நிர்ணயித்ததை விட கூடுதல் கட்டணம்: தனியார் பல் மருத்துவக் கல்லூரிக்கு ரூ.6 லட்சம் அபராதம் - சென்னை ஐகோர்ட் உத்தரவு

 

தனியார் பல்மருத்துவக் கல்லூரி ஒன்று மாணவரிடமிருந்து விதிகளுக்குப் புறம்பாக வசூலித்த 6 லட்ச ரூபாய் கூடுதல் கட்டணத்தை அவரிடமே திரும்ப வழங்க வேண்டும் என்று சென்னை உயர்நீதிமன்றம் உத்தரவிட்டுள்ளது. ஜெ. பிரியதர்ஷினி என்ற மாணவி, மாதா பல்மருத்துவக் கல்லூரி மற்றும் மருத்துவமனை மற்றும் தமிழ்நாடு டாக்டர் எம்.ஜி.ஆர் மருத்துவப் பல்கலைக்கழகத் தேர்வு கட்டுப்பாட்டு அதிகாரி ஆகியோருக்கு எதிராகத் தாக்கல் செய்த மனுவை விசாரித்த நீதிபதி டி. பரத சக்ரவர்த்தி இந்தத் தீர்ப்பினை வழங்கினார். 

2015-2024 காலகட்டத்தில் பி.டி.எஸ் படிப்பிற்காகக் கட்டண நிர்ணயக் குழு நிர்ணயித்த தொகையை விட, கூடுதலாக 20 லட்ச ரூபாய் வசூலிக்கப்பட்டதாக அந்த மாணவி தனது மனுவில் குறிப்பிட்டிருந்தார். கட்டண நிர்ணயக் குழுவானது ஆண்டுக்கு அனைத்துக் கட்டணங்களையும் உள்ளடக்கி 1.45 லட்ச ரூபாய் மற்றும் வளர்ச்சி நிதியாக 5,000 ரூபாய் மட்டுமே வசூலிக்க வேண்டும் எனத் தீர்மானித்திருந்தது. ஆனால், அந்த கல்வி நிறுவனம் பல்வேறு தலைப்புகளின் கீழ் கூடுதல் தொகையை வசூலித்துள்ளதாக மாணவி தரப்பில் வாதிடப்பட்டது. இதனை ஆய்வு செய்த நீதிமன்றம், கல்வி நிறுவனங்கள் எவ்விதமான கூடுதல் கட்டணத்தையோ அல்லது நன்கொடையையோ வசூலிக்கக் கூடாது என ஏற்கனவே பிறப்பிக்கப்பட்ட கட்டண நிர்ணய உத்தரவில் தெளிவாகக் குறிப்பிடப்பட்டுள்ளதைச் சுட்டிக்காட்டியது. 

இந்த விவகாரத்தில் உண்மைக் கண்டறியும் சோதனைகளை முழுமையாகத் தற்போதைய விசாரணையில் மேற்கொள்ள இயலாது என்றாலும், நிர்ணயிக்கப்பட்ட அளவை விடக் கூடுதல் கட்டணம் வசூலிக்கப்பட்டுள்ளது என்பது தெளிவாகத் தெரிவதாக நீதிபதி குறிப்பிட்டார். அதன் அடிப்படையில், 6 லட்ச ரூபாயை நான்கு வார காலத்திற்குள் அந்த மாணவிக்குத் திரும்ப வழங்க வேண்டும் என்றும், தவறும்பட்சத்தில் அதற்கு 12 சதவீத வட்டி செலுத்த நேரிடும் என்றும் நீதிமன்றம் உத்தரவிட்டது. மேலும், சம்பந்தப்பட்ட மாணவிக்கான பட்டச் சான்றிதழை எட்டு வார காலத்திற்குள் வழங்க பல்கலைக்கழகத்திற்கு நீதிபதி ஆணையிட்டார்.

source https://tamil.indianexpress.com/tamilnadu/madras-high-court-orders-private-dental-college-to-refund-6-lakh-excess-fee-to-former-student-11152682