25 5 2022
ரஷ்யாவின் நோக்கம் நிறைவேறும் வரை உக்ரைன் மீதான தாக்குதல் தொடரும் என்று அந்நாட்டின் பாதுகாப்பு அமைச்சர் செர்கி ஷோய்கு தெரிவித்துள்ளார்.
தலைநகர் மாஸ்கோவில் நிகழ்ச்சி ஒன்றில் பேசிய அவர், அமெரிக்காவும், மேற்கத்திய நாடுகளும் உக்ரைனுக்கு அதிக அளவில் பொருளாதார, ஆயுத உதவிகளை வழங்கி வருவதையும், ரஷ்யாவுக்கு எதிராக பொருளாதார தடைகளை விதித்திருப்பதையும் சுட்டிக்காட்டினார். இருந்தபோதும், ரஷ்யாவின் நோக்கங்கள் நிறைவேறும் வரை சிறப்பு ராணுவ நடவடிக்கை தொடரும் என அவர் குறிப்பிட்டார்.
வேண்டும் என்றே சிறப்பு ராணுவ நடவடிக்கை நிதானமாக இருப்பதாகக் குறிப்பிட்ட அவர், அப்பாவி மக்கள் உயிரிழப்பதை தடுக்கவே இந்த நிதானம் கடைப்பிடிக்கப்படுவதாகக் கூறினார்.
ரஷ்யாவுக்கு எதிரான பொருளாதார தடைகளால் தங்கள் ராணுவத்தை தடுத்து நிறுத்த முடியாது என தெரிவித்த செர்கி ஷோய்கு, உலகில் 109 நாடுகளுடன் ரஷ்யா ராணுவ உறவு கொண்டிருப்பதாகத் தெரிவித்தார்.
மாஸ்கோவில், வரும் ஜூன் மாதம் சர்வதேச பாதுகாப்பு மாநாடு நடைபெற உள்ளதாகத் தெரிவித்த செர்கி ஷோய்கு, இதில், 109 நாடுகளின் பிரதிநிதிகள் பங்கேற்க இருப்பதாகத் தெரிவித்தார். இது உலகின் மிகப் பெரிய ராணுவ மற்றும் அரசியல் முக்கியத்துவம் வாய்ந்த நிகழ்ச்சி என்றும் அவர் குறிப்பிட்டார்.
source https://news7tamil.live/russia-to-continue-military-operation.html
