source https://news7tamil.live/do-not-go-abroad-for-work-through-fake-agents-minister-senji-mastan.html
போலி ஏஜென்டுகள் மூலமாக வெளி நாட்டுக்கு வேலைக்கு செல்லாதீர்கள் என அமைச்சர்
செஞ்சி மஸ்தான் தமிழக மக்களிடம் கோரிக்கை விடுத்தார். மீதம் இருக்கும் தமிழக மக்களை தமிழக அரசு மீட்டுக் கொண்டு வரும் என அமைச்சர் உறுதி அளித்தார்.
மியான்மரில் பல மாதங்களாக சிக்கித் தவித்த தமிழகத்தைச் சேர்ந்த 13 பேர்
நேற்று இரவு சென்னை விமான நிலையத்திற்கு வந்தடைந்தனர். செவ்வாய்க்கிழமை தாய்லாந்தில் இருந்து டெல்லி வந்தடைந்து நிலையில் நேற்று இரவு சென்னை வந்தடைந்தனர்.
அமைச்சர் செஞ்சி மஸ்தான் பொன்னாடை அணிவித்து அவர்களை வரவேற்றார். பின்னர்
செய்தியாளர்களிடம் பேசிய அவர் கூறியதாவது:
பல்வேறு ஏஜென்டுகள் மூலமாக தாய்லாந்துக்கு வேலைக்கு சென்றவர்கள் சொன்ன
வேலைக்கு பதிலாக வேறு வேலை செய்யச் சொன்னதால் தாய் நாட்டிற்கு திரும்ப
முடியாமல் சிக்கித் தவித்தனர். மேலும் இவர்கள் அங்கு பல்வேறு சித்திரவதைகள்
அனுபவித்து உள்ளனர்.
இதனை அறிந்த தமிழக முதல்வர் மத்திய வெளியுறவுத் துறை அமைச்சருக்கு கடிதம்
எழுதினார். பின்னர் தமிழகத்தைச் சேர்ந்த 13 பேரை மீட்டுள்ளோம். மீதம் உள்ளவர்களை
விரைவில் மீட்போம்.
போலி ஏஜென்டுகள் மூலமாக வெளி நாட்டுக்கு வேலைக்கு செல்லாதீர்கள். மீதம் இருக்கும் தமிழக மக்களை தமிழக அரசு மீட்டுக் கொண்டு வரும் என்றார் அமைச்சர் செஞ்சி மஸ்தான்.
