எழுதியவர்: ஆசாத் ரஹ்மான்
சர்வதேச எரிசக்தி நெருக்கடிக்கு மத்தியில், இந்தியாவில் வணிக பயன்பாட்டிற்கான எல்.பி.ஜி (LPG) சிலிண்டர் விலை இன்று ஒரே நாளில் 993 ரூபாய் உயர்த்தப்பட்டுள்ளது. ஐந்து மாநில சட்டமன்றத் தேர்தல் வாக்குப்பதிவு முடிந்த அடுத்த இரண்டு நாட்களில் இந்த விலை உயர்வு அறிவிக்கப்பட்டிருப்பது, எதிர்க்கட்சிகளிடையே பெரும் கொந்தளிப்பை ஏற்படுத்தியுள்ளது.
மக்களவை எதிர்க்கட்சித் தலைவர் ராகுல் காந்தி இதுகுறித்து மத்திய அரசை கடுமையாக விமர்சித்துள்ளார்.
அவர் தனது எக்ஸ் (X) தளத்தில், "தேர்தல் முடிந்ததும் பணவீக்கத்தின் வெப்பம் மக்களைச் சுடும் என்று நான் முன்பே கூறியிருந்தேன். இன்று வணிக பயன்பாட்டு சிலிண்டர் விலை 993 ரூபாய் உயர்ந்துள்ளது. கடந்த மூன்று மாதங்களில் மட்டும் 81 சதவீத விலை உயர்வு (ரூ. 1,380) ஏற்பட்டுள்ளது. இது மக்களுக்கான 'தேர்தல் பில்'. முதலில் காஸ், அடுத்து பெட்ரோல் - டீசல் மீது தாக்குதல் நடத்தப்படும். மேலும், டீக்கடைகள் முதல் பேக்கரிகள் வரை இந்த சுமை சாதாரண மக்களின் தட்டுகளைப் பாதிக்கும்” என்றார்.
காங்கிரஸ் பொதுச்செயலாளர் (அமைப்பு) கே.சி. வேணுகோபால் இந்த விலை உயர்வு குறித்து கூறுகையில், "தேர்தல் முடிந்ததும், எல்பிஜி சிலிண்டர்களின் விலையை உயர்த்த மோடி அரசாங்கம் சிறிதும் நேரத்தை வீணடிக்கவில்லை. வணிக சிலிண்டர்கள் மீது சுமார் 1,000 ரூபாய் உயர்வு என்பது, வாழ்வாதாரத்திற்காக சிறிய உணவகங்களில் உணவை நம்பியிருக்கும் கோடிக்கணக்கான இந்தியர்களைப் பாதிக்கும். அதேபோல், கோடிக்கணக்கான சிறு உணவு வணிகங்கள் இந்த உயர்வின் சுமையைத் தாங்க வேண்டியிருக்கும்.
சாதாரண இந்தியர்களின் துன்பத்தைப் பற்றிய பாஜகவின் அக்கறை தேர்தல் வித்தைகளுக்கு மட்டுமே வரையறுக்கப்பட்டுள்ளது, அதன் பிறகு அவர்கள் தங்கள் போக்கிலேயே விடப்படுகிறார்கள். ஈரான் போர் தொடங்கி மூன்று மாதங்களில், நிதிச் சுமையை மக்கள் மீது சுமத்துவதற்குப் பதிலாக, சாதாரண இந்தியர்களை விலை அதிர்ச்சியிலிருந்து பாதுகாக்க அரசாங்கம் ஒரு உறுதியான திட்டத்தைத் தயாரித்திருக்க வேண்டும்," என்றார்.
சமாஜ்வாதி கட்சித் தலைவர் அகிலேஷ் யாதவ் கூறுகையில், "இதை வாங்குபவர்களுக்கும் உண்பவர்களுக்கும் தான் இதன் வலி தெரியும். மற்றவர்கள் இடத்தில் போய் சாப்பிடுபவர்களுக்கோ அல்லது மற்றவர்களின் தட்டிலிருந்து திருடுபவர்களுக்கோ இது தெரியாது. சிலிண்டரை விலை அதிகமாக்க வேண்டுமென்றால், நேரடியாக 1000 ரூபாய் உயர்த்தியிருக்க வேண்டியதுதானே? 7 ரூபாயைக் குறைப்பதன் மூலம் இந்த பாஜகவினர் யாருக்கு உபகாரம் செய்கிறார்கள்?" என்று அவர் எக்ஸ் தளத்தில் பதிவிட்டார்.
"பணவீக்கம், வேலையில்லாத் திண்டாட்டம் மற்றும் மந்தநிலை" குறித்து பாஜக எப்போது கண்டனத் தீர்மானத்தைக் கொண்டுவரும் என்றும் முன்னாள் உத்தரப் பிரதேச முதல்வர் கேள்வி எழுப்பினார்.
திரிணாமுல் காங்கிரஸின் மாநிலங்களவை துணைத் தலைவர் சாகரிகா கோஷ் தி இந்தியன் எக்ஸ்பிரஸ்ஸிடம் கூறுகையில், ”மோடி அரசாங்கம் அதன் மக்களுக்கு எதிரான மனநிலையை மீண்டும் வெளிப்படுத்தியுள்ளது, தேர்தல் முடிந்த அடுத்த கணமே சிறு வணிகர்களின் பாக்கெட்டை அடித்துள்ளது.
உலகளாவிய கச்சா எண்ணெய் விலை மலிவாக இருந்தபோது, அதன் பலன் நுகர்வோருக்கு ஒருபோதும் வழங்கப்படவில்லை, ஆனால் பெட்ரோல் மூலம் கிடைத்த வருமானம் அரசாங்கத்தின் தேர்தல் இயந்திரத்திற்கு நிதியளிக்க பயன்படுத்தப்பட்டது. இப்போது உலகளாவிய விலைகள் விண்ணைத் தொடும்போது, குடிமக்கள் அதன் சுமையைத் தாங்குகிறார்கள். வங்காளத்தில் மத்தியப் படைகளையும் ஏஜென்சிகளையும் தவறாகப் பயன்படுத்துவதற்குப் பதிலாக, மேற்கு ஆசிய மோதலால் வரவிருக்கும் மிகப்பெரிய எண்ணெய் அதிர்ச்சிகளைப் பற்றி பிரதமரும் உள்துறை அமைச்சரும் கவலைப்பட வேண்டும்," என்றார்.
மாநிலங்களவை சிபிஐ தலைவர் பி. சந்தோஷ் குமார் கூறுகையில், "முன்னெப்போதும் இல்லாத" இந்த உயர்வு "மோடியின் கட்டிப்பிடி (hug-lomatic) வெளியுறவுக் கொள்கையின் நேரடி விளைவாகும், இது ஒரு நிலையற்ற உலகளாவிய எரிசக்தி சூழலில் இந்தியாவின் தேசிய நலனைப் பாதுகாக்கத் தவறிவிட்டது. எரிபொருள் விநியோகம் மற்றும் விலையில் ஸ்திரத்தன்மையை உறுதி செய்வதற்குப் பதிலாக, இந்த அணுகுமுறை நாட்டைப் பாதுகாப்பற்ற நிலையில் விட்டுள்ளது, இப்போது அதன் சுமை உணவகங்கள், தாபாக்கள், சிறு உணவகங்கள், விடுதிகள் மற்றும் நாடு முழுவதும் உள்ள சிறு நிறுவனங்கள் மீது சுமத்தப்பட்டுள்ளது.
வாக்குப் பதிவு முடிந்த மறுநாளே இது வந்திருப்பது, சிபிஐ எச்சரித்ததை உறுதிப்படுத்துகிறது: தேர்தல் முடிந்தவுடன் எல்பிஜி மற்றும் பிற எரிபொருள் விலைகள் உயர்த்தப்படும், ஏனெனில் மோடி அரசாங்கத்தின் ஒரே கவலை தேர்தல் மாயையே தவிர, மக்களின் நலன் அல்ல," என்று அவர் கூறினார்.
source https://tamil.indianexpress.com/india/commercial-lpg-price-hike-rahul-gandhi-lpg-cylinder-rate-increase-2026-11786408
