credit ns7.tv
உசிலம்பட்டி அருகே நான்கு மாடிக் கட்டிடம் இடிந்து விழுந்த விபத்தில் ஒருவர் உயிரிழந்த நிலையில் இடிபாடுகளில் சிக்கிய நான்கு பேரை மீட்கும் பணி நடைபெற்றுக் கொண்டிருக்கிறது.
மதுரை மாவட்டம் உசிலம்பட்டி அருகே செக்காணூரணி - ஆ.கொக்குளத்தைச் சேர்ந்த கட்டிட ஒப்பந்ததாரரான மாதவன் அதே பகுதியில் அடுக்குமாடிக் குடியிருப்பு ஒன்றை கட்டும் பணியில் ஈடுபட்டுக் கொண்டிருந்ததாகக் கூறப்படுகிறது.
தரைத்தளம் உட்பட நான்கு மாடிகளைக் கொண்ட அந்தக் குடியிருப்பில் இன்று தரைத்தளத்தில் மின்சாரம் தொடர்பான பணிகள் நடந்து கொண்டிருந்தன. அப்போது யாரும் எதிர்பாராத வகையில் திடீரென கட்டிடம் முழுவதும் பேரிரைச்சலுடன் இடிந்து விழுந்தது. அதில் தரைத் தளமும் முதல் மாடியும் பூமியில் புதைந்தன.
இந்த விபத்தில் கட்டிட பணியில் ஈடுபட்டிருந்த ஒருவர் உயிரிழந்த நிலையில், கொக்கிகுளத்தைச் சேர்ந்த ஆதவன், முனியாண்டி, கார்த்திக் ஆகியோர் உயிருடன் மீட்கப்பட்டனர். மேலும் இடிபாடுகளில் சிக்கிய நான்கு பேரை மீட்கும் பணியில் தீயணைப்புத் துறை அதிகாரிகளும் காவல் துறையினரும் ஈடுபட்டுள்ளனர். இடிபாடுகளில் சிக்கி இறந்தவர் யார் என்பது குறித்து போலீசார் விசாரணை நடத்தி வருகின்றனர்.
சம்பவ இடத்தை மாவட்ட ஆட்சியர் உள்ளிட்ட உயரதிகாரிகளும் பார்வையிட்டனர். நான்கு மாடி கட்டிடம் இடிந்து விழுந்த விபத்தில் ஒருவர் உயிரிழந்ததும் நான்கு பேர் இடிபாடுகளில் சிக்கியுள்ளதும் அப்பகுதியில் பரபரப்பை ஏற்படுத்தியுள்ளது.
