விபத்து மரணங்களைத் தடுக்கத் தவறிய மாநிலங்கள்:

26 6 2026

இந்தியாவில் சாலை விபத்துகளால் ஆண்டுக்கு 1.77 லட்சம் பேர் உயிரிழக்கும் அவல நிலைக்குப் பின்னால் ஒரு அதிர்ச்சிகரமான உண்மை ஒளிந்துள்ளது. விபத்தில் சிக்குபவர்களின் உயிரைக் காப்பதற்காக உச்ச நீதிமன்றம் வலியுறுத்திய முழுமையான அவசரக்கால அதிர்ச்சிப் பராமரிப்பு (Trauma care) உள்கட்டமைப்பை நாட்டின் எந்தவொரு மாநிலமும் இதுவரை முழுமையாக அமைக்கவில்லை என்பது, கடந்த ஒன்பது மாதங்களில் 34 மாநிலங்கள் மற்றும் யூனியன் பிரதேசங்கள் நீதிமன்றத்தில் சமர்ப்பித்த தரவுகள் மூலம் தெரியவந்துள்ளது.

விபத்து நடந்த முதல் 60 நிமிடங்களான 'கோல்டன் ஹவர்'  எனப்படும் பொன்னான நேரத்தில் பாதிக்கப்பட்டவர்களைக் காப்பாற்றுவதற்கு ஐந்து முக்கிய வழிமுறைகள் அவசியமானவை. அவை: பொதுவான அவசர உதவி தொலைபேசி எண், ஜிபிஎஸ் பொருத்தப்பட்ட ஆம்புலன்ஸ்கள், நற்சிந்தனையாளர் பாதுகாப்புச் சட்டம், காயப் பதிவேடு மற்றும் மீட்பு நெறிமுறைகள் ஆகும். உச்ச நீதிமன்றம் தனது மே 26 உத்தரவில் குறிப்பிட்ட ஒன்பது நடவடிக்கைகளில் இந்த ஐந்துமே மிக முக்கியமானவை எனச் சுட்டிக்காட்டியிருந்தது. டெல்லியைச் சேர்ந்த 'சேவ்லைப் ஃபவுண்டேஷன்' (SaveLIFE Foundation) என்ற சாலைப் பாதுகாப்பு அமைப்பு தாக்கல் செய்த மனுவை விசாரித்தே உச்ச நீதிமன்றம் இந்த உத்தரவைப் பிறப்பித்தது.

நீதிமன்றத்தில் சமர்ப்பிக்கப்பட்ட 1,200 பக்கங்கள் கொண்ட ஆவணங்களின்படி, நாட்டின் ஒட்டுமொத்த சாலை விபத்து மரணங்களில் மூன்றில் இரண்டு பங்கு பங்கைக் கொண்டுள்ள உத்தரப் பிரதேசம், தமிழ்நாடு, மகாராஷ்டிரா, மத்தியப் பிரதேசம், கர்நாடகா, ராஜஸ்தான், பீகார் மற்றும் ஆந்திரப் பிரதேசம் ஆகிய எட்டு மாநிலங்களில், கர்நாடகா தகவல்களை வழங்கவில்லை; மற்ற ஏழு மாநிலங்கள் தங்களின் அவசர எண்களை இன்னும் '112' என்ற பொது எண்ணுடன் முழுமையாக இணைக்கவில்லை. காவல், தீயணைப்பு, மருத்துவம், நெடுஞ்சாலை எனப் பல்வேறு அவசர எண்களால் ஏற்படும் குழப்பத்தைத் தவிர்க்க, மத்திய உள்துறை அமைச்சகம் 2019-ல் இந்த '112' தேசிய அவசர அழைப்பு எண்ணை அறிமுகப்படுத்தியது.

அடுத்ததாக, விபத்தில் சிக்கியவர்களுக்கு உதவ நினைப்பவர்கள் காவல்துறை மற்றும் மருத்துவமனைகளின் தேவையற்ற விசாரணைகளுக்கு அஞ்சி தயங்குகிறார்கள். நற்சிந்தனையாளர்களைப் பாதுகாப்பதற்காக 2016-ல் உச்ச நீதிமன்றம் உத்தரவிட்டதுடன், மத்திய சாலைப் போக்குவரத்து அமைச்சகம் 2020-ல் நற்சிந்தனையாளர் விதிகளையும் அறிவித்தது. இதன்படி கோல்டன் ஹவர் நேரத்தில் உதவுபவர்களுக்கு ரூ. 25,000 வெகுமதியும் அறிவிக்கப்பட்டது. இருப்பினும், அதிக மரணங்கள் நிகழும் அந்த எட்டு மாநிலங்களில் மகாராஷ்டிரா மற்றும் கர்நாடகா ஆகிய இரு மாநிலங்களில் மட்டுமே நற்சிந்தனையாளர்களுக்கான குறைதீர்ப்பு அமைப்பு உள்ளது. நான்கு மாநிலங்களில் இது இல்லை; இரண்டு மாநிலங்கள் தகவல்களைத் தரவில்லை. இந்தியாவில் அவசரச் சிகிச்சையில் ஏற்படும் தாமதத்தால் மட்டுமே 30 சதவீத மரணங்கள் நிகழ்கின்றன என நிதி ஆயோக் மற்றும் எய்ம்ஸ் அமைப்பின் 2021 அறிக்கை குறிப்பிடுவதால், இந்த உள்கட்டமைப்பு தாமதம் கவலையளிக்கிறது.

விபத்தில் காயமடைந்த ஒரு நோயாளி சம்பவ இடத்திலிருந்து ஆம்புலன்ஸ், மருத்துவமனை சிகிச்சை மற்றும் வீடு திரும்புவது வரை அனைத்தையும் கண்காணிக்கும் மருத்துவத் தரவுத்தளமான 'டிராவ்மா ரெஜிஸ்ட்ரி'  முறையும் பெரும்பாலான மாநிலங்களில் இல்லை. எட்டு மாநிலங்களில் ஐந்து மாநிலங்களில் இந்த வசதி இல்லை. தமிழ்நாடு, மகாராஷ்டிரா மற்றும் மத்தியப் பிரதேசம் ஆகிய மூன்று மாநிலங்கள் மட்டுமே தங்களிடம் இந்த வசதி இருப்பதாகக் கூறியுள்ளன. இதில் தமிழ்நாடு ஆம்புலன்ஸ் விவரங்கள் மற்றும் மருத்துவமனை சிகிச்சைகளை உடனுக்குடன் பதிவு செய்கிறது. அதேபோல், மீட்பு நெறிமுறையைப் பொறுத்தவரை கர்நாடகாவைத் தவிர மற்ற ஏழு மாநிலங்கள் இதனை வைத்துள்ளன. ஒட்டுமொத்தமாக இந்தியாவில் 34 மாநிலங்கள்/யூனியன் பிரதேசங்களில் 8 மாநிலங்களில் மட்டுமே குறைதீர்ப்பு அமைப்பும், 17 மாநிலங்களில் மீட்பு நெறிமுறைகளும் உள்ளன. 22 மாநிலங்களில் காயப் பதிவேடு இல்லை. 13 மாநிலங்களில் ஆம்புலன்ஸ்களில் ஜிபிஎஸ் வசதியே இல்லை அல்லது அரசு ஆம்புலன்ஸ்களில் மட்டுமே மிகக் குறைவாக உள்ளது.

தனியார் ஆம்புலன்ஸ்கள் உட்பட அனைத்திலும் ஜிபிஎஸ் உள்ளதா என உச்ச நீதிமன்றம் கேட்ட கேள்விக்கு, எட்டு மாநிலங்கள் 'ஆம்' என்று பதிலளித்தாலும், அவை தனியார் ஆம்புலன்ஸ் தரவுகளைச் சேர்க்காததால் அது முழுமையான தகவலாக இல்லை. மேலும், ஆம்புலன்ஸ்களைக் கண்காணிக்கும் டேஷ்போர்டை பொதுமக்களின் பார்வைக்கு வைப்பது குறித்துப் பார்க்கும்போது, ஆறு மாநிலங்கள் தங்களிடம் இந்த வசதி இருந்தும் பொதுமக்களுக்கு அதனைத் திறக்கவில்லை எனத் தெரிவித்துள்ளன. இதனால் விபத்தில் சிக்கியவர்களின் குடும்பத்தினரால் தங்களுக்கு அருகில் உள்ள ஆம்புலன்ஸ் அனுப்பப்பட்டதா என்பதை அறிய முடிவதில்லை. உத்தரப் பிரதேசம் மற்றும் தமிழ்நாடு ஆகிய இரு மாநிலங்கள் மட்டுமே தங்களது ஆம்புலன்ஸ் கண்காணிப்பு இணையப் பக்கத்தைப் பொதுமக்களுக்குத் திறந்துவிட்டுள்ளன. மேலும், ஏழு மாநிலங்கள் தங்களது ஆம்புலன்ஸ் நடமாட்டத்தை 112 தேசிய அவசர எண்ணுடன் இணைக்காததால், ஆம்புலன்ஸ் மருத்துவமனைக்குச் செல்ல எடுத்துக்கொண்ட நேரத்தைத் துல்லியமாகக் கணக்கிட முடிவதில்லை.

மாநிலங்களின் தனிப்பட்ட நிலவரங்களைப் பார்க்கும்போது, சாலை மரணங்களில் உத்தரப் பிரதேசம் முதலிடத்தில் உள்ளது. அங்கு 2024-ல் 24,118 மரணங்கள் பதிவாகியுள்ளன; அதாவது சராசரியாக இரண்டு விபத்துகளில் ஒரு மரணம் நிகழ்கிறது. அங்கு 102 எண்ணைத் தவிர மற்ற அனைத்தும் 112-டன் இணைக்கப்பட்டுள்ளன. நற்சிந்தனையாளர்களுக்குத் தனி குறைதீர்ப்பு அமைப்பு இல்லையென்றாலும், மருத்துவமனைகளில் உள்ள பொதுவான புகார் பெட்டிகள் மூலம் 24 மணி நேரத்திற்குள் தீர்வு காணப்படுவதாக அம்மாநிலம் கூறுகிறது. அங்கு மாநில அளவிலான ஒருங்கிணைந்த காயப் பதிவேடு இல்லை, மருத்துவமனைகளில் கைமுறையாகவே தரவுகள் பதியப்படுகின்றன.

சாலை விபத்துகளில் முதலிடத்திலும், மரணங்களில் இரண்டாம் இடத்திலும் உள்ள தமிழ்நாடு, அவசர எண்களைப் பகுதியாகவே இணைத்துள்ளது. ஆனால், பிரதிபலிப்பு ஆடைகள், எச்சரிக்கைக் கூம்புகள், கனடியன் அவசரநிலை அளவீடு  அடிப்படையிலான சிகிச்சைகள் மற்றும் மொபைல் செயலி மூலம் மருத்துவமனைக்கு முன்கூட்டியே தகவல் தெரிவிக்கும் அதிநவீன மீட்பு நெறிமுறைகளைத் தமிழ்நாடு தன் வசம் வைத்துள்ளது. மகாராஷ்டிரா அரசு தனது '108' ஆம்புலன்ஸ்களில் மட்டுமே ஜிபிஎஸ் உள்ளதாகக் கூறியுள்ளது. மத்தியப் பிரதேசம் தனது நற்சிந்தனையாளர் குறைதீர்ப்பு அமைப்பு இன்னும் பரிசீலனையில் உள்ளதாகத் தெரிவித்துள்ளது.

கர்நாடக மாநிலம் தங்களிடம் காயப் பதிவேடு இல்லை என்றும், மத்திய அரசின் கொள்கை வந்ததும் அதை அமைப்போம் என்றும் கூறியுள்ளதுடன், 108 ஆம்புலன்ஸ்கள் மட்டுமே கண்காணிக்கப்படுவதாகத் தெரிவித்துள்ளது. ராஜஸ்தானில் காயப் பதிவேடு அமைப்பதற்கான வழிகாட்டுதல்கள் தயாரிப்பில் உள்ளன. பீகார் மாநிலம் நற்சிந்தனையாளர்களுக்கெனத் தனியாக இல்லாமல், பொதுவான மருத்துவப் புகார்களுக்கான குறைதீர்ப்பு முறையை வைத்துள்ளதாகக் கூறியுள்ளது. ஆந்திரப் பிரதேசம், மத்திய அரசு 112-ஐ அறிமுகப்படுத்துவதற்கு முன்பாகவே, அதாவது 2005-லேயே தாங்கள் 108 அவசர எண்ணைத் தொடங்கிவிட்டதாகக் குறிப்பிட்டுள்ளது. 

source https://tamil.indianexpress.com/india/saving-lives-on-road-supreme-court-told-states-to-put-in-five-key-measures-hardly-any-state-did-12108057