​“பாம்புகளை எப்படி கையாள வேண்டும் என தந்தை பெரியார் கற்றுத் தந்துள்ளார்” - பாரதிராஜா January 18, 2018

கவிஞர் வைரமுத்து விவகாரத்தில், எங்களை மீண்டும் குற்றப்பரம்பரை ஆக்கிவிடாதீர், என இயக்குநர் பாரதிராஜா கூறியிருப்பது, பெரும் பரபரப்பை ஏற்படுத்தியுள்ளது.

சென்னையில் திரைப்பட நிகழ்ச்சி ஒன்றில் கலந்துகொண்டு பேசும்போது, அவர் இவ்வாறு கூறினார். அப்போது, ஆண்டாள் விவகாரம் தொடர்பாக கருத்து தெரிவித்த இயக்குநர் பாரதிராஜா, வைரமுத்துவை காரணம் காட்டி, தமிழகத்திற்குள் நுழையும் சிலரின் எண்ணம் நிறைவேறாது என்றார். கவிஞர் வைரமுத்து குறித்த பாஜக தேசியச் செயலாளர் எச். ராஜாவின் கருத்துக்கு, மீண்டும் கண்டனம் தெரிவித்த பாரதிராஜா, அமைதிப் பூங்காவாக இருக்கும் தமிழகத்தை கெடுத்துவிடாதீர்கள் என்றும் குறிப்பிட்டார். மீண்டும் எங்களை ஆயுதம் எடுக்க வைக்காதீர் என்று குறிப்பிட்ட பாரதிராஜா, பழையபடி குற்றப்பரம்பரை ஆக்கிவிடாதீர் என்றும், ஆவேசமாக கூறினார்.

பாம்புகளை எப்படி கையாள வேண்டும் என தந்தை பெரியார் கற்றுத் தந்துள்ளார், என்றும் இயக்குநர் பாரதிராஜா தனது பேச்சின்போது குறிப்பிட்டார். மேலும், ஆண்டாள் குறித்து விமர்சித்த வைரமுத்துவின் நாக்கை அறுப்பேன், என கூறியவர்கள் மீது, இதுவரை நடவடிக்கை எடுக்காதது ஏன்? என்று கேள்வி எழுப்பிய பாரதிராஜா, வைரமுத்து வருத்தம் தெரிவித்த பின்பும் போராட்டங்கள் நடத்துவது ஏன்? என்றும் கேள்வி எழுப்பினார்.