துபாயில் இருந்து டெல் அவிவ் நோக்கிச் சென்ற ஃப்ளைதுபாய் (flydubai) விமானத்தின் காக்பிட்டில் வைத்து, இந்தியாவைச் சேர்ந்த கேப்டன் ஸ்மித் மச்சார் (Smit Machchhar) மீது தாக்குதல் நடத்திய ஓமான் நாட்டைச் சேர்ந்த இணை விமானி, ஹமாம் அல்-ஹம்மாமி (Hamam al-Hammami) என சிஎன்என் (CNN) செய்தி நிறுவனம் அதிகாரப்பூர்வமாக அடையாளம் கண்டுள்ளது. முன்னதாக, அவரது ஓமான் நாட்டை இஸ்ரேல் பிரதமர் பெஞ்சமின் நேட்டோயாகு உறுதிப்படுத்தியிருந்த நிலையில், தற்போது அவரது பெயர் வெளிச்சத்திற்கு வந்துள்ளது. சவூதி அரேபிய ஊடகங்களும், இஸ்ரேலிய அதிகாரியும் இந்தத் தகவலை உறுதிப்படுத்தியுள்ளனர்.
தீவிரவாதக் கருத்துக்கள் காரணமாக ஓமன் ஏர் நிறுவனத்தில் முன்பே பாதுகாப்பு அச்சுறுத்தலாகக் கருதப்பட்டுப் பயிற்சியிலிருந்து நீக்கப்பட்ட அல்-ஹம்மாமி, ஃப்ளைதுபாய் நிறுவனத்தில் வணிக விமான ஓட்டியாக வேலைக்கு அமர்த்தப்பட்டது உலகளவில் பெரும் அதிர்ச்சியை ஏற்படுத்தியுள்ளது.
ஹமாம் அல்-ஹம்மாமி பின்னணி என்ன?
அல்-ஹம்மாமி ஐக்கிய அரபு எமிரேட்ஸில் ஓமன் நாட்டைச் சேர்ந்த தந்தைக்கும், சிரிய தாய்க்கும் பிறந்தவர். இவரது பெயரிலான லின்க்ட்இன் (LinkedIn) சுயவிவரத்தின்படி, இவர் ஓமான் ஏர் நிறுவனத்தில் ஏழு ஆண்டுகள் பணியாற்றி பிப்ரவரி 2025-ல் வெளியேறியுள்ளார். அதன் பிறகு, ஜூன் 2025-ல் ராயல் ஏர் மொராக்கோவில் இணைந்து, ஜனவரி 2026-ல் அங்கிருந்து விலகியுள்ளார். அந்தப் பக்கத்தில் ஃப்ளைதுபாய் பணி பற்றிக் குறிப்பிடப்படவில்லை என்றாலும், தற்போது அந்தப் பக்கம் நீக்கப்பட்டுவிட்டது. எனினும், அந்தச் சுயவிவரம் அவருக்குத்தான் சொந்தமானது என்பதை சிஎன்என் உறுதிப்படுத்தியுள்ளது.
இஸ்ரேலிய அதிகாரி ஒருவர் கூறுகையில், அவர் கடந்த எட்டு மாதங்களாக ஃப்ளைதுபாய் நிறுவனத்தில் பணியாற்றி வருவதாகத் தெரிவித்தார். மேலும், அவர் பக்கிங்ஹாம்ஷயர் நியூ பல்கலைக்கழகத்தில் பயின்றதாகவும், அங்கு அவர் 2023-ல் விமான மேலாண்மையில் பட்டம் பெற்றதை பல்கலைக்கழகமும் உறுதிப்படுத்தியுள்ளது.
ஓமன் ஏர் நிறுவனத்தில் இருந்து வெளியேற்றப்பட்டது ஏன்?
அல்-ஹம்மாமி தனது தீவிரவாதக் கருத்துக்கள் காரணமாக 2024 ஆம் ஆண்டு ஓமான் ஏர் விமானப் பயிற்சியிலிருந்து அதிரடியாக நீக்கப்பட்டதாகவும், பின்னர் அவருக்கு நிறுவனத்தில் வேறு பணி வழங்கப்பட்டதாகவும் ஏபிசி நியூஸ் (ABC News) செய்தி வெளியிட்டுள்ளது.
இஸ்ரேல் பிரதமர் பெஞ்சமின் நேதன்யாகு கூறுகையில், சந்தேக நபர் இஸ்லாமிய தீவிரவாத மயமாக்கலுக்கு ஆளாகியுள்ளதாக நம்புவதாகத் தெரிவித்தார். இந்தச் சம்பவம் குறித்து ஃப்ளைதுபாய் நிறுவனம் இன்னும் அதிகாரப்பூர்வமான அறிக்கையை வெளியிடவில்லை, எனினும் விசாரணை தீவிரமாக நடந்து வருகிறது.
இணையதளக் கணக்குகளில் சிக்கிய திடுக்கிடும் உண்மைகள்
இந்தச் சம்பவம் நடந்து சுமார் ஒன்பது மணி நேரத்திற்குப் பிறகு, அவரது லின்க்ட்இன் சுயவிவரத்தில் இரண்டு பதிவுகள் வெளியிடப்பட்டன:
முதல் பதிவில், போயிங் 737 மேக்ஸ் (Boeing 737 Max) காக்பிட்டுகளில் எடுக்கப்பட்ட வீடியோ காட்சிகள் இருந்தன. துபாய் சர்வதேச விமான நிலையத்தில் படமாக்கப்பட்ட அந்தக் காட்சியில், நபர் ஒருவர் இஸ்ரேலின் எல் அல் (El Al) விமானத்தை நோக்கி ஜூம் செய்து பார்ப்பது பதிவாகியிருந்தது. அந்த வீடியோவின் இறுதியில் அல்கொய்தா தலைவர்களான ஐமன் அல்-ஜவாஹிரி மற்றும் ஹுமாம் கலீல் அபு-முலால் அல்-பலாவியின் புகைப்படங்கள் இடம்பெற்றிருந்தன.
இரண்டாவது பதிவு, இஸ்லாத்தின் மூன்று புனித தலங்களின் செயற்கை நுண்ணறிவு (AI) மூலம் உருவாக்கப்பட்ட படமாகும். அதில் அவமானம் மறுக்கப்படுவது மற்றும் மரணத்துக்குப் பயப்படாமல் இருப்பது பற்றிய கவிதையும் இடம்பெற்றிருந்தது. இதே போன்ற வீடியோக்கள் அவரது இன்ஸ்டாகிராம் கணக்கிலும் பதிவிடப்பட்டு, பின்னர் அதுவும் நீக்கப்பட்டது.
விசாரணை எங்கு எங்கு நடைபெறுகிறது?
இஸ்ரேலை முறையாக அங்கீகரிக்காத ஓமன் நாட்டைச் சேர்ந்த ஒரு குடிமகன், டெல் அவிவ் செல்லும் விமானத்தின் குழுவில் எவ்வாறு இணைந்தார் என்பது குறித்து ஷின் பெட் (Shin Bet) மற்றும் மொசாட் (Mossad) உள்ளிட்ட இஸ்ரேலிய பாதுகாப்பு முகமைகள் விசாரணை நடத்தி வருகின்றன.
இந்தத் தாக்குதல் பயங்கரவாதச் செயலுடன் தொடர்புடையதா என்பது குறித்து ஐக்கிய அரபு எமிரேட்ஸின் அட்டர்னி ஜெனரல் விசாரணைக்கு உத்தரவிட்டுள்ளதாக வாம் (WAM) அரசு செய்தி நிறுவனம் தெரிவித்துள்ளது. மேலும், சந்தேக நபர் சவூதி அரேபியாவில் விசாரிக்கப்பட்டதாகவும், அதில் இஸ்ரேலும் இணைந்துள்ளதாகவும் நேதன்யாகு தெரிவித்தார்.
இந்தத் தாக்குதலில் காயமடைந்த விமானி கேப்டன் ஸ்மித் மச்சார் இந்தியாவைச் சேர்ந்தவர் ஆவார். வளைகுடா விமான நிறுவனங்களில் பணிபுரியும் பைலட்டுகள் மற்றும் பயணம் செய்யும் பயணிகளின் பாதுகாப்புக்கு இது போன்ற சம்பவங்கள் எத்தகைய ஆபத்துகளை ஏற்படுத்துகின்றன என்பது குறித்து தற்போது பலத்த கேள்விகள் எழுந்துள்ளன.
source https://tamil.indianexpress.com/international/flydubai-attack-hamam-al-hammami-captain-smit-machchhar-12618386
