5 11 2022
கடலூர் மாவட்ட சிதம்பரத்தில் உள்ள பேருந்து நிறுத்தத்தில் 16 வயது பள்ளி மாணவிக்கு சக மாணவன் மஞ்சள் கயிறு கட்டுவது போன்ற வீடியோ சமூகவலைதளங்களில் வெளியாகின. செப்டம்பர் 2-ம் தேதி நடந்த சம்பவத்தின் காட்சிகள் வெளியாகி அதிகம் பகிரப்பட்டது. இதை வீடியோ பதிவு செய்து வெளியிட்ட நபரை காவல்துறையினர் கைது செய்தனர். இந்தநிலையில், அக்டோபர் 10-ம் தேதி மாணவன் மீது சிதம்பரம் நகர போலீசார் வழக்குப்பதிவு செய்தனர்.
அதேபோல் மாணவியை வீட்டிலிருந்து அழைத்து அரசு காப்பகத்தில் சேர்த்துள்ளனர். இதுதொடர்பாக மாணவியின் பெற்றோர், மகளை மீட்டுத் தரக் கோரி சென்னை உயர்நீதிமன்றத்தில் ஆட்கொணர்வு மனு அளித்தனர். இந்த மனு இன்று (நவம்பர் 5) நீதிபதிகள் பிரகாஷ், டீகாராமன் அமர்வு முன் விசாரணைக்கு வந்தது. அப்போது, மாணவி அரசு காப்பகத்தில் ஒப்படைக்கப்பட்டதற்கு அதிருப்தி தெரிவித்தனர். மேலும், மாணவியை உடனடியாக பெற்றோரிடம் ஒப்படைக்கவும் உத்தரவிட்டனர்.
தொடர்ந்து, மாணவன் மீது வழக்குப்பதிவு செய்த போலீசாரின் செயலுக்கு கண்டனம். முழுமையாக விசாரணை செய்யாமல் நடவடிக்கை எடுத்ததற்கு அதிருப்தி, அவசர கதியில் மாணவியை தங்க வைத்த குழந்தைகள் நலக்குழு அதிகாரிகளுக்கு நீதிபதிகள் கண்டனம் தெரிவித்தனர். மாணவனுக்கு எதிராக பதிவு செய்யப்பட்ட வழக்கில் எடுத்த நடவடிக்கைகள் என்ன? என அறிக்கை தாக்கல் செய்ய சிதம்பரம் நகர போலீசாருக்கு உத்தரவிட்டு வழக்கு விசாரணையை வரும் 10-ம் தேதிக்கு ஒத்திவைத்து நீதிபதிகள் உத்தரவிட்டனர்.
source https://tamil.indianexpress.com/tamilnadu/viral-video-of-a-16-year-old-boy-tying-a-yellow-thread-to-girl-mhc-expressed-severe-disappointment-with-police-and-cwc-536657/
