தமிழக சட்டமன்றத்தில் இன்று நடைபெறவுள்ள நம்பிக்கை வாக்கெடுப்பில், தமிழக வெற்றிக் கழகத்தின் (த.வெ.க) திருப்பத்தூர் தொகுதி எம்.எல்.ஏ ஆர். சீனிவாச சேதுபதி பங்கேற்கவோ அல்லது வாக்களிக்கவோ சென்னை உயர்நீதிமன்றம் இடைக்காலத் தடை விதித்துள்ளது. இந்த அதிரடி உத்தரவை எதிர்த்து அவர் தாக்கல் செய்த மேல்முறையீட்டு மனுவை உச்ச நீதிமன்றம் இன்று (புதன்கிழமை) அவசரமாக விசாரிக்கிறது.
வழக்கின் பின்னணி:
கடந்த சட்டமன்றத் தேர்தலில் திருப்பத்தூர் தொகுதியில் தவெக வேட்பாளர் சீனிவாச சேதுபதி, திமுக வேட்பாளர் கே.ஆர். பெரியகருப்பனை விட ஒரே ஒரு வாக்கு வித்தியாசத்தில் வெற்றி பெற்றார். இந்த வெற்றியில் முறைகேடுகள் நடந்துள்ளதாகக் கூறி பெரியகருப்பன் தொடர்ந்த வழக்கை விசாரித்த சென்னை உயர்நீதிமன்ற நீதிபதிகள் எல். விக்டோரியா கௌரி மற்றும் என். செந்தில்குமார் அடங்கிய அமர்வு, "ஒரே ஒரு வாக்கு வித்தியாசத்தில் வெற்றி தீர்மானிக்கப்பட்டுள்ள நிலையில், தகுதி குறித்த சந்தேகம் இருக்கும்போது அவர் நம்பிக்கை வாக்கெடுப்பில் பங்கேற்பது மாநிலத்தின் அரசியல் சாசன நிர்வாகத்தைப் பாதிக்கக்கூடும்" எனக் கூறி அவருக்குத் தடை விதித்தது.
உச்ச நீதிமன்றத்தில் மேல்முறையீடு:
இந்தத் தடையை நீக்கக் கோரி சீனிவாச சேதுபதி தரப்பில் மூத்த வழக்கறிஞர் ஏ.எம். சிங்வி உச்ச நீதிமன்றத் தலைமை நீதிபதி சூர்யகாந்த் முன்னிலையில் முறையிட்டார். இதை ஏற்றுக்கொண்ட தலைமை நீதிபதி, நீதிபதிகள் விக்ரம் நாத், சந்தீப் மேத்தா மற்றும் விஜய் பிஷ்னோய் அடங்கிய மூன்று நீதிபதிகள் கொண்ட அமர்வு இன்று இந்த வழக்கை விசாரிக்கும் என உத்தரவிட்டுள்ளார். தபால் வாக்குகளைக் கையாள்வதில் குளறுபடி நடந்ததாகக் கூறப்படும் புகாரில், இன்று உச்ச நீதிமன்றம் எடுக்கும் முடிவு தவெக அரசின் நம்பிக்கை வாக்கெடுப்பில் முக்கியத் திருப்பமாக அமையும் என எதிர்பார்க்கப்படுகிறது.
source https://tamil.indianexpress.com/tamilnadu/supreme-court-to-hear-tvk-mla-seenivasa-sethupathi-plea-against-madras-high-court-ban-floor-test-2026-11828735
