அரசு கலை, அறிவியல் கல்லூரிகள் மற்றும் பாலிடெக்னிக் கல்லூரிகளில் சேருவதற்கான ஆன்லைன் விண்ணப்பப் பதிவு இன்று காலை தொடங்கவிருந்த நிலையில் இணையதளப் பிரச்னை காரணமாக மாலை தொடங்கும் என உயர்கல்வித்துறை அறிவித்துள்ளது.
தமிழகம் முழுவதும் உள்ள 109 அரசு கலை மற்றும் அறிவியல் கல்லூரிகள், 54 பாலிடெக்னிக் கல்லூரிகளில் சேருவதற்கான விண்ணப்பப் பதிவு இன்று மாலை தொடங்கவுள்ளதாக உயர்கல்வித்துறை அறிவித்துள்ளது. ஊரடங்கால் கல்லூரிகளுக்கு நேரில் சென்று விண்ணப்பிக்க முடியாத சூழல் நிலவுவதால், முதல் முறையாக ஆன்லைனில் விண்ணப்பப்பதிவு நடைபெறவுள்ளதாக தெரிவித்துள்ளது.
அரசு கலை மற்றும் அறிவியல் கல்லூரிகளில் சேரும் மாணவர்கள் www.tngasa.in, www.tncdeonline.org ஆகிய இணையதளங்கள் மூலமாக விண்ணப்பிக்கலாம் என அறிவுறுத்தியுள்ளது. அரசு பாலிடெக்னிக் கல்லூரிகளில் சேருவதற்கு www.tngptc.in, www.tngptc.com ஆகிய இணையதளங்கள் மூலமாக மாணவர்கள் விண்ணப்பிக்கலாம் என குறிப்பிட்டுள்ளது. விண்ணப்பக் கட்டணம் குறித்த கூடுதல் விவரங்களுக்கு 044 - 22351014, 044 - 22351015 ஆகிய எண்களில் மாணவர்கள் தொடர்பு கொள்ளலாம் என உயர்கல்வித்துறை அறிவித்துள்ளது.
