ஈரானுக்கு ஆயுதங்களை வழங்கினால் சீனா மீது 50 சதவீதம் வரி
/indian-express-tamil/media/media_files/2026/03/23/iran-2026-03-23-12-12-13.jpg)
பாகிஸ்தான் தலைநகர் இஸ்லாமாபாத்தில் ஈரான் மற்றும் அமெரிக்கா இடையே நடைபெற்று வரும் போர் நிறுத்தப் பேச்சுவார்த்தைகள் உலக நாடுகளின் கவனத்தை ஈர்த்துள்ளன. கடந்த ஆறு வாரங்களாக நீடித்து வரும் போரை முடிவுக்குக் கொண்டு வரவும், ஹார்முஸ் ஜலசந்தியை மீண்டும் திறக்கவும் இலக்கு நிர்ணயித்து இந்த உயர்மட்டப் பேச்சுவார்த்தைகள் நடைபெறுகின்றன. சனிக்கிழமை மதியம் தொடங்கிய இந்த ஆலோசனையில், அமெரிக்கத் தரப்பில் துணை அதிபர் ஜே.டி.வான்ஸ், ஸ்டீவ் விட்காஃப் மற்றும் ஜாரெட் குஷ்னர் ஆகியோர் பங்கேற்றுள்ளனர். ஈரான் தரப்பில் நாடாளுமன்ற சபாநாயகர் முகமது பாகர் காலிபாஃப் மற்றும் வெளியுறவுத்துறை அமைச்சர் அப்பாஸ் அரக்சி ஆகியோர் முன்னிலை வகிக்கின்றனர். இந்தப் பேச்சுவார்த்தையை பாகிஸ்தான் ராணுவத் தளபதி முன்னின்று நடத்துகிறார்.
இருப்பினும், தீவிரமான பேச்சுவார்த்தைகளுக்குப் பிறகும் இரு நாடுகளுக்கும் இடையே உடன்பாடு எட்டப்படவில்லை என்று அமெரிக்க துணை அதிபர் ஜே.டி.வான்ஸ் அறிவித்துள்ளார். அமெரிக்கா "நல்லெண்ணத்துடன்" பேச்சுவார்த்தைக்கு வந்ததாகவும், ஆனால் ஈரான் தனது அணு ஆயுதத் தயாரிப்பைக் கைவிடுவதாக உறுதியளிக்க வேண்டியது அவசியம் என்றும் அவர் வலியுறுத்தியுள்ளார். ஈரான் தரப்போ, அமெரிக்கா பேச்சுவார்த்தையில் இருந்து விலகுவதற்கு "சாக்குப்போக்குகளைத் தேடுவதாக" குற்றம் சாட்டியுள்ளதுடன், அமெரிக்காவின் கோரிக்கைகள் மிகவும் அதீதமானவை என்று விவரித்துள்ளது.
குறிப்பாக, ஹார்முஸ் ஜலசந்தி விவகாரத்தில் இரு நாடுகளுக்கும் இடையே கடுமையான கருத்து வேறுபாடுகள் நீடிப்பதாகத் தெரிகிறது. இதுவரை தாங்கள் ஈட்டிய ராணுவ வெற்றிகளைத் தக்கவைத்துக் கொள்வதில் ஈரான் பிடிவாதமாக இருப்பதாக அந்நாட்டின் தஸ்னிம் செய்தி நிறுவனம் தெரிவித்துள்ளது. இதற்கிடையில், ஹார்முஸ் ஜலசந்தியில் உள்ள கண்ணிவெடிகளை அகற்றும் பணியில் அமெரிக்கா ஈடுபட்டுள்ளதாக அதிபர் டொனால்ட் ட்ரம்ப் தெரிவித்துள்ளார். ஆனால், ஈரான் அரசு ஊடகமோ, அப்பகுதியில் இருந்த அமெரிக்கப் போர்வைக்கப்பல் ஒன்றை 30 நிமிடங்களுக்குள் வெளியேறுமாறு எச்சரித்ததாகவும், இல்லையெனில் தாக்குதல் நடத்தப்படும் என்று கூறியதாகவும் செய்தி வெளியிட்டுள்ளது.
வாஷிங்டனில் இருந்து கருத்து தெரிவித்துள்ள அதிபர் ட்ரம்ப், பேச்சுவார்த்தைகள் தோல்வியடைந்தால் அமெரிக்கப் போர்வைக்கப்பல்கள் தாக்குதலுக்குத் தயாராக இருப்பதாக எச்சரித்துள்ளார். அடுத்த 24 மணி நேரத்திற்குள் ஒரு தீர்வு எட்டப்படுமா அல்லது பேச்சுவார்த்தை முறியுமா என்பது தெரியவரும் என்று அவர் குறிப்பிட்டுள்ளார். மறுபுறம், லெபனான் மீது இஸ்ரேல் நடத்தும் தாக்குதல்களை உடனடியாக நிறுத்த வேண்டும் என்றும், முடக்கப்பட்ட தங்களின் சொத்துக்களை விடுவிக்க வேண்டும் என்றும் ஈரான் தரப்பு நிபந்தனைகளை விதித்துள்ளது. லெபனானில் இருந்து ஹிஸ்புல்லா அமைப்பு நடத்தும் ஏவுகணைத் தாக்குதல்கள் இந்தப் பேச்சுவார்த்தையில் பாதிப்பை ஏற்படுத்தலாம் என்று அஞ்சப்படுகிறது. தற்போது இஸ்லாமாபாத்தில் பலத்த பாதுகாப்பு ஏற்பாடுகள் செய்யப்பட்டுள்ள நிலையில், இரு நாடுகளுக்கும் இடையே பாலமாகச் செயல்பட பாகிஸ்தான் பிரதமர் ஷேபாஸ் ஷெரீப் முயற்சிகளை மேற்கொண்டு வருகிறார்.
11 04 2026
