தேர்தல் விதிமீறல் புகார்: முதலமைச்சரின் செயலாளருக்கு எதிராக சென்னை உயர்நீதிமன்றம் உத்தரவு

 

தமிழக முதலமைச்சர் மு.க. ஸ்டாலினின் செயலாளர் பி. உமாநாத், தேர்தல் நடத்தை விதிகளை மீறியதாகத் தொடரப்பட்ட பொதுநல வழக்கில், இந்திய தேர்தல் ஆணையம் மற்றும் தமிழக தலைமைத் தேர்தல் அதிகாரி ஆகியோருக்கு சென்னை உயர்நீதிமன்றம் நோட்டீஸ் அனுப்ப உத்தரவிட்டுள்ளது.

11 4 2026

ஏ. மோகன்தாஸ் என்பவர் தாக்கல் செய்துள்ள அந்த மனுவில், ஐஏஎஸ் அதிகாரியான பி. உமாநாத், மாவட்ட ஆட்சியர்களுக்கும் காவல்துறை அதிகாரிகளுக்கும் நிர்வாக ரீதியான உத்தரவுகளைப் பிறப்பித்ததன் மூலம் தேர்தல் நடத்தை விதிகளை மீறியுள்ளதாகக் குற்றம் சாட்டியுள்ளார். இந்த மனுவானது தலைமை நீதிபதி சுஷ்ருத் அரவிந்த் தர்மாதிகாரி மற்றும் நீதிபதி ஜி. அருள் முருகன் ஆகியோர் அடங்கிய முதல் அமர்வு முன்பாக வெள்ளிக்கிழமை (ஏப்ரல் 10, 2026) விசாரணைக்கு வந்தது.

விசாரணையின் போது, இந்த வழக்கில் பி. உமாநாத்தை ஒரு எதிர்மனுதாரராகச் சேர்ப்பதற்கான மனுதாரரின் கோரிக்கையையும் நீதிபதிகள் ஏற்றுக்கொண்டனர். மேலும், இந்த பொதுநல மனு தொடர்பாக விரிவான விளக்கங்களை அளிக்குமாறு தேர்தல் ஆணையத்தின் வழக்கறிஞர் நிரஞ்சன் ராஜகோபாலுக்கு உத்தரவிட்ட நீதிபதிகள், வழக்கின் அடுத்தக்கட்ட விசாரணையை ஏப்ரல் 17-ஆம் தேதிக்கு ஒத்திவைத்தனர்.

source https://tamil.indianexpress.com/tamilnadu/madras-high-court-orders-notice-to-election-commission-in-case-against-chief-ministers-secretary-11714097