கடந்த மே 3-ஆம் தேதி நாடு முழுவதும் நடத்தப்பட்ட இளநிலை மருத்துவப் படிப்புகளுக்கான 'நீட்' (NEET) நுழைவுத் தேர்வு, முறைகேடு புகார்கள் காரணமாகத் தேசிய தேர்வு முகமையால் (NTA) அதிரடியாக ரத்து செய்யப்பட்டது. இதனைத் தொடர்ந்து, விடுபட்ட இந்தத் தேர்வு வரும் ஜூன் 21-ஆம் தேதி மீண்டும் நடைபெறும் என அதிகாரப்பூர்வமாக அறிவிக்கப்பட்டுள்ளது. இந்த மறுதேர்வை எதிர்கொள்ளும் தமிழக அரசுப் பள்ளி மாணவர்களின் மருத்துவக் கனவை நனவாக்கும் நோக்கில், பள்ளிக்கல்வித்துறை சிறப்புப் பயிற்சி முகாமை அறிவித்துள்ளது.
இது தொடர்பாகப் பள்ளிக்கல்வித்துறை இயக்குநர் கண்ணப்பன், அனைத்து மாவட்ட முதன்மைக் கல்வி அலுவலர்களுக்கும் (CEO) அனுப்பியுள்ள சுற்றறிக்கையில் கூறப்பட்டுள்ளதாவது:
"தமிழ்நாட்டில் உள்ள மாதிரிப் பள்ளிகள் மற்றும் அரசு தேர்வு செய்துள்ள 'வெற்றிப் பள்ளிகள்' உள்ளிட்ட அனைத்து அரசு மற்றும் அரசு நிதியுதவி பெறும் மேல்நிலைப்பள்ளி மாணவர்களின் போட்டித் தேர்வு தயாரிப்பை வலுப்படுத்தும் வகையில், மாவட்ட அளவில் குறுகிய கால நீட் பயிற்சி முகாம்கள் (Crash Course Camp) நடத்தத் திட்டமிடப்பட்டுள்ளது. இப்பயிற்சி முகாம் மே 23-ஆம் தேதி முதல் ஜூன் 20-ஆம் தேதி வரை தடையின்றி நடைபெறவுள்ளது. இதில் மாணவர்களுக்குப் பாடவாரியான தீவிரப் பயிற்சிகள், மாதிரித் தேர்வுகள் மற்றும் கல்வியியல் நிபுணர்களின் நேரடி வழிகாட்டுதல்கள் வழங்கப்படவுள்ளன.
ஆசிரியர்கள் மற்றும் பள்ளிகளுக்கான முக்கிய வழிகாட்டுதல்கள்:
ஒவ்வொரு முகாம் மையத்திற்கும் இயற்பியல், வேதியியல் மற்றும் உயிரியல் பாடங்களில் சிறந்த வல்லுநர்களைக் கொண்ட 'நிலையான ஆசிரியர் குழு' அமைக்கப்பட வேண்டும்.
நியமிக்கப்பட்ட ஆசிரியர்கள் காலை 9 மணி முதல் மாலை 4:30 மணி வரை மையங்களில் இருந்து மாணவர்களின் சந்தேகங்களைத் தீர்க்க வேண்டும். பள்ளி திறந்த பின்பும் இவர்களுக்குப் பிற பணிகளில் இருந்து விலக்கு அளிக்கப்படும்.
முகாமில் பங்கேற்கும் மாணவர்களுக்குத் தேவையான அடிப்படை வசதிகள், மதிய உணவு மற்றும் இருவேளைச் சிற்றுண்டிகளை (Snacks) பள்ளித் தலைமை ஆசிரியர்கள் மூலமாக அரசு கட்டாயம் வழங்க வேண்டும்.
மாணவர்களுக்கான கட்டுப்பாடுகள்:
பயிற்சிக்கு வரும் மாணவர்கள் கண்டிப்பாகப் பள்ளிச் சீருடை (Uniform) மற்றும் அடையாள அட்டை (ID Card) அணிந்து வர வேண்டும்.
மாணவர்கள் எவ்வித விடுப்பும் எடுக்காமல் தொடர்ச்சியாகப் வகுப்புகளில் பங்கேற்பதை அந்தந்தப் பள்ளித் தலைமை ஆசிரியர்கள் உறுதி செய்ய வேண்டும்."
மறுதேர்வுக்குக் குறைந்த நாட்களே உள்ள நிலையில், தமிழக அரசின் இந்தத் தீவிர உறைவிடமற்ற பயிற்சி முகாம், அரசுப் பள்ளி மாணவர்களின் மருத்துவக் கனவுக்குப் பெரும் உந்துசக்தியாக அமையும் என எதிர்பார்க்கப்படுகிறது.
source https://tamil.indianexpress.com/education-jobs/tamil-nadu-government-school-students-free-neet-crash-course-camp-starts-from-may-23-11864542
