர்வாகி சிவராஜ் மீனா, புதுச்சேரி ஆட்சியருக்கு கடிதம் அனுப்பியுள்ளார்.

கடலோர ஆந்திரா மற்றும் புதுச்சேரியின் ஏனாம் பிராந்தியத்தைத் தாக்கிய 'அர்னாப்' அதிதீவிர புயலால் ஏற்பட்டுள்ள முதற்கட்ட சேதங்கள் குறித்த அறிக்கையை ஏனாம் மண்டல நிர்வாகி சிவராஜ் மீனா, புதுச்சேரி மாவட்ட ஆட்சியருக்கு அனுப்பியுள்ளார். மணிக்கு 150 கி.மீ. வேகத்தில் வீசிய பலத்த காற்றால் உயிரிழப்புகள் ஏதும் ஏற்படவில்லை என்றாலும், 100% பயிர் சேதம், மின்கம்பங்கள் மற்றும் வீடுகள் சேதமடைந்து பெரும் பாதிப்பு ஏற்பட்டுள்ளது

அந்தக் கடிதத்தில்: மண்டல நிர்வாகி, யானம் - அர்னாப் புயல் - முதற்கட்ட சேத மதிப்பீட்டு அறிக்கை சமர்ப்பிக்கப்பட்டது.

நான் சமர்ப்பிப்பது என்னவென்றால், "அர்னாப்" என்ற கடுமையான புயல், 27-10-2026 அன்று கடலோர ஆந்திரப் பிரதேசம் மற்றும் யானத்தைத் தாக்கியுள்ளது. புயலின் போது மணிக்கு 125 கி.மீ. வரை பலத்த காற்று வீசியதாகவும், அதன் வேகம் மணிக்கு 150 கி.மீ. வரை அதிகரித்ததாகவும் தெரிவிக்கப்பட்டுள்ளது. மனித உயிரிழப்பு எதுவும் பதிவாகவில்லை, கால்நடைகள் இறப்பு எதுவும் பதிவாகவில்லை. பல பெரிய மரங்கள் மின்சாரப் பாதைகளின் மீது விழுந்து, உள்கட்டமைப்பிற்கு கணிசமான சேதத்தை ஏற்படுத்தியுள்ளன. மரங்கள் மற்றும் மின் கம்பங்கள் விழுந்ததால் பெரும்பாலான சாலைகள் தடைபட்டுள்ளன. தீயணைப்புத் துறை, தேசிய பேரிடர் மீட்புப் படை (NDRF), பொதுப்பணித்துறை (PWD) பணியாளர்கள் மற்றும் மின்சாரத் துறை ஆகியோர் தடைபட்ட பாதைகளைச் சீரமைக்க தங்களால் இயன்றவரை முயற்சி செய்து வருகின்றனர். இதுவரை பெரும்பாலான பாதைகள் சீரமைக்கப்பட்டுள்ளன.

இதுவரை மேற்கொள்ளப்பட்ட முதற்கட்ட சேத மதிப்பீடு பின்வருமாறு:

வேளாண்மைத் துறை: 100% (101 ஹெக்டேர்) நெற்பயிர் சேதமடைந்துள்ளது. 20க்கும் மேற்பட்ட தென்னை மரங்கள் விழுந்துள்ளன.

கால்நடை வளர்ப்புத் துறை: சுமார் 25 மாட்டுக்கொட்டகைகள் (முழுமையாக/பகுதியாக) சேதமடைந்ததாகத் தெரிவிக்கப்பட்டுள்ளது.

மின்சாரத் துறை: 35க்கும் மேற்பட்ட உயர் மின்னழுத்த (HT) மற்றும் 25க்கும் மேற்பட்ட குறைந்த மின்னழுத்த (LT) கம்பங்கள் விழுந்துள்ளதாகவும், மேலும் 02 கம்பங்கள் சேதமடைந்துள்ளதாகவும் மதிப்பிடப்பட்டுள்ளது. கிரியம்பேட்டா, சாவித்திரி நகர், தரியலத்திப்பா ஆகிய பகுதிகளைத் தவிர்த்து, ஏனாம் மண்டலத்தின் பிற பகுதிகளில் 15 கி.மீ. தூரத்திற்கு மின்மாற்றிகள் மற்றும் கடத்திகள் சேதமடைந்துள்ளன. 27.10.2026 அன்று மாலை 4.00 மணிக்கு மின் விநியோகம் நிறுத்தப்பட்டது, இன்னும் அது மீண்டும் வழங்கப்படவில்லை.

வருவாய்த் துறை: சுமார் 60 தற்காலிக வீடுகள் இடிந்து விழுந்தன/சேதமடைந்தன (முழுமையாக/பகுதியாக) அறிக்கை செய்யப்பட்டுள்ளது. மேலும், 500-க்கும் மேற்பட்ட பெரிய மரங்கள் கீழே விழுந்துள்ளன. மரங்களின் கிளைகள் வேரோடு சாய்ந்ததாலும்/விழுந்ததாலும் கணிசமான எண்ணிக்கையிலான அரசு கட்டிடங்கள் (சுற்றுச்சுவர், கட்டிடங்களின் சில பகுதிகள் போன்றவை) சேதமடைந்துள்ளதாக மதிப்பிடப்பட்டுள்ளது.

பல படகுகள் சேதமடைந்துள்ளதாகத் தெரிவிக்கப்பட்டுள்ளது. இருப்பினும், பலத்த காற்று காரணமாக, சேதமடைந்த படகுகளின் எண்ணிக்கையை சம்பந்தப்பட்ட துறை அதிகாரிகளால் மதிப்பிட முடியவில்லை.

கனமழை காரணமாக, சில சாலை உள்கட்டமைப்புகளும் பாதிக்கப்பட்டுள்ளன. தகவல் தொடர்பு அமைப்பான அலைபேசி இணைப்பு பகுதியளவு பாதிக்கப்பட்டுள்ளது மற்றும் இணைய இணைப்பு முற்றிலும் பாதிக்கப்பட்டுள்ளது, அது இன்னும் சீரமைக்கப்படவில்லை.

இது தொடர்பாக, மீண்டும் பலத்த காற்றும் மழையும் தீவிரமடைந்துள்ளதாகவும், இந்திய வானிலை ஆய்வு மையத்தின் (IMD) அறிக்கைகளின்படி, இன்று அதாவது 28.10.2026, மாலை 4 மணி வரை இது தொடரும் என எதிர்பார்க்கப்படுவதாகவும் தெரிவித்துக் கொள்கிறேன்.” என்று ஏனாம் மண்டல நிர்வாகி சிவராஜ் மீனா தெரிவித்துள்ளார்.

செய்தி: பாபு ராஜேந்திரன் - புதுச்சேரி

Read More

தமிழ்நாடு சுற்றுலா வளர்ச்சி கழகத்தின் 2 நாள் டூர் பேக்கேஜ்;

 

தமிழ்நாடு சுற்றுலா வளர்ச்சிக் கழகம் (TTDC) சார்பில் மாணவர்களுக்காக பிரத்யேக கல்விச் சுற்றுலா திட்டங்கள் அறிமுகம் செய்யப்பட்டுள்ளது.  இதன் மூலம் தமிழகத்தின் முக்கிய வரலாற்றுச் சிறப்புமிக்க இடங்கள், அருங்காட்சியகங்கள் மற்றும் பாரம்பரியத் தலங்களை மாணவர்கள் நேரில் பார்வையிட்டு அனுபவக் கல்வி பெறலாம். இரண்டு நாட்கள் திட்டமிடப்பட்டுள்ள இந்த சுற்றுலாவிற்கு ஒரு நபருக்கு ரூ. 6,400 கட்டணமாக வசூலிக்கப்படுகிறது. 

இதில் குறிப்பிட்ட இடத்தை உங்களுக்கு விளக்கி கூறும் வழிகாட்டி, தங்கும் இடம், உணவு ஆகியவை அடங்கும். சென்னையில் இருந்து தொடங்கும் இந்த சுற்றுலாவில் முதல் நாள் முழுவதும் மதுரையை சுற்றி பார்ப்பதற்காக செலவிடப்பட உள்ளது. இதில், கீழடி அகழ்வாராய்ச்சி, திருமலை நாயக்கர் மஹால், காந்தி நினைவு மியூசியம் ஆகியவற்றை நீங்கள் பார்வையிடலாம்.

இரண்டாவது நாள் மாணவர்கள் திருநெல்வேலியில் பொருநை அருங்காட்சியத்தை பார்வையிடுவதன் மூலம் சுற்றுலா நிறைவடைகிறது. சுற்றுலாவில் பங்கேற்க விருப்பமுள்ள மாணவர்கள் ttdcbooking.com என்ற இணையதளம் மூலம் பதிவு செய்து கொள்ளலாம். 

Read More

முன் பின் இயக்கப்பட்ட விமானங்கள் தப்பியது எப்படி? விசாரணை தீவிரம்

 source https://tamil.indianexpress.com/india/uttarakhand-chopper-crash-badrinath-flight-operations-weather-trans-bharat-aviation-crash-dgca-co-pilot-rule-12772515

சனிக்கிழமை அன்று, சாமோலி ஹெலிகாப்டர் விபத்தில் பலியானவர்களின் உடல்களை மாநில பேரிடர் மீட்புப் படையினர் (SDRF) சுமந்து சென்ற போது எடுத்த படம். (பி.டி.ஐ)

Vidheesha Kuntamalla

உத்தராகண்ட் மாநிலத்தின் ஸ்தான் மார்வாடிப் பகுதியில் வெள்ளிக்கிழமை விபத்துக்குள்ளான 'டிரான்ஸ் பாரத் ஏவியேஷன்' (Trans Bharat Aviation) நிறுவனத்தின் ஹெலிகாப்டர் புறப்பட்ட சிறிது நேரத்திலேயே, பத்ரிநாத்திலிருந்து புறப்பட்ட வேறு இரண்டு ஹெலிகாப்டர்கள் பத்திரமாகத் தங்களது இலக்குகளைச் சென்று அடைந்துள்ளதாக இந்தியன் எக்ஸ்பிரஸ் செய்தி நிறுவனத்திற்குத் தெரியவந்துள்ளது.

விபத்துக்குள்ளான ஹெலிகாப்டர் புறப்பட்ட 8 நிமிடங்களுக்குப் பிறகு ஒரு ஹெலிகாப்டரும், சுமார் ஒரு மணி நேரத்திற்குப் பிறகு மற்றொரு ஹெலிகாப்டரும் புறப்பட்டுச் சென்றுள்ளன. மேலும், இந்த விமானத்திற்கு முன்பாகப் பயணத்தைத் தொடங்கிய இரு ஹெலிகாப்டர்களும் தங்களது பயணத்தைப் பாதுகாப்பாக நிறைவு செய்துள்ளதாக அதிகாரிகள் தெரிவித்துள்ளனர்.

ஆரம்பத்தில் அதிகாரிகள் குறிப்பிட்டது போல, இந்த விபத்து "மோசமான வானிலை" காரணமாக மட்டுமே ஏற்பட்டதா அல்லது வேறு பல காரணங்களின் கூட்டு விளைவா என்பதைப் புரிந்துகொள்ள மேற்கொள்ளப்படும் விசாரணையில் இந்த விவரங்களும் ஒரு முக்கியப் பகுதியாக எடுத்துக்கொள்ளப்படும் என அதிகாரிகள் சுட்டிக்காட்டியுள்ளனர்.

வெள்ளிக்கிழமை காலை 9 மணி முதல் நண்பகல் 12 மணி வரை மோசமான வானிலை காரணமாக பத்ரிநாத் பள்ளத்தாக்கில் ஹெலிகாப்டர் போக்குவரத்து 3 மணி நேரம் நிறுத்தி வைக்கப்பட்டிருந்தது. பின்னர் வானிலை சீரடைந்ததும் மீண்டும் விமானங்கள் இயக்கப்பட்டன.

டிரான்ஸ் பாரத் ஹெலிகாப்டர் மதியம் 12.20 மணிக்கு டேராடூனில் இருந்து புறப்பட்டு, மதியம் 1.11 மணிக்கு பத்ரிநாத்தை அடைந்தது. தரை இறங்கிய உடனேயே, டேராடூன் திரும்புவதற்காக 5 பயணிகளைப் பைலட் ஏற்றியுள்ளார். அந்த மறுபயணத்தின் போதே இந்த ஹெலிகாப்டர் விபத்துக்குள்ளானது.

"இந்தப் பயணம் பத்ரிநாத்திலிருந்து தான் புதிதாகத் தொடங்கியது என்பது போல இல்லை; ஏற்கனவே டேராடூனில் இருந்து பத்ரிநாத்திற்குப் வெற்றிகரமாக வந்து சேர்ந்த பிறகே மீண்டும் டேராடூன் நோக்கிச் சென்றுள்ளது. அதற்கு முன்பும் இரு விமானங்கள் வெற்றிகரமாக இயக்கப்பட்டன. அதேபோல், இந்த ஹெலிகாப்டருக்குப் பிறகும் இரு விமானங்கள் பத்திரமாக டேராடூனைச் சென்றடைந்துள்ளன. எனவே உண்மையில் என்ன தவறு நடந்தது என்பதில் தெளிவில்லை — அது ஒரு குறிப்பிட்ட பகுதியில் திடீரென மாறிய உள்ளூர் வானிலையாக இருக்கலாம் அல்லது வேறு ஏதேனும் பிரச்சனையாகவும் இருக்கலாம்" என்று பெயர் குறிப்பிட விரும்பாத அதிகாரி ஒருவர் தெரிவித்துள்ளார்.

வெள்ளிக்கிழமை அன்று, உத்தராகண்ட் மாநிலம் சாமோலியில் விபத்துக்குள்ளான ஹெலிகாப்டரின் இடிபாடுகள். (ஏ.என்.ஐ)

விபத்து நடந்த நேரத்தில் அந்த பகுதியில் நிலவிய வானிலை சூழலைப் புரிந்து கொள்வதற்காக, அந்த நேரத்தில் அப்பகுதியில் ஹெலிகாப்டர் இயக்கிய பைலட்களிடம் அதிகாரிகள் விசாரணை நடத்தி வருகின்றனர்.

விமான விபத்து புலனாய்வு அமைப்பு (AAIB) குழு விபத்து நடந்த இடத்தை அடைந்துள்ளது. சம்பவங்களின் வரிசையைத் துல்லியமாகக் கணிப்பதற்காக ஹெலிகாப்டரின் உதிரிப்பாகங்களைச் சேகரிக்கும் பணிகள் தீவிரமாக நடந்து வருகின்றன.

"பிளாக் பாக்ஸ் (Black Box) இன்னும் எங்களுக்குக் கிடைக்கவில்லை. எங்கள் குழு விபத்து இடத்தில் உள்ளது. சூழலை முழுமையாக ஆய்வு செய்ய முடிந்தவரை அதிக பாகங்களை மீட்க முயன்று வருகிறோம். ஹெலிகாப்டரின் வால் பகுதி மட்டுமே ஓரளவிற்குச் சேதமடையாமல் உள்ளதாகவும், மற்ற பாகங்கள் அனைத்தும் முற்றிலுமாக அழிந்துவிட்டது” என்று அந்த அதிகாரி கூறினார்.

சமோலி மாவட்ட நிர்வாகத்தின் ஆரம்பக்கட்ட நடவடிக்கை அறிக்கையில், ஹெலிகாப்டர் ஹாதி பர்வாத் பகுதியில் மோசமான வானிலையை எதிர்கொண்டதாகவும், தாழ்வான பகுதிக்கு இறங்க முயன்றபோது விபத்துக்குள்ளானதாகவும் கூறப்பட்டிருந்தது. இந்திய வானிலை மையம் அக்டோபர் 30 அன்று சமோலி பகுதிக்கு ஆரஞ்சு எச்சரிக்கை விடுத்திருந்ததுடன், இடி மின்னல், ஆலங்கட்டி மழை மற்றும் 40-50 கி.மீ வேகத்தில் பலத்த காற்று வீசக்கூடும் என்றும் எச்சரித்திருந்தது.

கடினமான பாதை காரணமாக உடல்களை மீட்பதில் தாமதம்
இதற்கிடையில், விபத்து நடந்த பகுதியின் கடினமான நிலப்பரப்பு காரணமாக பலியான 6 பேரின் உடல்களையும் மீட்பதில் சிக்கல் நீடிக்கிறது. விபத்து நடந்த இடம் அருகிலுள்ள சாலைப் பகுதியிலிருந்து 20-22 கி.மீ தொலைவில் உள்ளதால், கடினமான மலைப்பாதை வழியாக நடந்து மட்டுமே அங்கு செல்ல முடியும்.

உடல்களை மீட்டு அருகிலுள்ள சாலைப் பகுதிக்குக் கொண்டு வர தேசிய பேரிடர் மீட்புப் படை (NDRF) மற்றும் மாநில பேரிடர் மீட்புப் படை (SDRF) இணைந்த குழு சனிக்கிழமை காலை அனுப்பி வைக்கப்பட்டது.

இதுகுறித்து உத்தராகண்ட் சிவில் விமானப் போக்குவரத்து வளர்ச்சி ஆணையத்தின் முதன்மை நிர்வாக அதிகாரி (CEO) பிரதீக் ஜெயின் கூறுகையில், "மீட்புக் குழுவினர் கடந்த 12 மணி நேரமாகப் பயணத்தில் உள்ளனர். அவர்கள் உடல்களுடன் அருகிலுள்ள சாலைப் பகுதிக்கு வந்து சேர்வார்கள். அங்கிருந்து மாவட்ட நிர்வாகம் ஆம்புலன்ஸ் மூலம் உடல்களை ஜோஷிமடத்திலிருந்து ரிஷிகேஷிற்கு கொண்டு செல்லும். அங்கு பிரேதப் பரிசோதனை செய்யப்பட்ட பிறகு உடல்கள் குடும்பத்தினரிடம் ஒப்படைக்கப்படும்" என்றார்.

சாட்டர் விமானங்களுக்குக் கட்டாயம் இரு பைலட்கள்

இதனிடையே, இந்த சீசனின் எஞ்சிய நாட்களில் இயக்கப்படும் அனைத்து சாட்டர் (Charter) ஹெலிகாப்டர்களிலும் இணை பைலட் (Co-pilot) இருப்பது கட்டாயம் என விமானப் போக்குவரத்து கட்டுப்பாட்டு அமைப்பான டி.ஜி.சி.ஏ. முடிவெடுத்துள்ளது.

விபத்தைத் தொடர்ந்து சனிக்கிழமை நடைபெற்ற ஆலோசனைக் கூட்டத்திற்குப் பிறகு, சாட்டர் விமானங்களை ஒரு பைலட் மட்டும் இயக்குவதற்கு அனுமதி அளிக்கப்படாது என்று முடிவு செய்யப்பட்டது.

"ஒரே பைலட் மட்டும் ஹெலிகாப்டரை இயக்க அனுமதிக்க மாட்டோம் என சி.ஜி.சி.ஏ முடிவெடுத்துள்ளது. இனி சாட்டர் விமானங்களுக்கு இணை பைலட் கட்டாயமாக்கப்பட்டுள்ளது. அதேவேளையில் விபத்துக்கான காரணம் குறித்த மேல் விசாரணை தொடர்ந்து நடைபெற்று வருகிறது" என்று பிரதீக் ஜெயின் தெரிவித்தார்.

Read More