இன்று ஒரே நாளில் நாட்டின் பல்வேறு இடங்களில் நடைபெற்ற அதிரடி வேட்டையில் கோடிக்கணக்கான ரூபாய் மதிப்பிலான நோட்டுக்கள், தங்க நகைகள் கைப்பற்றப்பட்டன. அந்த தகவல்கள் சுருக்கமாக..
- அமலாக்கத்துறை சண்டிகரில் 2.18 கோடி பறிமுதல் செய்தது. 17.74 லட்சம் புதிய ரூபாய் நோட்டுக்கள். இதில் 52 லட்சம் ரூபாய் மதிப்புள்ள 100 ரூபாய் நோட்டுக்கள் ஆகும்.
- கோவா காலன்குவேட் காவல்துறையினர் 3 பேரை கைது செய்து அவர்களிடம் இருந்த 24 லட்சம் ரூபாய் புதிய ரூபாய் நோட்டுக்களை பறிமுதல் செய்தனர்.
- புனேவில் வாகாட் என்ற இடத்தில் 4 பேரை கைது செய்த போலீசார் 67 லட்சத்தை பறிமுதல் செய்தனர்.
- டெல்லியில் 5 பேரை கைது செய்த குற்றப்பிரிவு போலீசார் 3.25 கோடியை பறிமுதல் செய்தனர். அந்த பணத்தை வருமான வரித்துறை மற்றும் அமலாக்கத்துறையிடம் ஒப்படைத்தனர்.
- டெல்லியில் இருந்து செல்லாத 500, 1000 நோட்டுக்களை ஒரு கும்பல், மும்பைக்கு கொண்டு சென்று வெள்ளைப்பணமாக மாற்றியதாக போலீசார் தெரிவித்தனர்.
- ரூபாய் நோட்டுக்களை ஒயர்களை சுற்றி டெலிபோன் சாதனங்களில் மூடி வைத்து விமானம் மூலம் எடுத்துச் சென்றுள்ளனர். பணமதிப்பிழப்பு நடவடிக்கை பிறகு இதுவரை டெல்லியில் தொழிற்சாலை பாதுகாப்பு படையினர் 170 கிலோ தங்கம், 70 கோடி பழைய மற்றும் புதிய ரூபாய் நோட்டுக்களை பறிமுதல் செய்துள்ளதாக அறிவித்துள்ளனர்.
- பெங்களூருவில் இன்று 9 லட்சம் ரூபாய் மதிப்புள்ள புதிய 2000 ரூபாய் நோட்டுக்களை பறிமுதல் செய்த போலீசார் 5 பேரை கைது செய்தனர். அவர்கள் ஒரு தொழிலதிபரிடம் இருந்து 10 லட்சம் ரூபாயை கொள்ளையடித்துள்ளதாக போலீசார் தெரிவித்துள்ளனர்.
- கர்நாடகா மற்றும் கோவாவில் 29.86 கோடி பணம் மற்றும் 41.6 கிலோ தங்க கட்டிகள், 14 கிலோ தங்க நகைகள், கைப்பற்றப்பட்டுள்ளதாக வருமான வரித்துறை தெரிவித்துள்ளது.
- பண மதிப்பிழப்பு நடவடிக்கை பிறகு கர்நாடகா மற்றும் கோவாவில் மொத்தம் 36 வழக்குகளில் ஆயிரம் கோடி ரூபாய் கணக்கில் வராத பணத்தை கைப்பற்றி இருப்பதாக கூறியுள்ள வருமான வரித்துறை இதில் 20.22 கோடி புதிய 2 ஆயிரம் ரூபாய் தாள்கள் என கூறியுள்ளது.
- டெல்லி ரியல் எஸ்டேட் ஏஜெண்ட் சுக்பீர் ஷோகீன் என்பவரிடம் இருந்து கணக்கில் வராத 64 லட்சத்து 84 ஆயிரம் ரூபாய் பணம் பறிமுதல் செய்யப்பட்டுள்ளது. இதில் 11 லட்சத்து 34 ஆயிரம் ரூபாய் புதிய 2ஆயிரம் ரூபாய் நோட்டுக்கள்.
- ரூ. 1கோடியே 6 லட்சத்து 57 ஆயிரத்து 235 மதிப்புள்ள நகைகளை வருமான வரித்துறை மற்றும் மாநில குற்றப்பிரிவு இணைந்து நடத்திய கூட்டு நடவடிக்கையின் மூலம் பறிமுதல் செய்துள்ளதாக அறிவிக்கப்பட்டுள்ளது.
- ஐதராபாத்தில் 16 லட்சம் ரூபாய் புதிய 2ஆயிரம் ரூபாய் நோட்டுக்களை கூலிப்படையிடம் இருந்து போலீசார் கைப்பற்றியுள்ளனர்.
