தமிழகம் முழுவதும் சிறு வியாபாரிகள் உள்பட பலரும் ரூ.1 லட்சம் வரை ரொக்கமாக எடுத்துச் செல்ல அனுமதி வழங்கப்படும் என, மாநில தேர்தல் அதிகாரி ராஜேஷ் லக்கானி தெரிவித்துள்ளார். இதுதொடர்பாக, சென்னையில் செய்தியாளர்களிடம் அவர் கூறியதாவது:
மாநிலம் முழுவதும் பறக்கும் படையினர் சோதனை தீவிரப்படுத்தப்படும். வாகன சோதனை காரணமாக சிறு வியாபாரிகள் பாதிக்கப்படுவதாகக் கூறப்படுகிறது. எனவே ரூ. 1 லட்சம் வரை எடுத்துச் செல்ல அனுமதிக்கப்படும். இதுபற்றி ஆலோசனை வழங்கியுள்ளோம். விரைவில் இதுதொடர்பாக, அறிவிப்பு வெளியிடப்படும்.
ரூ.1 லட்சத்துக்கு மேல் பணம் பறிமுதல் செய்யப்பட்டால், 24 மணி நேரத்துக்குள் விசாரித்து பணம் திருப்பி கொடுக்கப்படும். ரூ.5 லட்சத்துக்கு மேல் பணம் பறிமுதல் செய்யப்பட்டால் விசாரித்து 3 நாட்களில் திருப்பி கொடுக்கப்படும்.
இவ்வாறு ராஜேஷ் லக்கானி தெரிவித்தார்.
