சிக்கலில் ஆந்திர மிளகாய் ஏற்றுமதி; முக்கிய அறிவுறுத்தல்

 

இந்தியாவில் இருந்து சீனா உள்ளிட்ட முக்கிய சர்வதேச சந்தைகளுக்கு ஏற்றுமதி செய்யப்படும் உலர்ந்த மிளகாய்களில் பூச்சிக்கொல்லி எச்சங்கள் அனுமதிக்கப்பட்ட அளவை மீறுவதாகக் கண்டறியப்பட்டுள்ள நிலையில், அசெஃபேட் மற்றும் மெத்தமிடோபாஸ் உள்ளிட்ட அபாயகரமான பூச்சிக்கொல்லிகளுக்கு உடனடியாகத் தடை விதிக்க வேண்டும் என்று இந்திய மிளகாய் ஏற்றுமதியாளர்கள் சங்கம் ஆந்திரப் பிரதேச அரசை வலியுறுத்தியுள்ளது. தொடர்ந்து நடைபெறும் எச்ச விதிமீறல்கள் இந்திய மிளகாய்களின் உலகளாவிய நம்பகத்தன்மையையும், குறிப்பாக சீன சந்தையில் நாட்டின் நிலைப்பாட்டையும் பாதிக்கும் அபாயம் இருப்பதாக சங்கம் எச்சரித்துள்ளது.

அரசுக்கு மனு; பல பூச்சிக்கொல்லிகள் கவலைக்குரியவை

ஜூன் 15ஆம் தேதி ஆந்திரப் பிரதேச வேளாண்மை, பட்டு வளர்ப்பு, கூட்டுறவு மற்றும் சந்தைப்படுத்தல் துறைக்கு சமர்ப்பிக்கப்பட்ட மனுவில், ஆந்திரப் பிரதேசம், தெலங்கானா மற்றும் கர்நாடகாவில் இருந்து ஏற்றுமதி செய்யப்படும் இந்திய உலர்ந்த மிளகாய் சரக்குகள், பூச்சிக்கொல்லி எச்சங்கள் காரணமாக வெளிநாடுகளில் அதிகளவில் நிராகரிக்கப்படுவதோடு, கூடுதல் ஆய்வுகளுக்கும் தாமதங்களுக்கும் உள்ளாகி வருவதாக குறிப்பிடப்பட்டுள்ளது.

சங்கத் தலைவர் வேலகபுடி சம்பசிவ ராவ் மற்றும் பொதுச் செயலாளர் தோட்டா ராமகிருஷ்ணா தலைமையில் தாக்கல் செய்யப்பட்ட மனுவில், மெத்தமிடோபாஸ், அசெஃபேட், மோனோக்ரோடோபாஸ், புரோஃபெனோபாஸ், டிரையாசோபாஸ், எத்தியோன், குளோர்பைரிஃபோஸ் மற்றும் ஃபிப்ரோனில் போன்ற வேதிப்பொருட்கள் கவலைக்குரிய மூலக்கூறுகளாக பட்டியலிடப்பட்டுள்ளன. குறிப்பாக ஏற்றுமதிக்காக பயிரிடப்படும் மிளகாய் சாகுபடிகளில் அசெஃபேட் மற்றும் மெத்தமிடோபாஸ் பயன்பாட்டை முற்றிலுமாகத் தடை செய்ய வேண்டும் என்று சங்கம் வலியுறுத்தியுள்ளது.

பண்ணை முதல் ஏற்றுமதி வரை’ ஒருங்கிணைந்த நடவடிக்கை அவசியம்

இந்த பிரச்சினை ஒரு தனிப்பட்ட விவசாயியின் தவறாக இல்லாமல், “பண்ணை முதல் ஏற்றுமதி வரையிலான முழு விநியோகச் சங்கிலியிலும் உள்ள சவால்” என ஏற்றுமதியாளர்கள் சுட்டிக்காட்டியுள்ளனர். உற்பத்தி, தொழில்நுட்ப ஆலோசனை, ஆய்வக பரிசோதனை, கொள்முதல் மற்றும் கொள்கை வடிவமைப்பு ஆகிய அனைத்து நிலைகளிலும் உடனடி தலையீடு தேவைப்படுவதாக அவர்கள் தெரிவித்துள்ளனர்.

நறுமணப் பொருட்கள் வாரியம், வேளாண் பல்கலைக்கழகங்கள், வேளாண் அறிவியல் மையங்கள் மற்றும் பயிர் பாதுகாப்புத் துறை அதிகாரிகளுடன் இணைந்து, சர்வதேச தரநிலைகளுக்கு ஏற்ப மிளகாய் உற்பத்தி நெறிமுறைகளை உருவாக்க வேண்டும் என்றும் அவர்கள் பரிந்துரைத்துள்ளனர்.

விழிப்புணர்வு முகாம்கள் மற்றும் எச்சப் பரிசோதனைக்கு முக்கியத்துவம்

குண்டூர், பல்நாடு, பிரகாசம், கர்னூல் மற்றும் நந்தியால் போன்ற முக்கிய மிளகாய் உற்பத்தி மாவட்டங்களில் கிராம அளவில் விவசாயிகளுக்கான விழிப்புணர்வு முகாம்கள் நடத்தப்பட வேண்டும் என்று சங்கம் கோரியுள்ளது. மேலும் அறுவடைக்கு முன்பே பயிர்களில் பூச்சிக்கொல்லி எச்சப் பரிசோதனை மேற்கொள்வது, தொகுதி வாரியான மாதிரி சேகரிப்பு, பூச்சிக்கொல்லி விற்பனையாளர்களின் செயல்பாடுகளை கண்காணித்தல் மற்றும் தரச் சான்றிதழ் நடைமுறைகளை வலுப்படுத்துதல் ஆகியவற்றையும் பரிந்துரைத்துள்ளது.

IPM, INM, GAP நடைமுறைகளைப் பின்பற்ற விவசாயிகளுக்கு அழைப்பு

ஒருங்கிணைந்த பூச்சி மேலாண்மை (IPM) திட்டத்தின் கீழ் பரிந்துரைக்கப்பட்ட அளவிலேயே பூச்சிக்கொல்லிகளை பயன்படுத்த வேண்டும் என்று சங்க பொதுச் செயலாளர் தோட்டா ராமகிருஷ்ணா வலியுறுத்தியுள்ளார். அதேபோல், ஒருங்கிணைந்த ஊட்டச்சத்து மேலாண்மை (INM), நல்ல வேளாண் நடைமுறைகள் (GAP) மற்றும் ஒருங்கிணைந்த பயிர் மேலாண்மை (ICM) முறைகளை விவசாயிகள் கட்டாயம் கடைப்பிடிக்க வேண்டும் என்றும் அவர் தெரிவித்துள்ளார்.

ஒவ்வொரு ஏற்றுமதி தொகுதிக்கும் தடமறிதல் முறை அவசியம்

வெளிநாட்டு வாங்குபவர்களின் நம்பிக்கையை நிலைநிறுத்த, ஒவ்வொரு ஏற்றுமதி தொகுதியிலும் விவசாயியின் விவரங்கள், தெளிக்கப்பட்ட மருந்துகளின் பதிவுகள், அறுவடை தேதி மற்றும் தொகுதி எண் போன்ற தகவல்களைப் பதிவு செய்யும் ‘டிரேஸபிலிட்டி’ (Traceability) முறையை கட்டாயமாக்க வேண்டும் என்று ஏற்றுமதியாளர்கள் கூறியுள்ளனர்.

சீனாவால் மூன்று சரக்குகள் நிராகரிப்பு

சமீபத்தில் சீன அதிகாரிகள் ஐந்து கொள்கலன்கள் கொண்ட மூன்று மிளகாய் சரக்குகளை நிராகரித்த சம்பவத்தைத் தொடர்ந்து இந்த விவகாரம் மீண்டும் கவனத்திற்கு வந்துள்ளது. இருப்பினும், குண்டூர் வேளாண் சந்தைக் குழுத் தலைவர் குர்ரா அப்பா ராவ், மொத்த ஏற்றுமதி அளவுடன் ஒப்பிடும்போது இந்த நிராகரிப்புகள் மிகவும் குறைவானவை என்றும், பெரும்பாலான விவசாயிகள் அனுமதிக்கப்பட்ட அளவிலான பூச்சிக்கொல்லிகளையே பயன்படுத்தி வருவதாகவும் தெரிவித்துள்ளார்.

மேலும், சிலர் சந்தை விலையை குறைக்கும் நோக்கில் இந்த விவகாரத்தை மிகைப்படுத்துவதாகவும், சர்வதேச வர்த்தகத்தில் அவ்வப்போது இத்தகைய நிராகரிப்புகள் ஏற்படுவது இயல்பான ஒன்றாகும் என்றும் அவர் கூறியுள்ளார்.

பூச்சிக்கொல்லி இல்லா சாகுபடிக்கு ஊக்கம் தேவை

குண்டூரைச் சேர்ந்த அலீஜியன்ஸ் இந்தியா நிறுவனத்தின் நிர்வாகப் பங்குதாரர் வக்வாலா சந்தீப் குமார், குறைந்த எண்ணிக்கையிலான சரக்குகள் நிராகரிக்கப்படுவது சந்தையில் பெரிய பாதிப்பை ஏற்படுத்தாது என்றாலும், நீண்டகால வளர்ச்சிக்காக பூச்சிக்கொல்லி இல்லாத அல்லது குறைந்த ரசாயனப் பயன்பாட்டுடன் கூடிய சாகுபடியை ஊக்குவிக்க வேண்டும் என்று வலியுறுத்தியுள்ளார்.

மேலும், உலகத் தரத்திலான பரிசோதனை ஆய்வகங்கள், விரைவான தரச் சோதனை வசதிகள் மற்றும் ஏற்றுமதி தரத்தை கண்காணிக்கும் உள்கட்டமைப்புகளை அரசு விரிவுபடுத்தினால், இந்திய மிளகாய்கள் சர்வதேச சந்தையில் மேலும் வலுவான இடத்தைப் பெறும் என்றும் அவர் கருத்து தெரிவித்துள்ளார்.

அந்நியச் செலாவணி வருவாயையும் பாதிக்கும் அபாயம்

தொடர்ச்சியான பூச்சிக்கொல்லி எச்ச விதிமீறல்கள் விவசாயிகள், ஏற்றுமதியாளர்கள், பதப்படுத்தும் நிறுவனங்கள், வர்த்தகர்கள் மற்றும் தளவாடத் துறையினரின் வருவாயை மட்டுமல்லாமல், நாட்டின் அந்நியச் செலாவணி வருவாயையும் பாதிக்கக்கூடும் என நிபுணர்கள் எச்சரிக்கின்றனர். எனவே, தரமான மற்றும் பாதுகாப்பான மிளகாய் உற்பத்தியை உறுதி செய்வதற்கான ஒருங்கிணைந்த நடவடிக்கைகள் அவசரத் தேவையாக மாறியுள்ளன.

source https://tamil.indianexpress.com/international/indian-chilli-exporters-seek-ban-on-hazardous-pesticides-amid-concerns-over-china-rejections-12048583