சென்னை அருகே நிலப் பகுதியில் ஊடுருவிய 'மாஜி' டித்வா: கோவை வரை இத்தனை மாவட்டங்களில் இன்று மழை 3 12 2025
/indian-express-tamil/media/media_files/2025/12/03/rain-alert-2025-12-03-07-58-20.jpg)
வங்கக்கடலில் உருவான 'டித்வா' என்றழைக்கப்பட்ட ஆழ்ந்த காற்றழுத்த தாழ்வு மண்டலம், தற்போது 'மாஜி' டித்வா என்ற பெயரில் சென்னை அருகே ஓரளவு நிலப்பகுதிக்குள் நகர்ந்துள்ளது. இதன் காரணமாக, தமிழகத்தின் பல மாவட்டங்களில் இன்று கனமழை பெய்ய வாய்ப்புள்ளதாக தனியார் வானிலை ஆய்வாளர் பிரதீப் ஜான் தெரிவித்துள்ளார்.
நேற்று (செவ்வாய்க்கிழமை) இரவு முதல் இன்று அதிகாலை வரை, கடலோர தமிழகம் மற்றும் சென்னை மாநகரப் பகுதிகளில் பலத்த இடியுடன் கூடிய கனமழை கொட்டித் தீர்த்தது. குறிப்பாக, காஞ்சிபுரம், திருவள்ளூர், சென்னை, செங்கல்பட்டு பகுதிகளில் இடைவிடாத மிகத் தீவிரமான மழைப் பொழிவு பதிவானது. நீண்ட நாட்களாக மழைக்காக காத்திருந்த தென் சென்னை பகுதிகளிலும் தற்போது பலத்த மழை பெய்துள்ளது.
இந்த 'மாஜி' டித்வா அமைப்பு இன்னும் சில மணி நேரங்களில் முழுவதுமாக நிலப்பகுதிக்குள் நுழையும் என எதிர்பார்க்கப்படுகிறது. இது உள்நோக்கி நகர்வதால், கடலோர மாவட்டங்கள் மட்டுமின்றி, உள் மாவட்டங்களிலும் மழை வாய்ப்பு அதிகரித்துள்ளது.
இதன் நகர்வு காரணமாக இன்று அதிக மழை பெறவுள்ள மாவட்டங்கள்:
திருவண்ணாமலை
கடலூர்
புதுச்சேரி
விழுப்புரம்
சேலம்
கள்ளக்குறிச்சி
வேலூர்
இராணிப்பேட்டை ஆகிய மாவட்டங்கள், மாஜி டித்வாவின் முக்கிய தாக்கத்திற்கு உள்ளாகி பலத்த மழையைப் பெறும்.
பரவலாக மழை பெறும் இதர மாவட்டங்கள்:
அதே சமயம், இந்த அமைப்பிற்கு நீர்வழங்கும் மேகக்கூட்டங்கள் தென் தமிழகம் மற்றும் மேற்கு தமிழகப் பகுதிகளிலும் வலுவாகப் பரவியுள்ளன. இதன் காரணமாக, கீழ்க்கண்ட மாவட்டங்களிலும் இன்று நல்ல மழைக்கு வாய்ப்புள்ளது:
கோவை
மதுரை
திண்டுக்கல்
புதுக்கோட்டை
திருவாரூர்
நாகப்பட்டினம் ஆகிய மாவட்டங்களில் குறிப்பிடத்தக்க மழைப்பொழிவு இருக்கும்.
சமூக ஊடகங்களில் வெளியான தகவல் படி, இன்று தமிழகத்தின் அனைத்து மாவட்டங்களும் 'மாஜி' டித்வாவின் நகர்வு காரணமாக நிச்சயம் பலன் பெறும் என எதிர்பார்க்கப்படுகிறது. ஒட்டுமொத்த தமிழகமும் இந்த மழை அமைப்பால் நன்மை அடையும் ஒரு நாளாக இன்று இருக்கும் என வானிலை ஆய்வாளர் கணித்துள்ளார். பொதுமக்கள் மழைக் கால முன்னெச்சரிக்கை நடவடிக்கைகளை மேற்கொள்ளுமாறு அறிவுறுத்தப்பட்டுள்ளனர்.
