மூலிகைச் செடிகளை விவசாயிகள் வளர்க்க வனத்துறை உதவும் வகையில் நடவடிக்கை எடுக்க வேண்டும் என்பதை வலியுறுத்தி, கோவை மாவட்ட ஆட்சியரிடம் விவசாயிகள் மனு அளித்தனர்.
தமிழ்நாடு விவசாயிகள் சங்கம் சார்பில் அளிக்கப்பட்ட இந்த மனுவில், மருத்துவ குணம் வாய்ந்த முடக்கத்தான் கீரை, பிரண்டை, கீழாநெல்லி உள்ளிட்டவற்றை விவசாயிகள் அதிக அளவில் வளர்க்க தமிழக அரசு ஊக்குவிக்க வேண்டும் என வலியுறுத்தப்பட்டுள்ளது. தமிழக அரசின் தோட்டக்கலைத்துறை, வனத்துறை ஆகியவை இவ்விவகாரத்தில் விவசாயிகளுக்கு உதவும் வகையில் நடவடிக்கை எடுக்கப்பட வேண்டும் என விவசாயிகள் கேட்டுக்கொண்டனர்.
மருத்துவ குணமுள்ள இந்த வகை மூலிகைகளின் பயன்பாட்டை அதிகரிப்பதன்மூலம், பொதுமக்களின் ஆரோக்கியம் மேம்படும் என்றும், மருத்துவ செலவு கோடிக்கணக்கில் குறையும் என்றும் விவசாயிகள் தங்கள் மனுவில் தெரிவித்துள்ளனர். இது குறித்து மக்களிடையே விழிப்புணர்வை ஏற்படுத்த அரசு முன்வர வேண்டும் என்றும் விவசாயிகள் கோரிக்கை வைத்துள்ளனர்.
