சென்னை மாநகரப் பேருந்துகளில் (MTC) பயணம் செய்யும் பயணிகள், இனி நீண்ட வரிசையில் காத்திருக்காமல், ரூ.1000 மற்றும் ரூ.2000 மதிப்புள்ள மாதாந்திர பயணச்சீட்டுகளை (Monthly Passes) நேரடியாக 'சென்னை ஒன் ஆப்' (Chennai One App) மூலமாகவே பெற்றுக்கொள்ளலாம் எனப் போக்குவரத்துத் துறை அறிவித்துள்ளது. இதுகுறித்துத் தமிழ்நாடு போக்குவரத்துத் துறை வெளியிட்டுள்ள முக்கிய அறிவிப்புகள் பின்வருமாறு:
2 வகை டிஜிட்டல் பாஸ்கள்: பயணிகளின் வசதிக்காக ஏற்கனவே அறிமுகப்படுத்தப்பட்ட இரண்டு வகையான மின்னணு பயணச்சீட்டுகளை இனி செயலி மூலம் பெறலாம். கோல்டு (GOLD) - ரூ.1000, இது குளிர்சாதன வசதி இல்லாத (Non-AC) பேருந்துகளில் செல்லுபடியாகும். டைமண்ட் (DIAMOND) - ரூ.2000, இது குளிர்சாதன பேருந்துகள் உட்பட அனைத்துப் பேருந்துகளிலும் (All Buses) செல்லுபடியாகும்.
பயன்படுத்தும் முறை மற்றும் விதிமுறைகள்:
பயணிகள் 'சென்னை ஒன்' செயலியில் பயணச்சீட்டைப் பெற்ற பிறகு, பேருந்து நடத்துனரிடம் (Conductor) அதை மின்னணு வடிவில் காட்ட வேண்டும். அப்போது உங்களது மொபைல் போனில் நேரம் சரியாக உள்ளதா என்பதை உறுதிப்படுத்திக் கொள்ள வேண்டும். நடத்துனர் அந்தப் பயணச்சீட்டில் உள்ள பெயர், செல்லுபடியாகும் தேதி மற்றும் பிற விவரங்கள் சரியாக உள்ளனவா என்பதைச் சரிபார்ப்பார்.
பயணச்சீட்டைக் காட்டிய பின், உரிய OTP-ஐ (One Time Password) உள்ளீடு செய்தோ அல்லது QR குறியீட்டை ஸ்கேன் செய்தோ பயணச்சீட்டை உறுதி செய்ய வேண்டும். பயணச்சீட்டில் குறிப்பிடப்பட்டுள்ள தேதியிலிருந்து தொடர்ந்து 30 நாட்கள் மட்டுமே இதைப் பயன்படுத்த முடியும். காலாவதியான பயணச்சீட்டுகளைப் பயன்படுத்த அனுமதி இல்லை.
பேருந்து நடத்துனர்கள், பயணிகள் காட்டும் அனைத்து மின்னணு பயணச்சீட்டுகளையும் கட்டாயம் ஸ்கேன் செய்ய வேண்டும் அல்லது அதற்குரிய எண்ணைப் பதிவு செய்து ரசீது வழங்க வேண்டும் என அறிவுறுத்தப்பட்டுள்ளது. இந்தப் புதிய டிஜிட்டல் நடைமுறை குறித்து ரூ.1000 மற்றும் ரூ.2000 பயணச்சீட்டுகளைப் பயன்படுத்தும் பயணிகளுக்குப் போதுமான விழிப்புணர்வை ஏற்படுத்த வேண்டும் என்றும் போக்குவரத்துத் துறை கேட்டுக் கொண்டுள்ளது.
source https://tamil.indianexpress.com/tamilnadu/no-more-queues-chennai-commuters-can-now-get-mtc-passes-on-mobile-buy-1000-2000-bus-passes-via-chennai-one-app-10809060
