கவிஞர் வைரமுத்துவுக்கு ஆதரவாக நடிகர் ரஜினிகாந்த் இதுவரை பேசாதது ஏன்?, என நாம் தமிழர் கட்சியின் தலைமை ஒருங்கிணைப்பாளர் சீமான் கேள்வி எழுப்பியுள்ளார்.
சென்னையில் இன்று செய்தியாளர்களுக்கு பேட்டியளித்த போது, அவர் இவ்வாறு கூறினார். ஆண்டாள் விவகாரம் குறித்து பேசிய சீமான், இந்த பிரச்னையில் வைரமுத்துவுக்கு எதிரான ஹெச்.ராஜாவின் கருத்து, தமிழ் இனத்திற்கு எதிரானது என்று குறிப்பிட்டார். தனது பேச்சுக்கு கவிஞர் வைரமுத்து வருத்தம் தெரிவித்துவிட்ட நிலையில், மன்னிப்பது தான் மனித மாண்பு, என்றும் சீமான் கூறினார்.
மனிதனை கொன்றுவிட்டு மதத்தை காப்பது தான் மாண்பா?, என்று கேள்வி எழுப்பிய சீமான், கவிஞர் வைரமுத்துவை பாதுகாப்பதே தமிழர்களின் கடமை என்றும் குறிப்பிட்டார். மேலும், ஆண்டாள் விவகாரத்தில், வைரமுத்துவுக்கு ஆதரவாக, நடிகர் ரஜினிகாந்த் இதுவரை பேசாதது ஏன்? என்றும் சீமான் கேள்வி எழுப்பினார்.
