லாஸ் ஏஞ்சலஸ் மேயர் தேர்தலில் நித்யா ராமனின் அபார எழுச்சி: 'மலையாளம் தெரிந்தவர்'; கேரளாவில் பெருமிதம்

 

கேரளாவில் தொடங்கி, டெல்லி வழியாக அமெரிக்க அரசியலின் மையப்பகுதியான லாஸ் ஏஞ்சல்ஸில் வந்து முடிவடைந்துள்ள நித்யா ராமனின் இந்தப் பயணம், அவரது வாழ்க்கையில் ஒரு முக்கியமான மைல்கல்லாகும். Photograph: (Photo: X/@nithyavraman)

எழுதியவர்: ஷாஜு பிலிப்

லாஸ் ஏஞ்சலஸ் நகரின் உயரிய பதவியான மேயர் தேர்தலுக்கான வாக்கு எண்ணிக்கை செவ்வாய்க்கிழமை தொடங்கியபோது, இந்திய-அமெரிக்கரான நித்யா ராமனின் பேச்சில் இருந்த அமைதியான நம்பிக்கையை 'தி லாஸ் ஏஞ்சலஸ் டைம்ஸ்' பத்திரிகை பதிவு செய்தது. ஜனநாயகக் கட்சியைச் சேர்ந்த நித்யா ராமன், அதே கட்சியைச் சேர்ந்த தற்போதைய மேயர் கரேன் பாஸுக்கு எதிராக இந்த பலப்பரீட்சை களத்தில் போட்டியிட்டார். அந்தப் பத்திரிகை நித்யாவை மிகுந்த உற்சாகத்துடன் இருந்ததாக விவரித்தது.

“நான் நம்பிக்கையுடன் இருக்கிறேன். மிகவும் நம்பிக்கையுடன் இருக்கிறேன்” என்று மதுபானம் மற்றும் சிற்றுண்டிகளுடன் ஆரவாரமாக இருந்த ஆதரவாளர்கள் கூட்டத்தில் நித்யா கூறியதாக அந்த செய்தித் தாள் குறிப்பிட்டது. “அதேநேரம் நான் கொஞ்சம் மூடநம்பிக்கை கொண்டவள். அதனால் நாம் அனைவரும் அமைதியாக இருப்போம், சரியா? மிகவும் அமைதியாக இருப்போம்.”

புதன்கிழமை வாக்கு எண்ணிக்கை தொடர்ந்த நிலையில், 45 வயதான திருச்சூரில் பிறந்த நித்யா ராமன், தற்போதைய மேயர் கரேன் பாஸை விட கூடுதல் வாக்குகளைப் பெற்று தனது முன்னிலையை அதிகரித்தார். எண்ணப்பட்ட வாக்குகளில் கரேன் பாஸ் பெற்ற 48.33 சதவீத வாக்குகளை எதிர்த்து, நித்யா 51.67 சதவீத வாக்குகளைப் பெற்றிருந்தார். இருப்பினும், மொத்த வாக்குகளில் சுமார் 67 சதவீதம் மட்டுமே எண்ணப்பட்டிருந்ததால், தேர்தல் முடிவுகள் மிகவும் நெருக்கமாகவே இருந்தன. அவரது வெற்றி உறுதியாகும் பட்சத்தில், லாஸ் ஏஞ்சலஸ் நகரின் தெற்காசிய வம்சாவளியைச் சேர்ந்த முதல் மேயர் என்ற பெருமையை அவர் பெறுவார்.

கேரளாவில் தொடங்கி, டெல்லி வழியாக அமெரிக்க அரசியலின் மையப்பகுதியான லாஸ் ஏஞ்சலஸில் வந்து முடிவடைந்துள்ள நித்யா ராமனின் இந்தப் பயணம் ஒரு வரலாற்றுச் சிறப்புமிக்க மைல்கல்லாகும். கேரளாவில் உள்ள அவரது குடும்பத்தினருக்கு இது எல்லையற்ற பெருமிதத் தருணமாக அமைந்துள்ளது.

கேரளா தொடர்பு மற்றும் குடும்பப் பின்னணி

1981-ல் கேரள மாநிலம் திருச்சூரில் பிறந்த நித்யா ராமன், திருவனந்தபுரம் கிழக்குக் கோட்டையில் உள்ள ராமசாமி கோவில் தெருவில் சிறிது காலம் வசித்து வந்தார். அங்கு அவரது தந்தை வெங்கிடராமன் 'கெல்ட்ரான்' பொதுத்துறை நிறுவனத்திலும், தாய் சுதா கேச்சரி 'இந்தியன் ஓவர்சீஸ் வங்கி'யிலும் பணியாற்றினர். சில ஆண்டுகள் கழித்து, அவரது தந்தை மேல்படிப்பிற்காக அமெரிக்கா சென்றபோது, இவர்களது குடும்பம் மீண்டும் திருச்சூருக்கு மாறியது. அங்குதான் நித்யா தனது மழலையர் பள்ளிக் கல்வியைப் படித்தார்.

“திருச்சூர் என்பது நித்யாவின் தாயார் சுதாவின் சொந்த ஊராகும்” என்று திருச்சூரில் உள்ள அவரது நெருங்கிய உறவினரான பேராசிரியர் தேவநாராயணன் 'தி இந்தியன் எக்ஸ்பிரஸ்' செய்தித்தாளிடம் தெரிவித்தார். “நித்யா முதலாம் வகுப்பு படித்துக் கொண்டிருந்தபோது அவரது குடும்பம் அமெரிக்காவிற்கு இடம்பெயர்ந்தது. இருப்பினும் அவர் இன்றும் எங்களுடன் தொடர்பில் இருக்கிறார்; கடந்த 2019-ம் ஆண்டு நடைபெற்ற குடும்ப நிகழ்ச்சி ஒன்றிற்காக இங்கு வந்திருந்தார். அவருக்கு மலையாள மொழியைப் புரிந்து கொள்ள முடியும்” என்றும் அவர் கூறினார்.

நித்யாவின் தந்தை அமெரிக்கா செல்லும் முன், 1980-களின் தொடக்கத்தில் திருவனந்தபுரத்தில் உள்ள அக்ரஹாரம் பகுதியில் நித்யா குடும்பத்துடன் வசித்து வந்தார் என்று குடும்பத்தினர் தெரிவித்தனர்.

அவரது உறவினர் வித்யா சங்கர் கூறுகையில், “தொழில் வளர்ச்சியை விட, கல்வி மீதான ஆர்வமே ஆர். வெங்கடராமனை அமெரிக்காவிற்கு அழைத்துச் சென்றது. நிதித் துறையில் பணியாற்றும் நித்யாவின் தம்பி ஆகாஷ், அவரை விட 15 வயது இளையவர்” என்றார்.

உறவினர்களின் உற்சாகம்

திருச்சூரில் உள்ள அவரது உறவினர்கள் மிகுந்த மகிழ்ச்சியில் திளைக்கின்றனர். “எங்கள் மொழியைப் புரிந்து கொள்ளக்கூடிய ஒருவர் லாஸ் ஏஞ்சலஸ் நகரின் மேயராகப் பொறுப்பேற்பது நமக்குக் கிடைத்த பெருமை” என்று தேவநாராயணன் பகிர்ந்துகொண்டார். “செய்தியைக் கேட்டவுடன் வியாழக்கிழமை சுதாவிடம் பேசினோம். இறுதி முடிவுகள் வெளிவரும் வரை காத்திருக்குமாறு அவர் கூறினார். ஆனால் எங்களது உற்சாகத்தை அவர்களால் புரிந்து கொள்ள முடிகிறது” என்றும் அவர் தெரிவித்தார்.

திருவனந்தபுரத்தில் உள்ள உறவினர்களிடமும் இந்த உற்சாகம் அலைமோதிக்கொண்டிருக்கிறது. அமெரிக்காவில் உள்ள குடும்ப உறுப்பினர்கள் நித்யாவின் தேர்தல் பிரச்சாரத்தில் தீவிரமாகப் பங்கேற்றதாக சங்கர் கூறினார். “லாஸ் ஏஞ்சல்ஸில் நிலவும் தேர்தல் களம் குறித்த வீடியோக்களையும் புகைப்படங்களையும் கேரளாவில் உள்ள குடும்பத்தினர் தொடர்ந்து பெற்று வருகின்றனர். இண்டியானாபோலிஸில் உள்ள எனது சகோதரியும் அவரது குடும்பத்தினரும் பிரச்சாரத்தில் பங்கேற்றனர். ஓஹியோவில் இருந்து நித்யாவின் சித்தப்பா குடும்பத்தினரும் இதில் இணைந்து கொண்டனர்” என்றார்.

சசி தரூரின் பாராட்டு

இது குறித்து எக்ஸ் தளத்தில் பதிவிட்ட திருவனந்தபுரம் நாடாளுமன்ற உறுப்பினர் சசி தரூர், இதனை  “திருவனந்தபுரத்தின் மகளுக்குக் கிடைத்த வெற்றி” என்று பாராட்டியுள்ளார்.

“நியூயார்க்கில் சோஹ்ரன் கே மம்தானியுடன் சேர்த்து, அமெரிக்காவின் இரு மிகப்பெரிய நகரங்களும் இந்திய வம்சாவளியைச் சேர்ந்தவர்களால் நிர்வகிக்கப்படவுள்ளன. இந்தியாவில் உள்ள மேயர்களுக்குப் போதிய அதிகாரங்களோ, நிதி ஒதுக்கீடோ வழங்கப்படாமல் அதிகாரங்கள் சிதறடிக்கப்பட்ட பிரிட்டிஷ் காலத்து அமைப்பால் அவர்கள் செயலற்றவர்களாக்கப்பட்டுள்ளனர். அவர்களை விட அமெரிக்காவில் உள்ள இவர்கள் தங்கள் நகரங்களை மிகச் சிறப்பாக நிர்வாகம் செய்வார்கள் என்று நான் உறுதியாக நம்புகிறேன்” என்று சசி தரூர் தனது பதிவில் குறிப்பிட்டுள்ளார்.

source https://tamil.indianexpress.com/india/nithya-raman-los-angeles-mayor-election-kerala-thrissur-connection-12787286