அடுத்தது இவர்கள்தான்! அதிரவைக்கும் ஹெச்.ராஜா ஃபேஸ்புக் பதிவு

டி.டி.வி.தினகரன் கைதுசெய்யப்பட்டுள்ள நிலையில்... 'அடுத்து, அ.தி.மு.க அமைச்சர்கள்' என்று அதிரவைத்துள்ளார், பா.ஜ.க தேசியச் செயலாளர் ஹெச்.ராஜா.

அ.தி.மு.க பெயரையும்  இரட்டை இலைச் சின்னத்தையும் தேர்தல் ஆணையம் முடக்கிவைத்துள்ள நிலையில், அதைக் கைப்பற்றும் முயற்சியில் பன்னீர்செல்வம் அணியினரும் பழனிசாமி அணியினரும் இறங்கியுள்ளனர். இதனிடையே, இரட்டை இலைச் சின்னத்தைப் பெறும் முயற்சியில் டி.டி.வி.தினகரன் இறங்கியுள்ளார். இதற்காக, இடைத்தரகர் சுகேஷ் சந்திரசேகர் என்பவரிடம் 50 கோடி ரூபாய் பேரம் பேசியுள்ளார். முதல் கட்டமாக, 10 கோடி ரூபாய் கொடுத்துள்ளார். டெல்லியில் கைதுசெய்யப்பட்ட சுகேஷ் அளித்த வாக்குமூலத்தில், இந்த அதிர்ச்சித் தகவல் வெளியானது.

இதையடுத்து, தினகரன் மீது வழக்குப்பதிவுசெய்த டெல்லி காவல்துறையினர், அவரிடம் நான்கு நாள்கள் தீவிர விசாரணை நடத்தினர். 37 மணி நேர விசாரணைக்குப் பிறகு, நேற்றிரவு தினகரனை டெல்லி காவல்துறையினர் கைதுசெய்தனர். சொத்துக்குவிப்பு வழக்கில் சசிகலா பெங்களூரு சிறையில் அடைக்கப்பட்டுள்ள நிலையில், தினகரன் கைதுசெய்யப்பட்டிருப்பது அவரது ஆதரவாளர்களை அதிர்ச்சியடைய வைத்துள்ளது.

இதனிடையே, முதல்வர் பழனிசாமி அமைச்சரவையை அதிரவைக்கும் வகையில், பா.ஜ.க தேசியச் செயலாளர் ஹெச்.ராஜா, தனது ஃபேஸ்புக் பக்கத்தில் தன் கருத்தைப் பதிவுசெய்துள்ளார். அதில், 'தினகரன் கைது. தமிழ்நாட்டில் இனி பல அரசியல் திருப்பங்கள் காத்திருக்கின்றன. தினகரன் நண்பர் மல்லிகார்ஜுனனும் கைது. அடுத்து, அ.தி.மு.க அமைச்சர்கள்? பொதுச்செயலாளர் பெங்களூரு சிறையில்!
துணைப் பொதுச்செயலாளர் திஹார் சிறையில்! அருமையான இயக்கம் அ.தி.மு.க!' என்று குறிப்பிட்டுள்ளார்.

இதனிடையே, செய்தியாளர்களிடம் பேசிய அ.தி.மு.க அம்மா கட்சியின் தலைமைக்கழகப் பேச்சாளர் நாஞ்சில் சம்பத், 'டி.டி.வி.தினகரன் கைதுக்குப் பின்னால் மிகப்பெரிய அரசியல் சதி இருக்கிறது' என்று குற்றம் சாட்டினார்.

இந்த நிலையில், கன்னியாகுமரி மாவட்டம் மண்டைக்காட்டில் இன்று பேட்டி அளித்த மத்திய இணை அமைச்சர் பொன்.ராதாகிருஷ்ணன், 'டி.டி.வி.தினகரனை மேலும் விசாரித்தால், பல விஷயங்கள் கண்டுபிடிக்க வாய்ப்புள்ளது' என்று புதிரைக் கிளப்பினார்.

http://www.vikatan.com/news/tamilnadu/87584-hraja-shares-facebook-status-about-admk-cadres-arrest.html

 சகாயராஜ்