தமிழகத்தில் 1– 9-ம் வகுப்பு முழு ஆண்டு தேர்வு; அட்டவணை வெளியிட்ட பள்ளிக் கல்வித்துறை

தமிழ்நாட்டில் அரசு, அரசு உதவி பெறும் மற்றும் தனியார் பள்ளிகளில் 1 முதல் 9 ஆம் வகுப்பு வரையில் பயிலும் மாணவர்களுக்கு 2025-2026 ஆம் கல்வியாண்டிற்கான முழு ஆண்டுத் தேர்வு கால அட்டவணை வெளியிடப்பட்டுள்ளது.

தமிழகத்தில் 12 ஆம் வகுப்பு பொதுத் தேர்வு மார்ச் 2 ஆம் தேதியும், 10 ஆம் வகுப்பு பொதுத் தேர்வு மார்ச் 11 ஆம் தேதியும் தொடங்கி நடைபெற்று வருகிறது. இந்தநிலையில், தமிழ்நாடு சட்டமன்றத் தேர்தல் ஏப்ரல் 23 ஆம் தேதி நடைபெற இருப்பதால் 1 முதல் 9 ஆம் வகுப்புகளுக்கான் தேர்வுகள் முன்கூட்டியே நடைபெற வாய்ப்புள்ளதாக கூறப்பட்டது. 

அதன்படி 1 முதல் 9 ஆம் வகுப்பு வரையிலான மாணவர்களுக்கு வரும் ஏப்ரல் 1 ஆம் தேதி முதல் 16 ஆம் தேதி வரை வகுப்பு வாரியாக தேர்வு தேதிகள் அறிவிக்கப்பட்டுள்ளன. ஒன்றாம் வகுப்பு முதல் மூன்றாம் வகுப்பு வரையிலான மாணவர்களுக்கு ஏப்ரல் 8 ஆம் தேதி தொடங்கி ஏப்ரல் 16ஆம் தேதியோடு தேர்வுகள் நிறைவடைகின்றன. அதேபோல், நான்கு மற்றும் ஐந்தாம் வகுப்பு மாணவர்களுக்கு ஏப்ரல் 6 ஆம் தேதி தொடங்கி ஏப்ரல் 16 ஆம் தேதியோடு தேர்வுகள் நிறைவடைகின்றன. ஆறு முதல் ஒன்பதாம் வகுப்பு வரையிலான மாணவர்களுக்கு ஏப்ரல் 1ஆம் தேதி தொடங்கி 16 ஆம் தேதியோடு தேர்வுகள் நிறைவடைகின்றன. 

ஏப்ரல் 16 ஆம் தேதியோடு தேர்வுகள் நிறைவடைந்து 17 ஆம் தேதி முதல் கோடை விடுமுறை தொடங்கும். அதன்பிறகு 2026 – 2027 ஆம் கல்வியாண்டிற்கான முதல் வேலை நாள் வரும் ஜூன் மாதம் 1ஆம் தேதி தொடங்கப்படலாம் என எதிர்பார்க்கப்படுகிறது.

source https://tamil.indianexpress.com/education-jobs/tamil-nadu-school-exam-department-release-annual-exam-schedule-11248768