காங்கிரஸ் பேச்சுவார்த்தை குழு இன்று சென்னையில் முகாம்: தி.மு.க-விடம் கூடுதல் சீட் கேட்க முடிவு

காங்கிரஸ் பேச்சுவார்த்தை குழு இன்று சென்னையில் முகாம்: தி.மு.க-விடம் கூடுதல் சீட் கேட்க முடிவு

காங்கிரஸ் தேசியத் தலைவர் மல்லிகார்ஜுன கார்கே அமைத்துள்ள 5 பேர் கொண்ட காங்கிரஸ் மேலிடக் குழு, ஞாயிற்றுக்கிழமை சென்னை வருகிறது. 2026 சட்டமன்றத் தேர்தலில், கடந்த முறையை விட அதிகமான இடங்களை முக்கியக் கூட்டணிக் கட்சியான தி.மு.க.விடம் கேட்டுப் பெறுவதே இக்குழுவின் முக்கிய நோக்கமாகும்.

தமிழக காங். தலைவர் கருத்து: இதுகுறித்து ‘டைம்ஸ் ஆஃப் இந்தியா’விடம் பேசிய தமிழக காங்கிரஸ் கமிட்டித் தலைவர் செல்வப்பெருந்தகை, இம்முறை காங்கிரஸ் கட்சி தனது கோரிக்கையில் உறுதியாக இருக்கும் என்று தெரிவித்தார். நாங்க உண்மையான கூட்டாளிகள். எங்களுக்குக் கேட்பதற்கான உரிமையும், அவர்களுக்குக் கொடுப்பதற்கான மனமும் உள்ளது. எங்களுக்குள் எந்தப் பிரச்னையும் இருக்காது என்றார் அவர். மேலும், கடந்த சட்டமன்றத் தேர்தலில் தி.மு.க.வை விட காங்கிரஸின் வெற்றி விகிதம் (strike rate) அதிகமாக இருந்ததையும் அவர் சுட்டிக் காட்டினார்.

ஆலோசனைக் கூட்டம்: கிரிஷ் சோடங்கர் தலைமையிலான இந்தக் குழு, ஞாயிறன்று செல்வப்பெருந்தகை, சட்டப்பேரவை காங்கிரஸ் தலைவர் ராஜேஷ் குமார் மற்றும் அகில இந்திய காங்கிரஸ் கமிட்டி (AICC) செயலாளர்கள் சூரஜ் ஹெக்டே, நிவேதித் ஆல்வா ஆகியோரைச் சந்தித்துப் பேசுகிறது. தொடர்ந்து அடுத்த வாரம் தி.மு.க.வுடன் பேச்சுவார்த்தை தொடங்க உள்ளது. 40 இடங்கள், ஆட்சி அதிகாரத்தில் பங்கு? டெல்லியில் நடந்த ஆலோசனையில் கலந்துகொண்ட காங்கிரஸ் தலைவர் ஒருவர் கூறுகையில், "இம்முறை காங்கிரஸ் 40 தொகுதிகளையும், ஆட்சி அமைப்பதில் பங்கையும் (Power Sharing) கேட்க வாய்ப்புள்ளது" என்றார்.

"2006-ல் 96 இடங்களில் வென்ற கருணாநிதி தலைமையிலான அரசு முழுமையாகச் செயல்பட, 34 எம்.எல்.ஏ-க்களைக் கொண்ட காங்கிரஸ் ஆதரவு அளித்தது. இப்போது நாங்க ஆட்சி அதிகாரத்தில் பங்கு கேட்பதில் என்ன தவறு இருக்கிறது?" என்று அவர் கேள்வி எழுப்பினார். பேச்சு வார்த்தைக் குழுவில் இடம்பெற்றுள்ள ராஜேஷ் குமார், நீண்ட காலமாகவே ஆட்சி அதிகாரப் பகிர்வை வலியுறுத்தி வருபவர் என்பது குறிப்பிடத்தக்கது.

குறைந்து வரும் தொகுதிகள்: தேர்தலுக்குத் தேர்தல் காங்கிரஸ் போட்டியிடும் இடங்களின் எண்ணிக்கை குறைந்து கொண்டே வருகிறது:

2011: 63 இடங்கள் (வெற்றி: 5)

2016: 41 இடங்கள் (வெற்றி: 8)

2021: 25 இடங்கள் (வெற்றி: 18)

கள நிலவரம் மற்றும் கூட்டணி: வெற்றி வாய்ப்புள்ள தொகுதிகள் எவை என்பது குறித்து காங்கிரஸ் கள ஆய்வு செய்து வருகிறது. "நாங்க பெறும் தொகுதிகளில் இம்முறை சில மாற்றங்கள் இருக்க வாய்ப்புள்ளது. காமராஜர் ஆட்சியை மீண்டும் கொண்டுவருவதே எங்கள் லட்சியம்" என்று செல்வப்பெருந்தகை கூறினார்.

சமீபத்தில் த.வெ.க (TVK) தலைவர் விஜய்யை காங்கிரஸ் நிர்வாகி ஒருவர் சந்தித்தது குறித்த கேள்விக்கு, "காங்கிரஸ் மற்றும் த.வெ.க இடையே அதிகாரப்பூர்வமான பேச்சுவார்த்தை எதுவும் நடைபெறவில்லை" என்று செல்வப்பெருந்தகை விளக்கமளித்தார். மேலும் அவர், "தி.மு.க - காங். கூட்டணி வலுவாகவும், இணக்கமாகவும் உள்ளது. அ.தி.மு.க என்பது பா.ஜ.க.வின் கைப்பாவையாக செயல்படுகிறது" என்று விமர்சித்தார். பீகார் தேர்தல் முடிவுகள் தமிழகத் தேர்தலில் எந்தத் தாக்கத்தையும் ஏற்படுத்தாது என்றும் அவர் குறிப்பிட்டார்.

source https://tamil.indianexpress.com/tamilnadu/tn-elections-2026-congress-panel-visits-chennai-to-seek-more-seats-from-dmk-10804130