சிவகாசி அரசுப் பள்ளி விசிட் மற்றும் 'லாஸ்ட் பெஞ்ச்' கமெண்ட் தொடர்பாக எழுந்த சர்ச்சைகளுக்குத் தமிழக தொழில்துறை அமைச்சர் கீர்த்தனா தனது எக்ஸ் X பக்கத்தில் மிகக் காட்டமான விளக்கத்தையும், முன்னாள் பள்ளிக்கல்வித்துறை அமைச்சர் அன்பில் மகேஷுக்கு நேரடி கேள்விகளையும் முன்வைத்துப் பதிவிட்டுள்ளார். இதனால் இந்த விவகாரம் தமிழக அரசியலில் அடுத்தகட்ட பரபரப்பை எட்டியுள்ளது. 6 7 2026
அமைச்சர் கீர்த்தனா பள்ளி வகுப்பறையில் மாணவிகளிடம் ஆங்கிலத்தில் கேள்வி கேட்டது மற்றும் 'லாஸ்ட் பெஞ்ச்' குறித்துப் பேசிய வீடியோ வைரலானதை தொடர்ந்து, முன்னாள் பள்ளிக்கல்வித்துறை அமைச்சர் அன்பில் மகேஷ் தனது எக்ஸ் பக்கத்தில் கடுமையாக விமர்சித்திருந்தார். அதில், "தான் நினைப்பதுதான் சரி எனப் பிடிவாதம் பிடிப்பது ஆய்வின் பணி அல்ல. 'Last Bench' என்று சுட்டிக்காட்டி பேசுபவர்கள் எல்லாம் பள்ளிகளுக்குள் செல்லாதீர்கள். மாணவ செல்வங்கள் மற்றும் ஆசிரியர்களை ஊக்கப்படுத்த வேண்டுமே தவிர, அவர்களிடம் தாழ்வு மனப்பான்மையை வளர்க்காதீர்கள் என்று குறிப்பிட்டிருந்தார்.
அன்பில் மகேஷின் இந்த விமர்சனத்திற்குத் தற்போது பதிலடி கொடுத்துள்ள அமைச்சர் கீர்த்தனா, பல ஆண்டுகளாகத் தமிழ்நாட்டின் அரசுப் பள்ளிகள் எவ்வாறு புறக்கணிக்கப்பட்டன என்பதற்கான சாட்சியமே இது என்று சாடியுள்ளார். மேலும், முன்னாள் அமைச்சர் அன்பில் மகேஷ் பொய்யாமொழியிடம் பல்வேறு நேரடி கேள்விகளை அவர் எழுப்பியுள்ளார்:
கழிப்பறை இல்லை, உடற்கல்வி ஆசிரியர் இல்லை, கணினி ஆசிரியர் இல்லை, பள்ளி வளாகம் முழுவதும் புதர்கள் மண்டிக் கிடக்கின்றன... இப்படிப்பட்ட அடிப்படை வசதிகள்கூட இல்லாத அரசுப் பள்ளிகள் இருந்தபோது, உங்களுடைய முன்னுரிமை எங்கே இருந்தது? இன்று இந்த நிலையை வெளிச்சத்திற்குக் கொண்டு வந்தவர்களைக் குறை கூறுவதற்குப் பதிலாக, இந்த அவலநிலை ஏன் உருவானது என்பதற்கு மக்களுக்குப் பதில் சொல்லுங்கள். நான் சிவகாசி அரசுப் பள்ளிக்குச் சென்றது அரசியல் செய்வதற்காக அல்ல. அது என் தொகுதி. அந்த மாணவர்களின் குரலைச் சம்பந்தப்பட்ட அமைச்சரிடம் கொண்டு சேர்ப்பது என் உரிமையும், கடமையுமாகும்.
இணையத்தில் வைரலாகும் அந்த வீடியோவை தனது குழு எடுக்கவில்லை என்று தெளிவுபடுத்தியுள்ள அவர், என்னுடன் வந்திருந்த ஊடகங்கள் தான் அந்தக் காட்சிகளைப் பதிவு செய்தன. ஆகவே, வீடியோவை யார் எடுத்தார்கள் என்பதல்ல இங்கே கேள்வி; அந்த வீடியோவில் ஏன் அப்படிப்பட்ட அவலநிலை இருந்தது என்பதுதான் உண்மையான கேள்வி என்று கூறியுள்ளார்.
source https://tamil.indianexpress.com/tamilnadu/where-was-your-priority-minister-keerthana-hits-back-at-former-education-minister-anbil-mahesh-12140093