உதயநிதி ஸ்டாலின் வேட்புமனு ஆவணங்களை வழங்க தேர்தல் ஆணையத்திற்கு ஐகோர்ட் உத்தரவு

 

தேர்தல் வழக்குகளைத் தாக்கல் செய்வதற்கு மிகக் குறுகிய கால அவகாசமே உள்ளதால், இந்த ஆவணங்களை விரைந்து வழங்க வேண்டும் என்று நீதிமன்றம் சுட்டிக்காட்டியுள்ளது.

சேப்பாக்கம் - திருவல்லிக்கேணி சட்டமன்றத் தொகுதியில் போட்டியிட்ட உதயநிதி ஸ்டாலின் உள்ளிட்ட வேட்பாளர்களின் வேட்புமனுக்கள் அங்கீகரிக்கப்பட்டது தொடர்பான முக்கிய ஆவணங்களை மனுதாரருக்கு வழங்குமாறு இந்திய தேர்தல் ஆணையத்திற்குச் சென்னை உயர் நீதிமன்றம் உத்தரவிட்டுள்ளது. தேர்தல் வழக்குகளைத் தாக்கல் செய்வதற்கு மிகக் குறுகிய கால அவகாசமே உள்ளதால், இந்த ஆவணங்களை விரைந்து வழங்க வேண்டும் என்று நீதிமன்றம் சுட்டிக்காட்டியுள்ளது.

ஆவணங்கள் கோரி நீதிமன்றத்தில் வழக்கு:

சமீபத்தில் நிறைவடைந்த தமிழகச் சட்டமன்றத் தேர்தலின் போது, சென்னை சேப்பாக்கம் - திருவல்லிக்கேணி தொகுதியில் திமுக, அதிமுக மற்றும் தவெக ஆகிய கட்சிகளின் சார்பில் போட்டியிட்ட வேட்பாளர்களின் வேட்புமனுக்கள் ஏற்றுக்கொள்ளப்பட்டன. இந்த மனுக்கள் பரிசீலிக்கப்பட்ட போது எழுப்பப்பட்ட எதிர்ப்புகள் மற்றும் அவை ஏற்றுக்கொள்ளப்பட்டதற்கான அதிகாரப்பூர்வ ஆவணங்களின் பிரதிகளைக் கேட்டு, அதே தொகுதியில் போட்டியிட்ட மிலானி என்பவர் நீதிமன்றத்தில் வழக்குத் தொடர்ந்திருந்தார்.

தேர்தல் ஆணையத்தின் மறுப்பு:

முன்னதாக, இந்த ஆவணங்களைக் கோரி மிலானி தேர்தல் ஆணையத்திடம் விண்ணப்பித்திருந்தார். ஆனால், தேர்தல் தொடர்பான தகவல்கள் அனைத்தும் ஏற்கனவே பொதுவெளியில் உள்ளதாகவும், தேர்தல் முடிவுகள் அறிவிக்கப்பட்ட 45 நாட்களுக்குப் பின்னரே உரிய கட்டணத்தைச் செலுத்தி இவற்றைத் தனிப்பட்ட முறையில் பெற்றுக்கொள்ள முடியும் என்றும் தேர்தல் ஆணையம் அவரது கோரிக்கையை நிராகரித்திருந்தது.

நீதிமன்றத்தின் முக்கியக் கருத்து:

தேர்தல் முடிவுகளுக்கு எதிராக வழக்குத் தொடர சட்டப்படி 45 நாட்கள் மட்டுமே கால அவகாசம் உள்ளது. போதிய ஆதாரங்கள் இல்லாமல் தாக்கல் செய்யப்படும் வழக்குகள் தள்ளுபடி செய்யப்பட வாய்ப்புள்ளது. எனவே, தேர்தல் வழக்குத் தொடுப்பதற்காகவே இந்த ஆவணங்கள் கோரப்படுவதால், கால அவகாசத்தைக் கருத்தில் கொண்டு அவற்றை மனுதாரருக்கு வழங்க வேண்டும் என்று சென்னை உயர் நீதிமன்ற நீதிபதிகள் ஜி.ஆர்.சுவாமிநாதன் மற்றும் வி.லட்சுமி நாராயணன் ஆகியோர் அடங்கிய அமர்வு உத்தரவிட்டது.

இதனைத் தொடர்ந்து, சேப்பாக்கம் - திருவல்லிக்கேணி தொகுதி சட்டமன்ற உறுப்பினர் (எம்.எல்.ஏ) உதயநிதி ஸ்டாலினின் வேட்புமனு தொடர்பான ஆவணங்கள் ஏற்கனவே மனுதாரரிடம் ஒப்படைக்கப்பட்டுவிட்டதாகத் தேர்தல் ஆணையத்தின் தரப்பில் நீதிமன்றத்தில் விளக்கம் அளிக்கப்பட்டது.

source https://tamil.indianexpress.com/tamilnadu/chennai-high-court-orders-election-commission-to-provide-udayanidhi-stalin-nomination-papers-12023767