சென்னை கோபாலபுரம் இல்லத்தில், திமுக தலைவர் கருணாநிதியை நேரில் சந்தித்து பிரதமர் மோடி உடல்நலம் விசாரித்தார்.
தினத்தந்தி பவளவிழா நிகழ்ச்சியில் பங்கேற்பதற்காக சென்னை வந்த பிரதமர் மோடி, நண்பகல் 12 மணியளவில் கோபாலபுரம் இல்லத்திற்கு சென்றார். திமுக செயல் தலைவர் மு.க. ஸ்டாலின், எம்.பி. கனிமொழி உள்ளிட்டோர் பிரதமர் மோடியை சால்வை அணிவித்து வரவேற்றனர்.
அதனைத் தொடர்ந்து கருணாநிதியை சந்தித்து பிரதமர் மோடி உடல்நலம் விசாரித்தார். பின்னர் தனது இல்லத்திற்கு வந்து ஓய்வெடுக்குமாறு கருணாநிதிக்கு அழைப்பு விடுத்தார் பிரதமர் மோடி. அப்போது, முரசொலி பவளவிழா மலரை பிரதமர் மோடிக்கு நினைவுப் பரிசாக கருணாநிதி வழங்கினார். இந்த சந்திப்பின் போது பாரதிய ஜனதா மாநிலத் தலைவர் தமிழிசை சவுந்தரராஜன் உள்ளிட்டோரும் உடனிருந்தனர்.
இதனிடையே, வீட்டு வாசலில் காத்திருந்த திமுக தொண்டர்களை சந்திப்பதற்காக, கோபாலபுரம் இல்லத்தின் வாசல் வரை கருணாநிதியை, மு.க.ஸ்டாலின், கனிமொழி உள்ளிட்டோர் அழைத்து வந்தனர். திமுக தொண்டர்களைப் பார்த்து கையசைத்த கருணாநிதி, ஓரிரு நிமிடங்கள் அங்கேயே அமர்ந்திருந்தார். கருணாநிதி தொண்டர்களை பார்த்து கை அசைத்தபோது தொண்டர்கள் எல்லாரும் மகிழ்ச்சியுடன் ஆரவாரம் செய்தனர்.
