சர்வதேச விலை உயர்வு எதிரொலி: உஜ்வலா பயனாளிகளுக்கான மானிய சிலிண்டர்கள் ஆண்டுக்கு 4 ஆகக் குறைப்பு!

 

பிரதான் மந்திரி உஜ்வலா யோஜனா (PMUY) திட்டத்தின் கீழ் ஏழை குடும்பங்களைச் சேர்ந்த பெண்களுக்கு வழங்கப்படும் மானிய விலை சமையல் எரிவாயு சிலிண்டர்களின் எண்ணிக்கை ஆண்டுக்கு நான்காகக் குறைக்கப்பட்டுள்ளது. சராசரி குடும்பப் பயன்பாட்டு அளவோடு இதனைப் பொருத்துவதற்காக இந்த நடவடிக்கை எடுக்கப்பட்டுள்ளதாக மத்திய அரசு அதிகாரி ஒருவர் திங்கள்கிழமை தெரிவித்தார்.

மே 2016-இல் தொடங்கப்பட்ட இத்திட்டத்தின் கீழ், பயனாளிகளுக்குத் தொடக்கத்தில் ஆண்டுக்கு 12 சிலிண்டர்கள் மானிய விலையில் வழங்கப்பட்டு வந்தன. இது கடந்த ஆண்டு 9 சிலிண்டர்களாகக் குறைக்கப்பட்ட நிலையில், தற்போது மேலும் குறைக்கப்பட்டு 4 சிலிண்டர்களாக நிர்ணயிக்கப்பட்டுள்ளது. இந்தத் திருத்தப்பட்ட எண்ணிக்கை உஜ்வலா பயனாளிகளின் சராசரி ஆண்டு நுகர்வுக்குப் பொருந்துவதாக பெட்ரோலியம் மற்றும் இயற்கை எரிவாயு அமைச்சகத்தின் கூடுதல் செயலாளர் பிரவீன் மல் கனூஜா செய்தியாளர் சந்திப்பில் தெரிவித்தார்.

சுத்தமான சமையல் எரிபொருள் பயன்பாட்டை ஊக்குவிக்கவும், மலிவு விலையில் வழங்கவும், மே 2022 முதல் 14.2 கிலோ சிலிண்டருக்கு ரூ.200 நேரடி மானியம் வழங்கப்பட்டது. இது அக்டோபர் 2023-இல் ரூ.300 ஆக உயர்த்தப்பட்டது. கடந்த மூன்று மாதங்களில் டெல்லியில் சிலிண்டர் விலை ரூ.89 வரை உயர்ந்து, தற்போது அதன் சில்லறை விலை ரூ.942 ஆக உள்ளது. ரூ.300 மானியத்திற்குப் பிறகு, உஜ்வலா பயனாளிகள் ஒரு சிலிண்டருக்கு ரூ.642 செலுத்துகின்றனர்.

அரசின் கணக்கீட்டின்படி ஒரு சிலிண்டரின் விநியோகச் செலவு ரூ.1,600 ஆக உள்ள நிலையில், பயனாளிகளுக்கு ஒரு சிலிண்டருக்கு சுமார் ரூ.1,000 வரை ஆதரவு கிடைக்கிறது. ஜூன் 7 அன்று சிலிண்டர் விலை ரூ.29 உயர்த்தப்பட்டது குறித்துப் பேசிய அதிகாரி, இந்த உயர்வு ஒரு நாளைக்கு ஒரு ரூபாய் என்றும், ஐந்து பேர் கொண்ட குடும்பத்திற்கு ஒரு நாளைக்கு 20 பைசா என்றும் குறிப்பிட்டார்.

மேற்கு ஆசியாவில் ஏற்பட்ட போர் மற்றும் பதற்றம் காரணமாக சர்வதேச சந்தையில் எல்பிஜி விலை கடுமையாக உயர்ந்த போதிலும், உலக அளவில் இந்தியக் குடும்பங்கள் சமையல் எரிவாயுவிற்கு மிகக் குறைந்த விலையையே செலுத்துகின்றன. இந்தியாவின் எல்.பி.ஜி இறக்குமதிச் செலவு சவூதி ஒப்பந்த விலையுடன் இணைக்கப்பட்டுள்ளது. ஹார்முஸ் நீரிணைப்பு வழியிலான விநியோகத் தடைகளால் பிப்ரவரி முதல் இந்த உலகளாவிய விலை 46 சதவீதம் உயர்ந்துள்ளது.

அரசு 2022 முதல் ரூ.52,000 கோடி மானியம் வழங்கியுள்ளது. தற்போதைய விலை உயர்வுக்குப் பிறகும், எண்ணெய் நிறுவனங்களுக்கு ஒரு சிலிண்டருக்கு ரூ.700 வரை இழப்பு ஏற்படுகிறது. எல்பிஜி தவிர, பெட்ரோல் மற்றும் டீசலையும் அடக்க விலையை விடக் குறைவாக விற்பனை செய்வதால் எண்ணெய் நிறுவனங்களுக்கு இழப்பு ஏற்படுகிறது. பெட்ரோலில் லிட்டருக்கு ரூ.6 மற்றும் டீசலில் லிட்டருக்கு ரூ.30 என்ற அளவில் இழப்பு ஏற்படுவதோடு, ஒட்டுமொத்தமாக எண்ணெய் நிறுவனங்களுக்கு ரூ.600-700 கோடி வரை இழப்பு ஏற்படுகிறது. இந்த இழப்புகளே விலை உயர்வுக்குக் காரணமாகக் கூறப்பட்டுள்ளது. கடந்த மாதத்தில் பெட்ரோல் மற்றும் டீசல் விலைகள் நான்கு கட்டங்களாக லிட்டருக்கு தலா ரூ.7.50 வரையும், சிஎன்ஜி விலை கிலோவுக்கு ரூ.6 வரையும் உயர்த்தப்பட்டுள்ளது குறிப்பிடத்தக்கது.

source https://tamil.indianexpress.com/business/government-cuts-subsidised-lpg-cylinders-to-ujjwala-beneficiaries-to-4-annually-12016726