வெள்ளை மாளிகை அருகே பயங்கரம்: பாதுகாப்புச் சாவடி மீது துப்பாக்கிச்சூடு நடத்திய வாலிபர் சுட்டுக்கொலை: அதிபர் தப்பினார்

 

White House shooting live updates | Donald Trump

வாலாங்க்டன்:

அமெரிக்க அதிபர் வெள்ளை மாளிகையின் பாதுகாப்புச் சாவடிக்கு வெளியே சனிக்கிழமை மாலை நடைபெற்ற துப்பாக்கிச்சூடு சம்பவத்தில், தாக்குதல் நடத்திய 21 வயது வாலிபர் அமெரிக்க ரகசிய சேவை (Secret Service) பிரிவினரால் சுட்டுக் கொல்லப்பட்டார். இச்சம்பவத்தின் போது அதிபர் டொனால்ட் டிரம்ப் வெள்ளை மாளிகைக்குள் இருந்தார் என்றும், அவர் முற்றிலும் பாதுகாப்பாக உள்ளார் என்றும் அதிகாரிகள் உறுதிப்படுத்தியுள்ளனர்.

வாஷிங்டன் டி.சியில் உள்ள 17வது தெரு மற்றும் பென்சில்வேனியா அவென்யூ சந்திப்பில் (ஐசனோவர் நிர்வாக அலுவலகக் கட்டிடம் அருகே) சனிக்கிழமை மாலை 6 மணி அளவில் (உள்ளூர் நேரம்) இந்த அதிர்ச்சி சம்பவம் நிகழ்ந்தது.

அங்குள்ள ரகசிய சேவை பாதுகாப்புச் சாவடிக்கு அருகே வந்த நபர் ஒருவர், திடீரென தனது பையில் இருந்து துப்பாக்கியை எடுத்து பாதுகாப்பு அதிகாரிகளை நோக்கி சரமாரியாக சுடத் தொடங்கினார். சுமார் 15 முதல் 30 ரவுண்டுகள் வரை துப்பாக்கிச் சூடு சத்தம் கேட்டதாக சம்பவ இடத்தில் இருந்தவர்கள் தெரிவித்தனர்.

பாதுகாப்புப் பணியில் இருந்த ரகசிய சேவை அதிகாரிகள் உடனடியாக துரிதமாகச் செயல்பட்டு, எதிர்த்தாக்குதல் நடத்தினர். இதில் அதிகாரிகளின் துப்பாக்கிச் சூட்டுக்கு இலக்காகி படுகாயமடைந்த சந்தேக நபர், அருகில் உள்ள மருத்துவமனைக்குக் கொண்டு செல்லப்பட்டார். ஆனால் அவர் ஏற்கனவே இறந்துவிட்டதாக மருத்துவர்கள் அறிவித்தனர்.

யார் இந்த நாசீர் பெஸ்ட்? பின்னணி என்ன?

சுட்டுக்கொல்லப்பட்ட நபர் 21 வயதுடைய நாசீர் பெஸ்ட் (Nasire Best) என அடையாளம் காணப்பட்டுள்ளதாக புலனாய்வுத் துறை வட்டாரங்கள் தெரிவித்துள்ளன. இவர் கடந்த 18 மாதங்களாக வாஷிங்டன் டி.சியில் வசித்து வந்துள்ளார்.

நாசீர் பெஸ்ட் ஏற்கனவே கடந்த ஜூலை 2025-இல் வெள்ளை மாளிகைக்குள் அத்துமீறி நுழைய முயன்றபோது அமெரிக்க ரகசிய சேவை பிரிவினரால் கைது செய்யப்பட்டவர் என்பது விசாரணையில் தெரியவந்துள்ளது. அந்த சம்பவத்திற்குப் பிறகு, மனநல பாதிப்புகள் காரணமாக அவர் மனநல வார்டில் அனுமதிக்கப்பட்டு சிகிச்சை பெற்று வந்துள்ளார். இவரைப் பற்றி வாஷிங்டன் டி.சி போலீசாருக்கும், ரகசிய சேவை பிரிவிற்கும் ஏற்கனவே தெரிந்திருக்கிறது. பென்சில்வேனியா அவென்யூவில் உள்ள ஸ்டார்பக்ஸ் காபி கடை அருகே இந்த துப்பாக்கிச்சூடு தொடங்கியதாக முதற்கட்ட தகவல்கள் கூறுகின்றன.

இந்த இருதரப்பு துப்பாக்கிச் சண்டையின் போது, அங்கு நின்று கொண்டிருந்த ஒரு வழிப்போக்கர் (Bystander) மீதும் தோட்டா பாய்ந்து காயமடைந்தார். அவர் உடனடியாக மீட்கப்பட்டு மருத்துவமனையில் அனுமதிக்கப்பட்டுள்ளார். எனினும், பாதுகாப்பு அதிகாரிகள் யாருக்கும் எவ்வித காயமும் ஏற்படவில்லை. அதேபோல், வெள்ளை மாளிகைக்குள் இருந்த அதிபர் டொனால்ட் டிரம்ப் உள்ளிட்ட பாதுகாப்பில் உள்ள முக்கிய நபர்கள் எவருக்கும் எவ்வித பாதிப்பும் ஏற்படவில்லை.

துப்பாக்கிச்சூடு நடந்த சமயத்தில் ஏபிசி நியூஸ் (ABC News) செய்தியாளர் செலினா வாங் உட்பட பல பத்திரிகையாளர்கள் வெள்ளை மாளிகையின் வடக்குப் புல்வெளியில் (North Lawn) நேரடி ஒளிபரப்பில் இருந்தனர். துப்பாக்கிச் சத்தம் கேட்டவுடன் அவர்கள் அலறியடித்தபடி பாதுகாப்புக்காக கட்டிடத்திற்குள் ஓடினர். இச்சம்பவத்தைத் தொடர்ந்து வெள்ளை மாளிகை வளாகம் உடனடியாக தற்காலிகமாக முடக்கப்பட்டது (Lockdown). பின்னர் நிலைமை முழுமையாகக் கட்டுக்குள் கொண்டு வரப்பட்டதை அடுத்து, இரவு 7 மணியளவில் இந்த முடக்கம் விலக்கப்பட்டது.

இச்சம்பவம் குறித்து அமெரிக்காவின் முதன்மை புலனாய்வு அமைப்பான எஃப்.பி.ஐ (FBI) களமிறங்கியுள்ளது. எஃப்.பி.ஐ இயக்குனர் காஷ் படேல் தனது எக்ஸ் (X) தளப் பதிவில், "வெள்ளை மாளிகை வளாகத்தின் அருகே நடந்த துப்பாக்கிச்சூடு சம்பவத்தை அடுத்து எஃப்.பி.ஐ அமைப்பு ரகசிய சேவை பிரிவினருக்கு உதவி வருகிறது. நிலைமையைக் கண்காணித்து வருகிறோம், கூடுதல் விவரங்கள் உடனுக்குடன் பொதுமக்களுக்கு வழங்கப்படும்" என்று குறிப்பிட்டுள்ளார்.

இதற்கிடையே, அமெரிக்க செனட் பெரும்பான்மை தலைவர் ஜான் தூன் மற்றும் ஹவுஸ் ஸ்பீக்கர் மைக் ஜான்சன் ஆகியோர், அதிபர் டிரம்ப் மற்றும் வெள்ளை மாளிகை ஊழியர்களைக் காக்க ரகசிய சேவை அதிகாரிகள் எடுத்த விரைவான மற்றும் தீர்க்கமான நடவடிக்கையைப் பாராட்டியுள்ளனர்.

பென்சில்வேனியா அவென்யூவில் உள்ள ஸ்டார்பக்ஸ் காபி கடை அருகே இந்த துப்பாக்கிச்சூடு தொடங்கியதாகக் கூறப்படும் நிலையில், தாக்குதலின் பின்னணியில் உள்ள முழுமையான நோக்கம் குறித்து பாதுகாப்பு அமைப்புகள் தீவிர விசாரணை நடத்தி வருகின்றன.

source https://tamil.indianexpress.com/international/white-house-shooting-live-updates-donald-trump-nasire-best-11868014