29 06 2022
முன் எப்போதும் இல்லாத வகையில்,அமெரிக்க டாலருக்கு இணையான மதிப்பில் ரூபாய் 79 ஐ தாண்டியது. நாட்டின் பொருளாதாரத்திற்கு எச்சரிக்கை மணியா? என்ன நடக்கிறது.
அது குறித்து பார்க்கலாம். சர்வதேச வர்த்தகத்தில் பெரும்பான்மையான நாடுகளில் அமெரிக்க நாட்டின் பணமான டாலர் மதிப்பில் நடைபெற்று வருகிறது. ஏற்றுமதி மற்றும் இறக்குமதி வர்த்தகத்தில் டாலர் முக்கிய பங்கு வகிக்கிறது. அமெரிக்க டாலருக்கு நிகரான இந்திய ரூபாய் மதிப்பு தொடர்ந்து குறைந்துகொண்டே வருகிறது. வர்த்தக நேரத்தின் இடையே 79.05 அளவுக்கு சரிந்துள்ளது. ரூபாய் மதிப்பு 79ஐ தாண்டுவது இதுவே முதல்முறையாகும். இது இந்திய ரூபாயின் வரலாறு காணாத வீழ்ச்சியாகும்.
இந்திய ரூபாயின் மதிப்பு தொடர்ந்து சரிந்து வரக்காரணம், வெளிநாட்டு நிறுவனங்களின் முதலீடுகள் இந்தியாவில் இருந்து தொடர்ந்து வெளியேறிக் கொண்டே இருக்கின்றன. இதுமட்டுமின்றி சர்வதேச சந்தையில் கச்சா எண்ணெய் விலையும் தொடர்ந்து உயர்ந்து வருகின்றன. இனி கச்சா எண்ணெய் விலை தொடர்ந்து உயர்ந்தால் இந்திய ரூபாயின் மதிப்பும் இன்னும் கிழே இறங்கும்.
மேலும் அமெரிக்க டாலருக்கு நிகரான இந்திய ரூபாய் மதிப்பும் 80 ரூபாயை தாண்டும் அச்சமும் உள்ளது என்கின்றனர் நிபுணர்கள். கடைசி கட்டமாக, ரூபாய் மதிப்பு சரிவதை கட்டுப்படுத்த ரிசர்வ் வங்கி, கையிருப்பில் உள்ள அமெரிக்க டாலர் கரன்சிகளை, அதிக அளவில் வெளியிட்டு ரூபாய் மதிப்பு சரிவடையாமல் இருக்க நடவடிக்கை எடுக்கும் எனவும் எதிர்பார்க்கப்படுகிறது.
அமெரிக்க டாலர் மதிப்பில் வர்த்தகம் புரியும் , ஏற்றுமதி நிறுவனங்களுக்கு மட்டுமே இது பலனளிக்கும். ஆனால் நமது பொருளாதாரம் அதிக அளவு இறக்குமதியை சார்ந்து இருப்பதால் அதிக அளவு அமெரிக்க டாலர்கள் தேவைப்படுகிறது. இந்திய ரூபாய் மதிப்பு சரிவை சந்திக்கிறது.
1947 ஆம் ஆண்டு ஒரு அமெரிக்க டாலருக்கு இணையான இந்திய ரூபாய் மதிப்பு 3 ரூபாய் 30 காசுகளாக இருந்தது. 1967 ஆம் அண்டு 7 ரூபாய் 50 காசுகளானது. 1990 ஆம் ஆண்டு 17 ரூபாய் ஆனது. உலகமயமாக்கலில் கையெழுத்திட்ட 1990 களின் மத்தியில் இரட்டிப்பாகி 32 ரூபாய் ஆனது. 2000 ல் 43 ரூபாயானது. 2012 ல் 60 ஆனது. தற்போது ஒரு 79 ரூபாயாக உயர்ந்துள்ளது. சில நேரங்களில் சர்வதேச நிதியம், உலக வங்கிகளின் அழுத்தங்களால் இந்திய ரூபாயின் மதிப்பு குறைக்கப்பட்ட வரலாறும் உண்டு. இடையே உலக பொருளதாரம் சரிவு கண்ட 2007 ஆம் ஆண்டுகளில் 37 ரூபாயாக இருந்தது குறிப்பிடதக்கது.
இந்திய ரூபாய் மதிப்பு சரிவைக்கண்டு வருவது இந்தியப் பொருளாதாரத்திற்கு வழங்கும் எச்சரிக்கை மணியா, சர்வதேச வர்த்தகத்தில் சாதாரண நிகழ்வா… இந்திய அரசும், ரிசர்வ் வங்கியும் போர்க்கால அடிப்படையில் கவனம் செலுத்த வேண்டும் என்பதே அனைவரின் எதிர்பர்ப்பாக உள்ளது.
-ரா.தங்கபண்டியன்
source https://news7tamil.live/the-value-of-the-indian-rupee-continues-to-fall.html
