பசுமை நாடுகள் பட்டியலில் மிகவும் பின்தங்கியுள்ள இந்தியா! June 25, 2018

பசுமை நாடுகள் தரவரிசை பட்டியலில், இந்தியா மிகவும் பின்தங்கியிருப்பது ஆய்வு முடிவில் தெரியவந்துள்ளது.

சுவிட்சர்லாந்தில் நடைபெற்ற உலக பொருளாதார மாநாட்டில், உலகளாவிய பசுமை நாடுகளுக்கான சுற்றுச்சூழல் செயல்திறன் தரவரிசை பட்டியல் வெளியிடப்பட்டது.  கொலம்பியா பல்கலைகழகமும் உலக பொருளாதார அமைப்பும் இணைந்து இந்த ஆய்வை மேற்கொள்கின்றன.

விவசாயம், வனங்களை பாதுகாத்தல், காற்று மாசுபாட்டை கையாள்வது, சுத்தமான தண்ணீர், பல்லுயிர் அழிப்பு உள்பட 10 வகையான பிரச்னைகளை வைத்து, மொத்தம் 180 நாடுகளில் ஆய்வு மேற்கொள்ளப்பட்டது.

இந்த தரவரிசையில் சுவிட்சர்லாந்து முதலிடத்திலும், இரண்டாவது இடத்தில் பிரான்ஸ்ஸும், மூன்றாவது டென்மார்க்கும் உள்ளன.

இந்த பட்டியலில், உலகின் வேகமாக முன்னேறி வரும் நாடுகளில் ஒன்றாக கருதப்படும் இந்தியா, 177-வது இடத்தில் பின்தங்கி, கடைசி 5 நாடுகளின் பட்டியலில் இடம் பெற்றுள்ளது.  

2 ஆண்டுகளுக்கு ஒருமுறை மேற்கொள்ளப்படும் இந்த ஆய்வில், கடந்த முறை இந்தியா 141-வது இடத்தில் இருந்தது என்பது குறிப்பிடத்தக்கது.