சென்னையின் பல்வேறு இடங்களில் இன்று பரவலாக நல்ல மழை பெய்தது. சாலைகளில் தேங்கிய தண்ணீரால் வாகனங்கள் மெதுவாக ஊர்ந்து சென்றன.
தமிழகம் மற்றும் புதுச்சேரியில் வெப்பசலனம் காரணமாக அடுத்த 2 நாட்களுக்கு மிதமான மழை பெய்யும் என வானிலை ஆய்வு மையம் தெரிவித்திருந்தது. இந்நிலையில், சென்னை, காஞ்சிபுரம், திருவள்ளூர் மாவட்டங்களில் நேற்று மாலை ஒரு மணி நேரத்திற்கும் மேலாக மழை பெய்தது. சென்னையில் பல்வேறு பகுதிகளில் காற்றுடன் கனமழை பெய்தது. நுங்கம்பாக்கம், ஈக்காட்டுத்தாங்கல், எழும்பூர், வேப்பேரி, வில்லிவாக்கம் உள்ளிட்ட பகுதிகளில் மழை வெளுத்து வாங்கியது. சாலைகளில் தேங்கிய மழை நீரால், வாகன ஓட்டிகள் சிரமத்திற்கு ஆளாகினர். பல இடங்களில் போக்குவரத்து பாதிக்கப்பட்டது.
திருவள்ளூர் மாவட்டம் பொன்னேரி, பழவேற்காடு, மீஞ்சூர் உள்ளிட்ட பகுதிகளிலும் நேற்று மாலை, காற்றுடன் கூடிய மழை பெய்தது. சாலைகளில் மழைநீர் தேங்கியதால் வாகன ஓட்டிகள் மற்றும் பாதசாரிகள் கடும் சிரமம் அடைந்தனர். இதேபோல் காஞ்சிபுரம் மாவட்டத்திலும் நேற்று மாலை காற்றுடன் பரவலாக மழை பெய்தது.
