60% இருக்கைகள் இனி இலவசம்; குடும்பத்தினர் ஒன்றாக அமர புதிய வசதி

இந்தியாவின் விமானப் போக்குவரத்துத் துறை அசுர வளர்ச்சி கண்டு வரும் நிலையில், பயணிகளின் நலனை முன்னிறுத்தி மத்திய சிவில் விமானப் போக்குவரத்து அமைச்சகம் மற்றும் டிஜிசிஏ (DGCA) இணைந்து மிக முக்கியமான புதிய வழிகாட்டுதல்களை வெளியிட்டுள்ளன. சமீபகாலமாக சர்வதேச பதற்றங்களால் விமானக் கட்டணங்கள் உயர்ந்து வரும் சூழலில், சாமானிய மக்களின் பயணத்தைச் சுமையற்றதாக மாற்ற இந்த அதிரடி நடவடிக்கைகள் எடுக்கப்பட்டுள்ளன.

இந்த புதிய விதிகள் பயணிகளுக்கு என்னென்ன சலுகைகளை வழங்குகின்றன என்பதை விரிவாகப் பார்ப்போம்:

1. 60% இருக்கைகள் இனி இலவசம்

விமான நிறுவனங்கள் கூடுதல் லாபம் ஈட்டுவதற்காக, ஜன்னல் ஓரம் அல்லது முன்பக்க இருக்கைகளைத் தேர்வு செய்ய (Seat Selection) அதிக கட்டணம் வசூலிப்பதாகப் புகார்கள் எழுந்து வந்தன. இதற்கு முற்றுப்புள்ளி வைக்கும் வகையில், இனி ஒவ்வொரு விமானத்திலும் குறைந்தபட்சம் 60 சதவீத இருக்கைகளை எந்தவித கூடுதல் கட்டணமுமின்றி பயணிகளுக்கு ஒதுக்க வேண்டும் என்று டிஜிசிஏ உத்தரவிட்டுள்ளது. இதன் மூலம் பயணிகள் தங்களுக்கு விருப்பமான இடங்களை கூடுதல் செலவின்றி தேர்வு செய்யும் உரிமை உறுதி செய்யப்பட்டுள்ளது.

 2. குடும்பத்தினர் ஒன்றாக அமர புதிய வசதி

விமானப் பயணத்தின் போது ஒரே பிஎன்ஆர் (PNR) எண்ணில் டிக்கெட் முன்பதிவு செய்த குடும்பத்தினர் அல்லது நண்பர்கள் வெவ்வேறு இடங்களில் அமர வைக்கப்படும் நிலை இனி இருக்காது. ஒரே குழுவாகப் பயணம் செய்பவர்களை அருகருகே உள்ள இருக்கைகளில் அமர வைப்பதை விமான நிறுவனங்கள் கட்டாயமாக்க வேண்டும். இது குறிப்பாகக் குழந்தைகளுடன் பயணிக்கும் பெற்றோர்களுக்குப் பெரும் உதவியாக இருக்கும்.

3. செல்லப்பிராணிகள், உபகரணங்களுக்கான வெளிப்படைத்தன்மை

விமானத்தில் செல்லப்பிராணிகளை அழைத்துச் செல்வது, விளையாட்டு உபகரணங்கள் மற்றும் இசைக்கருவிகளை எடுத்துச் செல்வது ஆகியவற்றில் நிலவும் குழப்பங்களைத் தவிர்க்க தெளிவான மற்றும் வெளிப்படையான கொள்கைகளை விமான நிறுவனங்கள் தங்கள் இணையதளங்களில் வெளியிட வேண்டும்.

பேக்கேஜ் தொடர்பான கொள்கைகளும் மிகவும் வெளிப்படையாக இருக்க வேண்டும்.

4. பயணிகளின் உரிமைகள் இனி உங்கள் மொழியில்

விமானத் தாமதம், பயணம் ரத்து செய்யப்படுதல் அல்லது போர்டிங் மறுக்கப்படுதல் போன்ற நேரங்களில் பயணிகளுக்குக் கிடைக்கும் சலுகைகள் மற்றும் இழப்பீடுகளை விமான நிறுவனங்கள் கட்டாயம் அறிவிக்க வேண்டும். இந்தத் தகவல்கள் விமான நிறுவனங்களின் இணையதளங்கள், மொபைல் செயலிகள் மற்றும் விமான நிலைய கவுண்டர்களில் தெளிவாகக் காட்சிப்படுத்தப்பட வேண்டும்.

முக்கியமாக, அனைவரும் புரிந்துகொள்ளும் வகையில் தமிழ் உள்ளிட்ட பிராந்திய மொழிகளிலும் இந்த விபரங்கள் இருக்க வேண்டும் என்று அறிவுறுத்தப்பட்டுள்ளது.

5. விமான நிலையங்களில் நவீன வசதிகள்

விமான நிலையங்களில் பயணிகளின் வசதிக்காக 'உடான் யாத்ரி கஃபே' (UDAN Yatri Cafes) மூலம் மலிவு விலையில் உணவு, 'பிளைப்ரரி' (Flybrary) மூலம் புத்தகங்கள் வாசிக்கும் வசதி மற்றும் இலவச வைஃபை போன்ற நவீன வசதிகளை அமைச்சகம் முன்னெடுத்து வருகிறது.

நாட்டின் விமான நிலையங்கள் இப்போது ஒவ்வொரு நாளும் ஐந்து லட்சத்திற்கும் அதிகமான பயணிகளைக் கையாள்கின்றன. இந்திய விமானப் போக்குவரத்துச் சந்தை உலகளவில் மூன்றாவது இடத்திற்கு முன்னேறியுள்ள சூழலில், இந்த புதிய விதிகள் பயணிகளின் பயணத்தை மிகவும் எளிமையாகவும், பாதுகாப்பானதாகவும், செலவு குறைந்ததாகவும் மாற்றும் என்று எதிர்பார்க்கப்படுகிறது.

16 3 2026 

source https://tamil.indianexpress.com/business/air-travel-60-percent-free-seats-families-to-sit-together-11223374