கடும் வறட்சியால் தமிழகம் தவித்து வரும் நிலையில் மழை நீரை சுத்திகரித்து பொதுமக்களுக்கு இலவச குடிநீர் வழங்கி வரும் நபரை பலரும் பாராட்டுகின்றனர்.
நாகை மாவட்டம் சீர்காழியை அடுத்த திருவெண்காட்டை சேர்ந்தவர் காசிராமன். தொழிலதிபரான இவர் இயற்கை வேளாண் விஞ்ஞானி நம்மாழ்வாரின் வழியைப் பின்பற்றி இயற்கை விவசாயம் மேற்கொண்டு வருகிறார். தற்போது கடும் வறட்சி நிலவி வரும் நிலையில் பொதுமக்களுக்கு நாளொன்றுக்கு 5 ஆயிரம் லிட்டர் குடிநீரை இலவசமாக வழங்கி வருகிறார்.
மழை நீரை தனது வீட்டின் கிணற்றில் சேகரிக்கும் காசிராமன் பிறகு நவீன தொழில் நுட்பத்தின் உதவியுடன் அதனை சுத்திகரித்து பொதுமக்களுக்கு வழங்குகிறார். அவரின் இந்த சேவைக்கு பொதுமக்கள் வரவேற்பு தெரிவித்துள்ளனர்.
இதேபோல, புதுக்கோட்டையில் உள்ள ஆட்டோ ஓட்டுநர் ஒருவர் தன் ஆட்டோவில் பயணம் செய்யும் பயணிகளுக்கு இலவசமாக குடிநீர் வழங்கி வருவது பொதுமக்களிடையே பாராட்டை பெற்றுள்ளது. வறட்சியால் தமிழகம் தவித்துவரும் நிலையில், இதுபோன்று பொதுமக்களுக்கு உதவ முன்வருபவர்களை அனைவரும் பாராட்டி வருகின்றனர்.
