இன்னும் சில வாரங்களில் முடிவுக்கு வரும் - ஈரான் போர் குறித்து டிரம்ப் உதவியாளர் 17 03 2026
நேற்று (மார்ச் 16) ஈரானின் தென்கிழக்கு பகுதியான சிஸ்தான் மற்றும் பலுசிஸ்தான் மாகாணத்தில் அமைந்துள்ள சாபஹார் தடையற்ற வர்த்தக மண்டலத்திற்கு அருகிலுள்ள இராணுவ வசதிகள் மீது, அமெரிக்க ஜெட் விமானங்கள் தாக்குதல் நடத்தியதாக வாய்ஸ் ஆஃப் அமெரிக்காவின் பாரசீக மொழிச் சேவையை மேற்கோள் காட்டி அல் ஜசீரா செய்தி வெளியிட்டுள்ளது, பாகிஸ்தான் எல்லைக்கு அருகில் இருக்கும் இந்த மண்டலத்திற்குப் பின்னால் உள்ள பகுதியில் பெரும் வெடிப்புச் சத்தங்கள் கேட்டன.
இராணுவ நடவடிக்கை விரிவடைந்து வருவதால், ஈரானில் இன்னும் ஆயிரக்கணக்கான இலக்குகள் தாக்கப்பட வேண்டி உள்ளது என்று இஸ்ரேலிய இராணுவ செய்தித் தொடர்பாளர் எஃபி டெஃப்ரின் தெரிவித்துள்ளார். ஆனாலும் ஈரான் போர் நிறுத்த பேச்சுவார்த்தையை விரும்புவதாக ட்ரம்ப் கூறியதை நிராகரித்த ஈரானிய வெளியுறவு அமைச்சர் அப்பாஸ் அரக்சி சிபிஎஸ் நியூஸுக்கு அளித்த பேட்டியில், ஈரான் அமெரிக்காவிடம் போர்நிறுத்தம் கோரவில்லை என்றும், தாக்குதல்களுக்குப் பிறகு பேச்சுவார்த்தை நடத்த எந்த காரணமும் இல்லை என்றும் கூறியுள்ளார்.
சமீபத்திய தகவல்கள்:
பிராந்தியம் முழுவதும் தாக்குதல்கள்: அமெரிக்கா தனது தூதரகப் பணியை முன்னெடுக்கும் ஈராக்கின் பாக்தாத் சர்வதேச விமான நிலையத்தை இலக்காகக் கொண்டு ராக்கெட்டுகள் மற்றும் ட்ரோன்கள் ஏவப்பட்டன.
ட்ரோன்கள் மற்றும் ஏவுகணைகளை வளைகுடா நாடுகள் இடைமறித்தல்: பஹ்ரைன், குவைத், கத்தார் மற்றும் சவுதி அரேபியாவின் வான் பாதுகாப்பு அமைப்புகள் ட்ரோன்கள் மற்றும் ஏவுகணைகளை இடைமறித்ததாகத் தெரிவித்துள்ளன.
லெபனானில் உயிரிழப்புகள் அதிகரிப்பு: இஸ்ரேல் தெற்கு லெபனானில் புதிய தாக்குதல்களைத் தொடுத்து, எல்லையை நோக்கி டாங்கிகள் மற்றும் துருப்புக்களை நகர்த்தியுள்ளது. இந்த தாக்குதல் காரணமாக லெபனானில் இதுவரை சுமார் 850 பேர் மரணமடைந்துள்ளதாக தகவல் வெளியாகியுள்ளது.
