14 ஆண்டுகால ஊழல் வழக்கு ரத்து: சென்னை ஐகோர்ட் தீர்ப்பு

 

தமிழ்நாட்டின் முன்னாள் முதலமைச்சர் கருணாநிதியின் தனி பாதுகாப்பு அதிகாரியாக பணியாற்றிய சி. கணேசன் என்பவருக்கு அரசு விருப்புரிமை ஒதுக்கீட்டின் கீழ், "நேர்மையான அரசு ஊழியர்" பிரிவில் 10 சென்ட் நிலம் ஒதுக்கப்பட்டது. இது தொடர்பாக அவர் மீது தொடரப்பட்ட ஊழல் வழக்கில் தாக்கல் செய்யப்பட்ட இறுதி அறிக்கையை, வழக்கு பதிவு செய்யப்பட்டு 14 ஆண்டுகளுக்குப் பிறகு சென்னை உயர் நீதிமன்றம் தற்போது ரத்து செய்துள்ளது. இந்த வழக்கின் ஒட்டுமொத்த நன்நடவடிக்கைகளும் சட்ட நடைமுறைகளை முற்றிலும் தவறாகப் பயன்படுத்துவதே தவிர வேறொன்றுமில்லை என்றும், இதனைத் தொடர்ந்து நீட்டிக்க முடியாது என்பதால் இந்த நடவடிக்கைகள் தள்ளுபடி செய்யத்தக்கவை என்றும் நீதிபதி  ஜி. கே. இளந்திரையன் தெரிவித்துள்ளார்.

மேலும், வழக்கின் அனைத்து ஆவணங்களையும் பரிசீலித்த நீதிமன்றம், பாதுகாப்பு அதிகாரி சி. கணேசனுக்கு இந்த வீட்டு மனை ஒதுக்கீடு செய்யப்பட்ட போது, சம்பந்தப்பட்ட துறையின் அதிகாரிகள் எவரேனும் கூட்டுச் சதி, முறைகேடு அல்லது ஏதேனும் சந்தேகத்திற்கிடமான சூழ்நிலைகளில் ஈடுபட்டதாகவோ, அல்லது அதிகாரிகள் படிநிலைகளின்படி அலுவலகக் குறிப்புகளைத் தயாரித்து, கையெழுத்திட்டு ஒப்புதல் அளித்ததில் ஏதேனும் தவறு நடந்ததாகவோ அரசுத் தரப்பு சாட்சிகள் யாரும் கூறவில்லை என்று குறிப்பிட்டுள்ளது.

அரசுத் தரப்பு குற்றச்சாட்டுகளின்படி, கணேசன் பொது ஒதுக்கீட்டின் கீழ் வீட்டு மனை கோரி தமிழ்நாடு வீட்டு வசதி வாரியத்திடம் ஒரு விண்ணப்பத்தை சமர்ப்பித்தார். அதனைப் பெற்றுக்கொண்ட வீட்டு வசதி மற்றும் நகர்ப்புற வளர்ச்சித் துறை, "நேர்மையான அரசு ஊழியர்" பிரிவில், அரசு விருப்புரிமை ஒதுக்கீட்டின் கீழ் மொகப்பையர் ஏரி திட்டப் பகுதியில் உள்ள 4,370 சதுர அடி பரப்பளவு கொண்ட காலி உயர் வருவாய் பிரிவு (HIG) மனையை ஒதுக்கீடு செய்ய அலுவலகக் குறிப்பைத் தயாரித்தது. இந்த அலுவலகக் குறிப்பிற்கு அப்போதைய அரசின் இணைச் செயலாளர், பின்னர் அப்போதைய வீட்டு வசதித் துறைச் செயலாளர் மற்றும் அதன் பிறகு அப்போதைய வீட்டு வசதித் துறை அமைச்சர் ஐ. பெரியசாமி ஆகியோர் ஒப்புதல் அளித்தனர்.

இதனைத் தொடர்ந்து, 2008 மார்ச் 10 அன்று ஆணை பிறப்பிக்கப்பட்டு, அந்த மனை கணேசனுக்கு தற்காலிகமாக ஒதுக்கீடு செய்யப்பட்டது. ஆனால், இந்த தற்காலிக ஒதுக்கீட்டு ஆணை கிடைப்பதற்கு முன்னரே மற்றும் தமிழ்நாடு வீட்டு வசதி வாரியத்திடம் அனுமதி பெறாமலேயே, கணேசன் அந்த மனையை கே. பத்மா என்பவருடன் இணைந்து கூட்டு மேம்பாடு  செய்வதற்காக ரூ.74.13 லட்சத்திற்கு ஒப்பந்தம் செய்து கொண்டார் என்றும், பின்னர் அந்த மனை ரூ.1.01 கோடிக்கு விற்கப்பட்டது என்றும் அரசுத் தரப்பில் குற்றம் சாட்டப்பட்டிருந்தது.

source https://tamil.indianexpress.com/tamilnadu/madras-high-court-quashes-14-year-old-corruption-case-against-former-cm-karunanidhis-pso-12177708