தலித், ஆதிவாசி, ஓ.பி.சி.,களின் பாதையை தடுக்கும் சுவர்; ராகுல் காந்தி பேச்சு

தலித்துகள், ஆதிவாசிகள் மற்றும் ஓ.பி.சி பிரிவினரின் பாதைகளைத் தடுக்கும் தடைகளை பிரதமர் நரேந்திர மோடியும் ஆர்.எஸ்.எஸ் அமைப்பும் வலுப்படுத்துவதாக மக்களவை எதிர்க்கட்சித் தலைவர் ராகுல் காந்தி செவ்வாய்க்கிழமை குற்றம்சாட்டினார்.

டெல்லியில் உள்ள தல்கடோரா ஸ்டேடியத்தில் நடந்த 'சம்விதன் ரக்ஷக் அபியான்' (அரசியலமைப்பைக் காப்பாற்றுங்கள்) நிகழ்ச்சியில் பேசிய ராகுல் காந்தி, ஐக்கிய முற்போக்குக் கூட்டணி) அரசாங்கம் இந்தத் தடைகளைத் தகர்த்தெறியும் முயற்சிகளை மேற்கொண்டாலும், அது "சுவரைத் தேவையான அளவுக்கு வலுவிழக்கச் செய்யவில்லை" என்று கூறினார்.

ராகுல் காந்தி தனது உரையின் போது, அரசியலமைப்பின் முக்கியத்துவத்தை வலியுறுத்தினார், “பிரதமர் மோடி அரசியலமைப்பை படிக்கவில்லை என்று என்னால் உத்தரவாதம் அளிக்க முடியும்; அவர் படித்து இருந்தால், அவர் தினசரி என்ன செய்கிறாரோ, அதை செய்ய மாட்டார்,” என்று ராகுல் காந்தி கூறினார். அரசியலமைப்பு ஒரு ஆவணம் மட்டுமல்ல, ஆயிரக்கணக்கான ஆண்டுகளாக வளர்க்கப்பட்ட இந்தியாவின் உண்மை மற்றும் அகிம்சையின் மதிப்புகளை உள்ளடக்கியது என்று ராகுல் காந்தி வலியுறுத்தினார்.

"நாட்டின் ஒட்டுமொத்த அமைப்பும் தலித்துகள், ஆதிவாசிகள் மற்றும் பிற்படுத்தப்பட்ட வகுப்பினருக்கு எதிராக உள்ளது" என்று சுட்டிக்காட்டிய ராகுல் காந்தி, "தலித்துகள், ஆதிவாசிகள் மற்றும் ஓ.பி.சி.,களின் வழியில் ஒரு சுவர் நிற்கிறது, மேலும் மோடி ஆர்.எஸ்.எஸ்.,ஸுடன் சேர்ந்து அந்த சுவரில் சிமெண்ட் சேர்த்து வலுப்படுத்துகிறார்," என்று கூறினார்.

மகாத்மா காந்தி தேசிய ஊரக வேலை வாய்ப்பு உறுதி திட்டம் (MGNREGA) மற்றும் உணவுக்கான உரிமை போன்ற ஐக்கிய முற்போக்கு கூட்டணி அரசின் முன்முயற்சிகளை ராகுல் காந்தி பிரதிபலித்தார், மேலும், இந்த முன்முயற்சிகள் அந்த தடைகளை பலவீனப்படுத்துவதை நோக்கமாகக் கொண்டதாகவும் ராகுல் காந்தி கூறினார். ஆனால் அவர்கள் (பா.ஜ.க) அந்த சுவரை கான்கிரீட் போட்டு பலப்படுத்துகிறார்கள்,” என்று ராகுல் காந்தி கூறினார்.

தெலங்கானாவில் நடந்து வரும் சாதிவாரி கணக்கெடுப்பு ஒரு குறிப்பிடத்தக்க முன்னேற்றம் என்று ராகுல் காந்தி பாராட்டினார், "காங்கிரஸ் எங்கு ஆட்சிக்கு வந்தாலும் அதையே செய்யும்" என்று ராகுல் காந்தி உறுதியளித்தார்.

கூடுதல் தகவல்கள்: பி.டி.ஐ

source  https://tamil.indianexpress.com/india/pm-modi-rss-strengthening-wall-that-obstructs-path-of-dalits-adivasis-obcs-rahul-gandhi-7610832