தமிழகத்தின் பாரம்பரியமும் பண்பாடும் மிக்க தமிழர்களின் வீர விளையாட்டு ஜல்லிக்கட்டை, வெளிநாட்டு அமைப்பான பீட்டா வழக்குத்தொடர்ந்து, தடை விதிக்கச் செய்தது. இதனைத்தொடர்ந்து, தமிழகத்தில் இளைஞர்களும் மாணவர்களும் ஜல்லிக்கட்டு தடையை நீக்கக் கோரி மிகப்பெரிய அறப்போராட்டத்தை நடத்தி மத்திய, மாநில அரசுகளை அடிபணியச் செய்தது. இதனையடுத்து, அவசர சட்டத்திற்கு மாநில அரசு ஒப்புதல் பெற்று நிறைவேற்றியது.
உலகத்தையே திரும்பிப்பார்க்க வைத்த இளைஞர்களின் ஜல்லிக்கட்டு போராட்டத்தில், வெளிநாட்டு ஜெர்ஸி பசுக்கள் இறக்குமதிக்கு தடை மற்றும் பீட்டா அமைப்பை நாட்டைவிட்டு வெளியேற்று, வெளிநாட்டு குளிர்பானமான பெப்சி, கோக்கிற்கு தடை போன்ற கடுமையான வாசகங்களுடன் கடும் எதிர்ப்பு தெரிவிக்கப்பட்டது. இதனால் அந்நேரத்தில் கோக் மற்றும் பெப்சி விற்பனை தமிழகத்தில் கடுமையாக பாதிக்கப்பட்டது.
அந்த சமயத்தில்தான் உள்ளூர் குளிர்பான நிறுவனமான காளிமார்க் உள்ளிட்ட தமிழகத்தின் குளிர்பானங்கள் விற்பனை படு ஜோராக நடைபெற்று வந்தது. இந்த விற்பனையால் காளிமார்க் நிறுவனம் பெரும் லாபத்தை ஈட்டியதாகவும் கூறப்படுகிறது.
இந்நிலையில், சற்றும் எதிர்பாராத நிலையில், இன்று காளிமார்க் குளிர்பான நிறுவனத்தை நடத்திவரும் காளீஸ்வரி குழுமங்களில் வருமானவரித்துறை சோதனை நடத்தி வருகிறது. சுமார் 54 இடங்களில் இந்த அதிரடி சோதனை நடைபெற்று வருகிறது. இந்த சோதனையில் 100க்கும் மேற்பட்ட அதிகாரிகள் ஈடுபட்டுள்ளனர்.
இந்த சோதனை ஏன், எதற்காக நடத்துகிறார்கள்?
ஜல்லிக்கட்டு போராட்டத்தின்போது ஏற்பட்ட விற்பனை வீழ்ச்சியை சரிகட்டவும், இழந்த மார்க்கெட்டை நிலைநாட்டுவதற்காக, தற்போது வளர்ந்து வரும் உள்ளூர் குளிர்பான நிறுவனங்களை அடக்கி வைப்பதுதான் ஒரே வழி என கோக், பெப்சி நிறுவனங்கள் மறைமுக திட்டத்தை வகுத்துள்ளதாகவும் கூறப்படுகிறது.
இதற்காக கோக், பெப்சி நிறுவனங்கள் மத்திய அரசை தூண்டிவிட்டு, உள்ளூர் குளிர்பான நிறுவனங்களை முடக்க, ஐடி., ரெய்டு உள்ளிட்ட சோதனைகளை கொடுக்க முயன்றுள்ளது. இதன் காரணமாகத்தான் தற்போது காளீஸ்வரி குழுமங்களில் திடீர் சோதனைகள் தொடர்வதாகவும், கோக், பெப்சிக்காக உள்ளூர் காளிமார்க் கம்பெனிக்கு வந்த சோதனையாக அமைந்துள்ளதாகவும் அரசியல் வட்டாரத்தில் பேசப்பட்டு வருவது குறிப்பிடத்தக்கது.
